Yohanis 6:44-69

⁴⁴Au Amang nai nusa-sodak nadenu Au ia mai. Hataholi bisa neni Au mai, mete ma Au Amang noon mai. Basa de, dei fo daebafok babasan, Au tao asoda fali kasa.

⁴⁵Lamatuak mana kokola lele ulu nala sulak litak lae, ‘Manetualain nau nanoli basa hataholi la.’ Basa hataholi fo lamanene leu Amak nai nusa-sodak, ma lanoli leme Ndia mai, ala leni Au mai, fo dadik Au hataholing.

⁴⁶Au ia, mana konda neme Manetualain mai. De kada Au mesa nggau ita itak Ndia. Taa hambu hataholi feꞌek esa fo nita nitak nakandoon Amak nai nusa-sodak.

⁴⁷Tetebes! Au boe oo afada memak ei! Hataholi fo namahele neu Au, dei fo hambu soda tetebes fo taa namaketuk.

⁴⁸Huu Au ia, Loti fo maneni sodak ndia.

⁴⁹Makahulun ele, ei bei-baꞌi mala laꞌa loti manna neu ledoeik ala laꞌok ndule mamana nees. Mae ala laꞌa loti ndia, tehuu doo-doo, mate sala boe.

⁵⁰Tehuu Loti mana konda neme nusa-sodak hatematak ia, feꞌe. Huu basa hataholi bole laꞌa. Ndia ndandaan nae, basa hataholi kamahelek leu Au, ala taa laelak dook leme Manetualain mai bali.

⁵¹Huu Au ia, fo ndia Loti mana neni sodak, fo mana konda neme nusa-sodak mai. Boe ma, dei fo mete ma Au mate, na, Au fee Au aong fo basa hataholi malai daebafok ia bisa lasoda. Boe ma hataholi mana naꞌa Loti ndia, ala hambu soda tetebes fo taa namaketuk.”

⁵²Lamanene leondia, boe ma hataholi Yahudi la malangga nala mulai lasisimbo bafak esa no esa lae, “Aweꞌe! Ana kokolak hata ndia. Talobee de Hataholi ia fee Ndia aoinan fo ita taꞌa?”

⁵³Boe ma Yesus nafada sala nae, “Au kokolak tetebes. Ma Au afada leoiak: Au ia, Hataholi Isi-isik. Hataholi mana nau nasoda ndoos, na, musi nanambaꞌak no Au. De mete ma ei taa miꞌa Au aoinang, ma taa minu Au daang, na, taa hambu soda tetebes nai ei.

⁵⁴Huu hataholi fo naꞌa Au aoinang, ma ninu Au daang, na, ana hambu soda tetebes fo taa namaketuk. Boe ma dei fo daebafok babasan, na, Au tao asoda fali kana.

⁵⁵Huu nanaꞌa tetebes na ndia, Au aoinang. Ma nininu tetebes na ndia, Au daang.

⁵⁶De hataholi mana naꞌa Au aoinang, ma ninu Au daang ndia, na, hambu sodak nanambaꞌak no Au. Ma Au boe oo, nanambaꞌak ua ndia.

⁵⁷Amak manai nusa-sodak fo mana madenu Au ndia, Ana nasoda tetebes. Ma Au boe oo hambu soda tetebes neme Ndia mai. Huu ndia de hataholi mana naꞌa Au aoinang, na, ndia boe oo hambu soda tetebes neme Au mai.

⁵⁸Makahulun ei bei-baꞌi mala laꞌa loti manna ndia fo mana konda neme lalai mai. Mae ala laꞌa loti ndia tehuu doo-doo boe ma mate sala boe. Tehuu Loti fo mana konda neme nusa-sodak mai hatematak ia, feꞌe. Huu hataholi mana naꞌa Loti ndia, neu ko hambu soda tetebes.”

⁵⁹Yesus nanoli dedeꞌa kala ia, nai hataholi Yahudi la uma huhule-haladoin esa nai kota Kapernaum.

⁶⁰Hambu hataholi noꞌu kala tungga Yesus. Faik fo ala lamanene Ndia nanonolin leondiak boe ma hambu luma kokolak lae, “Ndia nanonolin ia, belan seli, maa! See bisa simbok nanonolik ndia?”

⁶¹Tehuu Yesus bubuluk ala manggalau leondiak, de Ana natane nae, “Hatina de Au nanonoling tao nala ei toꞌa-taa.

⁶²Toꞌa-taa nalan seli bali mete ma ei mita Au, fo Hataholi Isi-isik ia hene fali uni ele uu, nai Au mamana makahulun nai nusa-sodak!

⁶³Lamatuak Dulan fo maneni soda tetebes. Hataholi aoinan taa bisa neni soda tetebes. Tehuu Au Dedeꞌa-kokola nggala laoka leme Lamatuak Dulan mai. De Dedeꞌa-kokolak ndia boe, leni soda tetebes neu hataholi la.

⁶⁴Tehuu hambu ei luma fo taa mamahele miu Au.” Yesus kokolak leondia, huu Ana bubuluk neme makasososan mai so, fo see taa namahele, ma see dei fo seꞌo heni Ndia.

⁶⁵Boe ma Yesus kokolak nakadaik bali nae, “Huu ndia de Au afada ei so ae, Au Amang nai nusa-sodak musi soi dalak fee hataholi dei, bei fo hataholi ndia maso dadik neu Au hataholing.”

⁶⁶Mulai neme faik ndia mai, hambu hataholi noꞌu kala leme Ndia ana mana tungga nala mai heok lasadea Ndia, huu ala taa nau tungga Ndia bali.

⁶⁷Boe ma Yesus natane Ndia ana mana tungga kasanahulu dua nala sila nae, “Boe ma ei talobee? Sangga heok mima Au mai boe, do?”

⁶⁸Tehuu Simon Petrus nataa nae, “Lamatuak aa! Ai sangga mini see miu bali? Taa hambu hataholi feꞌek so fo bisa nafada ai, talobee fo ai bisa hambu soda tetebes ndia fo taa hambu namaketuk. Kada Lamatuak mesa kana.

⁶⁹Ma ai mamahele neu Lamatuak. Huu ai bubuluk so mae, Lamatuak ia, na ndia Manetualain Hataholi Malalaon.”