Yohanis 6:26-43

²⁶Yesus nataa nae, “Teteben, leoiak: ei taa sangga Au huu ei mita tanda heran nala so. Tehuu ei sangga Au, huu Au fee ei miꞌa losa ei makabete.

²⁷Mamanene matalolole! Boso kada tao ues fo hambu nanaꞌak fo dei fo naboo henin. Malolenak ei tao ues fo hambu nanaꞌak fo nahele nakandoo, ma neni soda tetebes fo taa namaketuk. Huu Au ia, Hataholi Isi-isik. Au ia mana fee sodak neu ei. Huu Amak manai nusa-sodak fee basa haak ndia neu Au.”

²⁸Boe ma latane lae, “Mete ma leondiak, na, ai musi tao leobee, fo suek ai bisa makalalaꞌok Lamatuak uen?”

²⁹Yesus nafada nae, “Lamatuak uen ndia leoiak: ei musi mamahele neu Au. Huu Manetualain ndia, nadenu Au.”

³⁰Boe ma latane bali, lae, “Ama musi matudu tanda heran leobeek, fo ai bisa mita, ma mamahele neu Ama? Boe ma Ama nau tao hata neu ai bali?

³¹Conto leo, ita bei-baꞌi nala laꞌa lotimanna nai mamana nees. Ndia dadi sama leo nana sulak nai Lamatuak Susula Malalaon nae, ‘Ana fee sala loti mana konda neme lalai mai, suek laꞌa.’ ”

³²Yesus nae, “Au afada ei teteben leoiak: makahulun, baꞌi Musa ndia taa nakonda loti ndia neme lalai mai, fo fee ei bei-baꞌi mala. Huu mana makondak, ndia Au Amang nai nusa-sodak. Hatematak ia Ndia boe sadia fee ei loti maneme lalai mai. Tehuu loti ia, Loti tetebes fo nahele nakandoo.

³³Huu Loti ia, neme Lamatuak mai, fo ndia Mana kondak neme nusa-sodak mai, ma neni sodak fee hataholi lai daebafok ia.”

³⁴Basa de ala loke lae, “Lamatuak! Fee loti ndia nakandondoo henin neu ai dei!”

³⁵Boe ma Yesus nafada sala nae, “Au ia, ndia Loti ndia. Huu Au ndia uni soda tetebes. De hataholi mana maso dadik neu Au hataholing, taa ndoe so bali! Ma hataholi fo namahele neu Au, taa maa mada so bali!

³⁶Tehuu Au afada itak ei ae, mae ei mita Au so, tehuu ei bei ta mamahele Au boe.

³⁷Naa te basa hataholi fo Au Amang hele nala sala so, fo dadik Au hataholi nggala, dei fo leni Au mai. Ma mete ma hambu hataholi neni Au mai, na, Au taa bisa husi henin!

³⁸Huu Au konda uma lalai mai. Au mai fo tao tungga Au Amang hihii-nanaun, huu Ndia ndia nadenu Au. Au taa nau kada tao tungga Au mesa nggau hihii heheling.

³⁹Ma Ndia hihiin leoiak: neme basa hataholi fo Ana hele nala kala, fo dadik neu Au hataholi nggala, Ana nau fo Au akabubua ala basa sala. Au taa bole ela esa boe, fo mopon. Tehuu dei fo daebafok babasan, na, Au musi fee sala lasoda fali.

⁴⁰Sama leo Au afada isinaak ndia, Au Amang nau fo basa hataholi la mana malelak ma lamahele leu Au, fo ndia, Ndia Anan ia, na, ala bisa hambu soda tetebes fo taa hambu namaketuk. Basa de dei fo faik fo daebafok babasan, Au tao asoda fali kasa.”

⁴¹Hataholi Yahudi la malangga nala mulai luli Ndia, huu Ana nae, “Loti ndia neme Lamatuak mai fo ndia Au mana konda neme nusa-sodak mai.”

⁴²Ala lakokola lae, “Talobee ia so? Hataholi ia, fo ndia Yesus fo Ama Yusuf anan hetu? Ai malelak Ndia inama nala. De, talobee de hatematak ia Ana nae, ‘Au konda uma lalai mai’? Hambun nai bee?”

⁴³Yesus nadenu sala nae, “Wei! Hahae manggalau nai ndia, leo!