Yohanis 3:11-21

¹¹Au afada hata fo tetebes. Au ma Au hatahoring nggara, malela dedeꞌak bebeik kara iar. Huu ai dadi sakasii laꞌe-neu dedeꞌak kara fo ai mete-mita no ai mata heli-helin nara ena. Tehuu ei ta simbok no malole ai kokolan.

¹²Neu Au afada laꞌe-neu hata mandadik kara rai dae-inak, ei ta nau mamahere. Hata-bali mete ma Au afada laꞌe-neu hata mandadik kara rai lalai. Neu ko lena-lenak bali ei ta mamahere!

¹³Ta hambu hatahori esa boe na hene neu nasare mbali Manetualain nai lalai. Kada Au mesa ngga, ndia Hatahori Dae-bafo Isi-isik ia fo mana konda numa Ndia mai.

¹⁴Lele uluk numa mamana nees, baꞌi Musa londa mengge riti esa neu ai lain, fo basa hatahorir mete-ritan, boe ma ara hambu sodak. Dedeꞌak leo naak oo muste dadi soa-neu Au, Hatahori Dae-bafo Isi-isik ia boe. Neu ko ara rae londa Au neu ai lain,

¹⁵fo basa hatahorir mana ramahere neu Au, hambu masodak tetebes ta mana ketuk.

¹⁶Huu Manetualain sue nalan seli neu basa hatahorir marai dae-bafok ia, de Ana nadenu Au, Ndia Ana kise muꞌen ia, mita fo basa hatahorir mana ramahere neu Au, ta lenggo feꞌe numa Manetualain mai. No dalak naa, ara hambu masodak tetebes ta mana ketuk.

¹⁷Manetualain ta nadenu Au, Ndia Anan neni dae-bafok ia mai, fo huku-doki hatahorir. Tehuu Ana nadenu Au fo tao asoi-asoda hatahorir numa sala-singgon nara huku-dokin mai.

¹⁸Manetualain ta hukun hatahori mana namahere neu Au. Tehuu Ana naketu memak huku-dokik soa-neu hatahori ta mana namahere neu Au, nahuu hatahori naa ta namahere neu Au, ndia Manetualain Ana kise muꞌen ia.

¹⁹Talo ia: Manetualain haitua manggaledok mai ena fo nasaꞌa nai dae-bafok ia. Tehuu hatahori hihiin lenak leo-laꞌo nai makiu-makahatuk. Ara ta nau leo-laꞌo nai manggaledok, nahuu sira tatao-nonoꞌin, ta neulauk. Huu naa de Manetualain nae hukun asa.

²⁰Huu basa hatahorir mana tao ta neulauk kara, mburuk ro manggaledok naa. Ara ta hii manggaledok naa nasaꞌa neu sara, mita fo manggaledok naa boso lufa nakaholak manggaraun nara.

²¹Tehuu hatahorir mana tao tungga hata fo ndoos, ara mai, mita fo manggaledok naa nasaꞌa neu sara. Huu manggaledok naa natudu nae, sira tao tungga Manetualain hihii-nanaun.”