Yohanis 21:5-17

⁵Boe ma nameli de natane se nae, “Aꞌa ra, e! Hambu uꞌu ena, do?” Ara rataa rae, “Rouꞌ, Aꞌa! Hai nda mala sa saa boe.”

⁶Boe ma nafadꞌe se nae, “Mboꞌi sobꞌa puꞌat neu ofaꞌ bobꞌoa onan. Dei fo hei mala.” De ara tao tungga. Boe ma ara rala uꞌu. Uꞌu hetar seli, losa ara nda raeꞌ a nore rala puꞌat ofaꞌ rala neu sa.

⁷Naa, au o sia naa boe. Au ia, ana mana tunggan fo Yesus sueꞌ a. De au ufadꞌe Petrus ae, “Awii! Eni, hita Lamatuan!” Rena au oꞌola ngga, boe ma Simon Petrus olu baliꞌ badꞌun, de boke dano ralan nae nane madꞌaꞌ ata neu.

⁸Huu mbei ma ofaꞌ doon akaꞌ meter natun esa (100) mia madꞌaꞌ ata. De nonoo nara sefe ofaꞌ baliꞌ madꞌaꞌ ata reu, ma nore rendi puꞌat mana sofeꞌ no uꞌu sia ofaꞌ a deaꞌ.

⁹Leleꞌ ara losa madꞌaꞌ ata ma, ara rita ai kaaꞌ mana rombeꞌ sia naa. Uꞌu sia ai a ata ena. Ma hambu roti boe.

¹⁰Yesus nafadꞌe se nae, “Mendi uꞌu mbei mia faꞌ ra fo hei puꞌa malaꞌ ra.”

¹¹Boe ma Simon Petrus hene baliꞌ ofaꞌ rala neu, de ana nore puꞌat madꞌaꞌ ata neu. Puꞌat naa sofeꞌ no uꞌu monaeꞌ. Dedesi nara uꞌu natun esa lima nulu telu (153). Mae uꞌu desi basa naa te, puꞌat naa nda sika hendi e sa.

¹²Basa de Yesus noꞌe se nae, “Ima, fo mia leo!” Ara o bubꞌuluꞌ rae, Eni, sira Lamatuan. Naa de ara nda rambarani ratane rae, “Aꞌa ia, Seka?”

¹³Boe ma Yesus haꞌi nala roti no uꞌu, de fee neu se.

¹⁴Naa, Naeni lao ka telun Yesus natudꞌu Aon neu ana mana tungga nara, leleꞌ Ana nasodꞌa baliꞌ mia Eni mamaten.

¹⁵Leleꞌ ara raa basa, ma Yesus natane Simon Petrus nae, “He, Simon, Yohanis anan. Taꞌo bee? Ho sue Au lenaꞌ nonoo mara ia ra, do?” Ana nataa nae, “Tebꞌe! Papa bubꞌuluꞌ au sue Nggo ena.” Boe ma Yesus helu neu e nae, “Mete ma taꞌo naa, na, tadꞌa malolole Au bibꞌi lombo ana nggara fo hambu raa.”

¹⁶Boe ma Yesus natane seluꞌ e nae, “Simon, Yohanis anan. Taꞌo bee? Ho sue Au, do?” Ana nataa nae, “Tebꞌeꞌ! Papa bubꞌuluꞌ au sue Papa.” Boe ma Yesus helu neu e nae, “Mete ma taꞌo naa, na, muꞌubꞌoi malolole Au bibꞌi lombo nggara.”

¹⁷Basa ma Yesus natane seluꞌ e fai nae, “Simon, Yohanis anan. Taꞌo bee? Ho sue Au, do?” Boe ma Petrus ralan susa neuꞌ ena, huu Yesus natane lao telu ena nae, “Ho sue Au, do?” De ana nataa nae, “Papa mana bubꞌuluꞌ basa dalaꞌ ra. Dadꞌi Papa bubꞌuluꞌ mae, au sue Papa.” Boe ma Yesus helu neu e nae, “Mete ma taꞌo naa, na, tadꞌa malolole Au bibꞌi lombo ana nggara fo hambu raa.