Yohanis 21:3-16

³Hotu, Simon Petrus katak baa niakaan mamaluk sia naꞌak, “Haꞌu atu kbaa tiha naꞌan tasi.” Sia nataa naꞌak, “Heꞌe! Ami moos tuir.” Sia moos saꞌe bero, baa tiha naꞌan tasi. Mais, baa kalan nia tomak sia la tiha nola saa ida.

⁴Baa awan seisawan, Yesus nariik iha debu tehen. Mais sia la natene Nia.

⁵Nia bolu nodi nusu sia naꞌak, “Mau sia! Emi hetan ka lale?” Sia nataa naꞌak, “Mamuk liu Mau!”

⁶Hotu Yesus naruka sia naꞌak, “Soe kokon daitiha nia baa bero sorin. Emi atu hetan.” Rona nola nunia, sia nalo tuir kedas. Sia moos netan naꞌan tasi waꞌin basuk, toꞌo la bele dada saꞌe daitiha baa bero laran.

⁷Baa oras nia, haꞌu moos iha nia. Haꞌu neꞌe, Yohanis, maktuir mak Yesus dadobe. Haꞌu moos katak baa Petrus kaꞌak, “Adeei! Ema neꞌe, itakaan Ulun!” Rona haꞌu kdale nunia, Simon Petrus tau nikar farun, hotu soe aan baa debu laran, atu nani baa tehen.

⁸Roo nia takseer dook roꞌa atus ida nosi debu tehen. Hotu, Simon Petrus niakaan mamaluk sia fofer nikar bero baa debu tehen. Sia moos dada nodi daitiha mak nakonu naꞌan tasi nia.

⁹Toꞌo baa, sia naree haꞌi lutan noꞌi laka iha nia. Iha haꞌi leten noo naꞌan tasi. Iha nia moos noo tubi.

¹⁰Hotu Yesus katak baa sia naꞌak, “Hodi mai naꞌan tasi lolon hira mak emi foin hetan nia, nebee tunu atu hodi haa.”

¹¹Rona nola nunia, Simon Petrus saꞌe nikar baa bero atu dada saꞌe daitiha nia baa debu tehen. Daitiha nia nakonu no naꞌan tasi boot. Sura hotu, kona atus ida lima nulu resin tolu. Masik naꞌan tasi waꞌin nunia moos, daitiha nia la naklees.

¹²Hotu, Yesus bolu naꞌak, “Mai ita haa lai!” La noo ida mak bele nusu naꞌak, “Mau neꞌe, see?”, tan sia natene tebes tiꞌan, Nia neꞌe, siakaan Ulun.

¹³Hotu, Yesus nola tubi no naꞌan tasi, foo baa sia.

¹⁴Oras nia, dala tolu tiꞌan Yesus natadu aan baa Niakaan maktuir sia, baa oras Nia moris nikar nosi mate.

¹⁵Sia naa notu tiꞌan, Yesus nusu baa Simon Petrus naꞌak, “Hei Simon, Yohanis oan. Nunabee? O madomi Haꞌu liu nosi belu neꞌe sia ka?” Petrus nataa naꞌak, “Tebes, Ama Boot! Ama Boot natene duꞌuk, haꞌu kadomi Ama Boot.” Hotu, Yesus naruka nia naꞌak, “Kalo nunia, maliku modi mahaan Haꞌukaan bibi malae oan sia.”

¹⁶Nunia hotu, Yesus nusu tenik naꞌak, “Simon, Yohanis oan. Nunabee? O madomi Haꞌu ka lale?” Nia nataa naꞌak, “Tebes, Ama Boot! Ama Boot natene duꞌuk, haꞌu kadomi Ama Boot.” Hotu, Yesus naruka tenik naꞌak, “Kalo nunia, maliku modi mahaan Haꞌukaan bibi malae sia.”