Yohanis 21:1-18

¹Èle pèri-pèri lodꞌo, ka Yesus padꞌelo hari iisi Na ètu sebhe dano Tiberias. Lii lolo na, sèmi neꞌe ka:

²Lodꞌo èèna, ana madhutu Yesus, dhèu pidhu dhu pakaboko. Rèngu se, nuka: Simon Petrus, Tomas, dhu ra pangare ne, ‘ana kembar’, Natanel, nèti rae Kana ètu propensi Galilea, ana dhèu dua nèti Sabadeus, dènge ana madhutu Yesus dhu leo dhèu dua.

³Simon Petrus peka dènge angalai na seꞌe, “Jaꞌa neo laku pèku iꞌa.” Hèia angalai na seꞌe dhaa, aku rèngu na, “Oo! Jiꞌi laꞌa kahèi.” Ka lasi asa sebhe dano. Hèia caꞌe koha lasi tenge iꞌa. Te ngaa mèda èèna rèngu rara boe ngaa-ngaa.

⁴Asa bèli madꞌae aae èèna, Yesus titu ètu sebhe dano ne. Te ngaa ana madhutu Na sèra reꞌa boe, na, Nèngu ne, Yesus.

⁵Ka Na paꞌoo, peka na, “Mera iꞌa, do?” Hèia ra dhaa, peka na, “Mola-mèu lao! Ciꞌu sa, aadꞌo hèi.”

⁶Ka Yesus peka dènge ra, aku Nèngu na, “Lolo sèku pèku miu asa cabèka koha èèna. Pe miu abhu.” Ka rèngu tao madhutu kahèi. Ka ra abhu iꞌa ae titu kèna, toke rèngu bisa boe ère rare pèku ne asa dedha koha.

⁷Aa jaꞌa ètu èèna kahèi. Jaꞌa ne, ana madhutu dhu Yesus sue. Ka jaꞌa peka dènge Petrus, na, “Ira ii! Nèngu nèi, Lamatua èdhi!” Ropa tadèngi nare lii jaꞌa deo na, hèia Simon Petrus pake hari kodho na, ka ridhu asa dꞌara dano, sèna ka nangi asa dae.

⁸Te koha ne kajꞌèu nèti dae pe dꞌai cangasu meter sa. Hèia angalai na kao koha asa dae, todhe dènge pèku dhu pènu dènge iꞌa deo sa.

⁹Ropa rèngu dꞌai dae, hèia rèdhi ai karoo, dènge iꞌa dhu ra paga. Aa abhu roti kahèi.

¹⁰Yesus lii dènge ra, “Mèti ku iꞌa osa miu dꞌai ciki sa, dhu miu heka pèku mere deo na.”

¹¹Ka Simon Petrus caꞌe hari asa dedha koha, ho ère paꞌeta pèku ne asa dae. Pèku ne dhu pènu dènge iꞌa aae, cangasu lèmi nguru tèlu ngiꞌu. Masi ka iꞌa ae sèmi èèna, te ngaa pèku ne mae boe ciki sa hèi.

¹²Ka Yesus paroa si, aku Nèngu na, “Mai miꞌa ka!” Rèngu dhu reꞌa le, na, Nèngu ne Lamatua rèngu, ka ra bani boe karèi Ne, na, “Ama ne, cee?”

¹³Hèia Yesus nare roti dènge iꞌa, nèti hia si.

¹⁴Neꞌe ne, ka tèlu hari kèna Yesus padꞌelo iisi Na mi ana madhutu Na sèra, ropa Na mamuri hari nèti mamadhe Na.

¹⁵Ropa raꞌa-rinu rare, Yesus karèi Simon Petrus, aku Nèngu na, “Hee, Simon ana Yohanis. Tasamia? Èu sue Jaꞌa risi nèti angalai se sue Jaꞌa, do?” Ka Petrus dhaa, na, “Tareꞌa Ama! Èu dhu meꞌa jaꞌa sue Èu.” Hèia Yesus peka, na, “Ladhe sèmi èèna, na, madhenga paie ana kahibꞌi-kalèbho Jaꞌa, sèna ka rèngu abhu raꞌa-rinu.”

¹⁶Hèia Yesus karèi hari, aku Nèngu na, “Simon, ana Yohanis. Tasamia? Èu sue Jaꞌa, do?” Ka na dhaa, na, “Tareꞌa Ama! Èu dhu meꞌa jaꞌa sue Èu.” Ka Yesus peka hari dènge ne, “Ladhe sèmi èèna, na, ladhe-leru paie-iie kahibꞌi-kalèbho Jaꞌa.”

¹⁷Èle èèna ka, Yesus karèi hari Petrus, peka na, “Simon, ana Yohanis. Tasamia? Èu ne, angalai Jaꞌa, do?” Hèia dꞌara Petrus susa titu kèna, lula Yesus karèi ne dꞌai tèlu hari, peka na, “Èu sue Jaꞌa, do?” Ka na dhaa, aku nèngu na, “Ama dhu meꞌa aaꞌi jꞌara. De Ama dhu meꞌa le, na, jaꞌa ne angalai Ama.” Hèia Yesus peka dènge ne, “Ladhe sèmi èèna, na, ladhe-leru paie kahibꞌi-kalèbho Jaꞌa se, sèna ka rèngu abhu raꞌa-rinu.

¹⁸Èu dhane more le naneo Jaꞌa, do? Jaꞌa neo peka sèmi neꞌe: uru èèna lodꞌo èu ngèru era, èu tema pake unu mu kodho dènge dhara hake, ho lamu asa mia-mia madhutu dadꞌèi èu. Te ngaa ètu dꞌara heka, èu jꞌole kacui-aai ho dhèu èki, pake dhara hake èu unu mu. Hèia ra ère rèti èu asa era dhu èu dꞌèi boe.”