Yohanis 20:7-17

⁷Ana oo mete-nita lesu esa boe, fo ara paken mboti Yesus langgan. Tehuu lesu naa, neni dikuk ma lenggo feꞌe numa tema bangganaꞌuk naa mai.

⁸De au, fo mana losa akahuluk nai rates oo dudi dale uu boe. Neu au mete-ita basa naar, boe ma au amahere neu Yesus kokolan fai bakahulun nae, neu ko Ana nae nasoda fali numa Ndia mamaten mai.

⁹Neu Ana bei ta mate, ai fo mana dadi miu Ndia ana nunin bei ta malela Manetualain Susura Malalaon fo mana surak memak kana numa lele uluk mai nae, Karistus muste nasoda fali numa Ndia mamaten mai.

¹⁰Basa boe ma ai dua ngga fali.

¹¹Tehuu Maria bei nambariik numa rates naa dean. Ana buꞌi nakandoo. Neu ana bei buꞌi, boe ma ana titino neni rates naa dale neu.

¹²Ana mete-nita Manetualain atan dua numa nusa tetuk do inggu temak mai. Ara pake bua-loꞌa mutik. Dua sara ranggatuuk reu mamanak fo fain na hatahorir ralololi Yesus ao-mbaa mamaten neun. Esa nanggatuuk neu langgan mamanan. Esa bali nanggatuuk neu ein mamanan.

¹³Ara ratanen rae, “Tao hata de kaꞌa inak buꞌi?” Boe ma ana naselu nae, “Au buꞌi, nahuu ara koꞌo reni au Lamatuang ao-mbaa mamaten ena. Tehuu au ta bubuluk ara taon neni bee neu.”

¹⁴Ana kokolak basa talo naa, boe ma ana nasafali de leuk dea neu. Ana mete-nita hatahori esa nambariik numa naa, tehuu ana ta bubuluk, Hatahori naa, ndia Yesus.

¹⁵Boe ma Yesus natanen nae, “Tao hata de kaꞌa inak buꞌi? Kaꞌa inak sangga see?” Maria nae hetuk ko hatahori naa, ndia kada mana tao osi. Boe ma ana kokoen nae, “Papa. Mete ma papa koꞌo neni Lamatuak ao-mbaa mamaten ena, na, mafada dei, papa mbedan nai bee. Mita fo au unin neni mamana laen neu fo atoin no neulauk. Tulun dei!”

¹⁶Boe ma Yesus nanggoun nae, “Maria!” Ana nasare mbali Yesus, de nae, “Raboni!” (Nai dedeꞌa Aram, sosoa-ndandaan nae, “Au Meseng!”)

¹⁷Yesus nafadan nae, “Boso lai mafaroe Au dei, te Au bei ta hene uni Au Amang nai nusa tetuk do inggu temak uu. De kaꞌa inak muu leo, fo mafada Au toranoong nggara mae, ‘Au ae hene uni Au Amang uu. Ndia oo, ndia ei Amam boe. Ndia naa, Au Manetualaing. Dadi Ndia naa oo, ei Manetualain boe.’ ”