Yohani 4:11-34

¹¹Yula mdadala kamuwombela, “Bambu, kuvahela chindu cha kutekela machi na litepu lyeni litali munu. Topi dawupati koti machi va unofu?

¹²Mbuyi wetu Yakobi ndi yatugayilili yufwi litepu ali. Mweni bahala pamu na vana vaki na vang'ongolu vaki valandili machi vaki. Yuwi wukuyiwona kuva mkomi pitu Yakobi?”

¹³Yesu kamuyangula, “Kila mundu yalanda machi ava dayumilwi kandi ha.

¹⁴Lakini mundu yoyosi dalanda machi vala dandimgayili, dayumilwi kandi ha hata padokwa. Kwanongwa machi dandimgayili, davavi mugati yaki mukusesa machi na kutuva machi va unofu wa jola.”

¹⁵Mdadala yula kamuwombela, “Bambu, topi unyimbi machi veni ili ngotoo kuyumilwa kandi na ngotoo kuyisa kandi apa kuteka machi.”

¹⁶Yesu kamuwombela, “Yendi kamkemi mlumi waku ayisi apa.”

¹⁷Yula mdadala kamuyangula, “Nenga ndivahela mlumi.” Yesu kamuwombela, “Ukudeta nakaka kucha kuvahela mlumi.

¹⁸Kwanongwa wahetiwili na valumi muhanu na ayu yiwikala nayu ponopa mlumi waku ng'odu.”

¹⁹Pambeli mdadala yula kamuwombela, “Bambu, nguwona kucha yuwi mbuyi.

²⁰Vavaha vetu vamudadavili Chapanga kumbindi ya chidunda achi, lakini yumwi Vayawudi mukudeta kucha Yelusalemu ndi peni patudayiliwa kumdadavila Chapanga.”

²¹Yesu kamuwombela, “Mawu, ujumili nenga, chipindi chikwisa vandu davamdadavili ha Tati kumbindi ya chidunda achi wala aku Yelusalemu.

²²Yumwi Vasamaliya mumanya ha chimuchidadava. Vayawudi tukumdadava Chapanga yitumumanyili na kwa kupitila Vayawudi, Chapanga kavakombola vandu vosi va mumlima.

²³Lakini chipindi dachiyisi na chiva kala, ponopa yivamdadava kwa nakaka vakumudadava tati muufuki na unakaka. Nongwa tati akuvatama vandu yivamdadava ndambu yadayila mweni.

²⁴Chapanga ndi Mfuki, vandu yivamdadava vakudayiliwa vamdadavi Mumfuki na unakaka.”

²⁵Mdadala yula kamuwombela, “Manya kucha Mkombola yivamkema Kilistu dayisi, payisa datuhimulili filongu fyosi.”

²⁶Yesu kamuwombela, “Nenga yideta na yuwi, ndi mweni.”

²⁷Chipindi chichila Vanachuli vaki vawuya. Vayikanganika kumuwona akuwombana na mdadala. Lakini kwahela mundu yamudashili yula mdadala kucha akudayila liki, awu kumudasha Yesu kucha nongwa liki akuwombana na mdadala yula.

²⁸Topi mdadala yula kachileka chiyungu chaki cha machi pala, kawuya kumbwani, avawombilili vandu,

²⁹“Mwisi mumuloli mundu yang'ombilili milandu yosi yigolili! Ayu Kilistu nda?”

³⁰Topi vandu vafuma mumbwani yila, vamyendela Yesu.

³¹Chipindi chichila vandundami vaki vamudediveka, pavadeta, “Muwula, wulyi tanila filivi!”

³²Lakini Yesu kavayangula, “Nenga ndina filivi mngajila kufimanya.”

³³Vanachuli vaki vakanda kuyidasha, “Kuna mundu yamuyeghilili filivi?”

³⁴Yesu kavawombela, “Filivi fyangu ndi achi: kugola fila fyadayila Chapanga na kumalisha chichuku chanayishili ndiyigoli.