Yohani 21:10-21

¹⁰Yesu kavawombela, “Muyeyi vasomba vamu yimuvakamulili ponopa.”

¹¹Simoni Petili kayipaka muwatu kakwegha lwafu luveli na vasomba mbwaya milongu na lilongu muhanu na vatatu. Vasomba vosi ava lakini lwafu lwademukili ha.

¹²Yesu kavawombela, “Mwisi mulyi.” Kwahela ndundami yamudashili kucha, mweni ghani, kwanongwa vamanyili mweni Bambu.

¹³Yesu katola libumunda kavagayila, pambeli atolili vasomba kagola nga wuwula.

¹⁴Awu waveli mwanja wa tatu wa Yesu kuvafumbukila vandundami vaki kufuma pashukukili.

¹⁵Pavalili kala, Yesu kamuwombela Simoni Petili, “Simoni mwana wa Yohani, Wuli, yuwi ukundama nenga munu kupita voseva?” Kamyangula, “Yina Bambu, yuwi kumanya kucha ngukutama.” Yesu kamuwombela, “Dimi vanafungami vangu.”

¹⁶Yesu kamuwombela kandi, “Simoni mwana wa Yohani, wuli, kundama?” Kamuyangula, “Yina Bambu, yuwi kumanya kucha ngukutama.” Yesu kamuwombela, “Dimi vafungami vangu.”

¹⁷Mwanja wa tatu kamuwombela, “Simoni mwana wa Yohani, ukundama nenga?” Petili kakalala nongwa kamdasha myanja mitatu, “Yuwi ukundama nenga?” Mweni kamuwombela, “Bambu kumanya.” Yesu kawomba, “Dimi vafungami vangu.

¹⁸Ngukuwombela nakaka, pawuveyi msongolu wayiwopili umweni yingwa yaku, wayendili kuwudayila umweni. Lakini paugogola dawuhololi mawoku vaku na mundu wingi akukuwopa yingwa yaku, pambeli akukuyegha kuungajila kudayila kuyenda.”

¹⁹Yesu kawomba naha kulangusha kucha Petili dasovi munjifwa ya wuliwuli na kuyegha ukomi kwa Chapanga. Pambeli Yesu kamuwombela, “Ungovikeli!”

²⁰Petili kaghalambuka kamuwona ndumindumi yula yatamiwili na Yesu akuvakovikela, ndundami yula ndi mweni yamusaghamilili Yesu pavalyeyi, yula amudashili, “Bambu ghani akwisa akushengeti yuwi?”

²¹Petili pamuwonili mweni, kamudasha Yesu, “Wuli mundu ayu?”