Yohanese 21:7-17

⁷Eleki Yesuse Eni maka lulu rebe Iokine ibeteke loko Petruse be, “Imi seluI mimise! Mere Tuhane Yesuse.” Kena Petruse ilene be mere Tuhane Yesuse, hoko ialike eni lapune le ialike lapune mo eleki ibua lope tlakare.

⁸Yo Yesuse Eni maka lulua maketaru esi sai lului kai esi neha uete rebe epenu kena iana meru. Esi lau bei laiuluije mo. Esi lauke kasuke metera utune neka.

⁹Eleki kena esi rulu bei soa buine, esi selu auwe lanati, asake iane ndete baba kenae kai roti.

¹⁰Yesuse Iombe, “Keri iane inai kuila lomei bei iana rebe eku imi supure.”

¹¹Eleki Simone Petruse isa lorau soa buine eleki ineha uete lora kmalene. Uete mere epenu kena iana elaka bokala, pusure inai utune esa butu lima lesini telu. Masike iana bokala meru po uete kahi mo.

¹²Yesuse Iombe, “Kwalia imi, mai kane.” Eni maka luluaru, rekwa sae inehe kena tneu mo be, mere sia le pususi rekwa be Ile Tuhane Yesuse.

¹³Eleki Yesuse Itehaikesi kai Irana roti kai iane eleki Irilukele etesi.

¹⁴Hoko bei kena Yesuse Ikwana suike bei matale, Iaseluke ruaI ete Eni maka luluaru rebai telu kena mere.

¹⁵Eleki kena esi kane pelare, Yesuse Itneu Simone Petruse be, “Simone, Yohanese eni nanae. Aoki Au lesi bei sie meiju lalesi oki Aure moyo?” Petruse iombe, “Tinai, Tuhane. RuaMu pine Arekwa be au oki Ale.” Yesuse Iombe, “Pialae Auku dombaru.”

¹⁶Yesuse Itneu suike be, “Simone, Yohanese eni nanae. Aoki Au o?” Petruse iombe, “Tinai, Tuhane. RuaMu pine Arekwa be au oki Ale.” Yesuse Iombe, “Pialae Auku dombaru.”

¹⁷Yesuse Itneu suike leneka be, “Simone, Yohanese eni nanae. Aoki Au o?” Eleki Petruse laleije penu le Yesuse Itneu rebai telu be, “Aoki Au o?” Petruse iombe, “Tuhane, sasaisa neka Arekwae. Tuhane, Arekwa peneka be au oki Ale.” Yesuse Iombe, “Pialae Auku dombaru.”