Yohanes 9:3-14

³Yesus piki den taki: “A no den sondu fu en, noso di fu en m'ma nanga en p'pa, meki a breni. Ma a sani disi psa fu sma kan si san Gado kan du gi en.

⁴Solanga dei krin ete, wi mus du den wroko fu a Wan di seni Mi kon. Bika neti yuru e kon, dan no wan sma no o man wroko.

⁵Solanga Mi de na grontapu, Mi na a faya fu grontapu.”

⁶Baka di Yesus taki a sani disi, A spiti na gron, A meki tokotoko fu en, dan A lobi a tokotoko gi den ai fu a man.

⁷Dan A taigi en taki: “Go wasi yusrefi ini a watra fu Siloam.” (Siloam wani taki: Seni.) Dan a man go wasi ensrefi. Di a e drai kon baka, a ben e si.

⁸Den sma fu en birti, nanga trawan di ben sabi en leki wan begiman, aksi taki: “A no a man disi ben e sidon e begi moni?”

⁹Sonwan fu den taki: “Na en.” Trawan taki: “No, ma a gersi en.” Ne a man srefi taki: “Na mi.”

¹⁰Dan den aksi en taki: “Fa a du kon dan tak' yu e si now?”

¹¹A piki den taki: “A man di den e kari Yesus, meki tokotoko lobi gi mi ai, dan A taigi mi fu go wasi misrefi ini a watra fu Siloam. So mi go wasi misrefi, dan mi ben kan si.”

¹²Dan den sma aksi en taki: “Pe A de now?” A man piki taki: “Mi no sabi.”

¹³Dan den tyari a man di ben breni go na den Fariseiman.

¹⁴A dei di Yesus meki a tokotoko dresi a man ai, ben de wan sabadei.