Yohanes 7:37-46

³⁷A laste dei fu a Sukotfesa na a moro bigi dei. A dei dati Yesus opo tnapu dan A bari taki: “Efu watra e kiri wan sma, meki a kon na Mi fu dringi!

³⁸A Santa Buku e taki: Liba fu watra di e gi libi, o lon kmoto inisei fu a sma di e bribi ini Mi.”

³⁹Di Yesus taki a sani dati, A ben e taki fu a Santa Yeye san den sma bo kisi di teki bribi ini En. Bika te leki a ten dati a Santa Yeye no ben kon ete, fu di Yesus no ben go na heimel ete.

⁴⁰Di den sma yere san Yesus taki, sonwan fu den taki: “Trutru, a man disi na a Profeiti!”

⁴¹Trawan taki: “Disi na a Mesias!” Trawan baka taki: “A Mesias no o kmoto fu Galilea.

⁴²Bika a Santa Buku e taki tak' a Mesias o de wan bakapikin fu David, èn A o kmoto fu Betlehem, a foto pe David ben e libi.”

⁴³Na so prati ben kon mindri den sma fu Yesus ede.

⁴⁴Sonwan fu den ben wani grabu En, ma no wan sma no fasi En.

⁴⁵Den waktiman drai go baka na den prenspari domri nanga den Fariseiman, dan den man dati aksi den taki: “Sanede un no tyari En kon?”

⁴⁶Den waktiman piki den taki: “Noiti ete wan man taki leki fa a man disi e taki.”