Yohanes 7:2-26

²Ma a ten fu den Dyu hori a Sukotfesa fu den, ben de krosbei.

³Dan den brada fu Yesus taigi En taki: “Yu mus kmopo dya go na Yudea, meki den sma fu Yu si den sani san Yu e du.

⁴Bika no wan sma e du wan sani kibrifasi, efu a wani fu sma kon sabi en. Efu Yu e du den sani disi, dan meki heri grontapu kon sabi Yu!”

⁵Den brada fu Yesus taki so, fu di den srefi no ben e bribi na ini En.

⁶Dan Yesus piki den taki: “Un kan go oten un wani, ma a yuru fu Mi no doro ete.

⁷Den sma fu grontapu no man mandi nanga unu. Ma Mi den no man si na ai, fu di Mi e taigi den tak' na ogri den e du.

⁸Un kan go na a fesa. Mi no e go, bika a yuru fu Mi no doro ete.”

⁹Di A taigi den dati, A tan na Galilea.

¹⁰Baka di den brada fu En go na a fesa, Yesus srefi go tu. Ma A go kibrifasi fu no wan sma sabi.

¹¹Den fesiman fu den Dyu ben e luku fu En tapu a fesa, èn den ben e aksi pe A de.

¹²Den furu sma di ben drape ben e taki saf'safri fu En. Sonwan ben e taki tak' Yesus na wan bun sma, ma trawan ben feni tak' na kori A e kori den sma.

¹³Ma no wan sma ben prefuru fu taki fu En meki ala sma yere, bika den ben frede den fesiman fu den Dyu.

¹⁴Di afu fu den dei fu a fesa ben psa kba, Yesus go na a mamakerki dan A bigin gi den sma leri.

¹⁵Den fesiman fu den Dyu ben ferwondru, èn den aksi taki: “Fa a Man disi du sabi someni sani sondro fu A kisi leri?”

¹⁶Yesus piki den taki: “Den sani di Mi e leri no kmoto fu Misrefi, ma fu a Wan di seni Mi kon.

¹⁷Efu wan sma wani du a wani fu Gado, dan a sa kon sabi efu a leri san Mi e gi, kmoto fu Gado noso efu Mi kon nanga Mi eigi leri.

¹⁸Efu wan sma kon nanga en eigi leri, a e suku grani gi ensrefi. Ma a sma di e suku grani gi a wan di seni en kon, de fu fertrow èn a no e lei.

¹⁹Moses ben gi unu a wèt, ma no wan fu unu e du san a wèt e taki. Fu sanede un wani kiri Mi?”

²⁰Den sma taigi En taki: “Suma wani kiri Yu? Na wan takruyeye Yu abi na Yu tapu!”

²¹Yesus piki den taki: “Mi du wan wondru nomo, dan un alamala ferwondru.

²²Luku, Moses ben taigi un tak' un mus besnei den boi fu unu. A sani disi no ben kmoto fu ensrefi, ma fu den afo fu wi. Dat' meki un e besnei, awinsi na wan sabadei.

²³Efu un e besnei tapu a sabadei fu no broko a wèt fu Moses, dan fu sanede un ati e bron na Mi tapu fu di Mi meki wan sma kon betre tapu a sabadei?

²⁴Un no mus krutu wan sma fu san un si, ma un mus krutu tapu wan leti fasi.”

²⁵Sonwan fu den sma fu Yerusalem aksi taki: “A no En na a man di den wani kiri?

²⁶Luku, A e gi leri na ala sma fesi, èn no wan sma e taigi En wan sani. Kande den edeman kon si now trutru tak' En na a Mesias.