Yohanes 5:24-46

²⁴Fu tru Mi e taigi un taki: A sma di arki san Mi e taki, èn di bribi ini a Wan di seni Mi kon, abi a libi fu têgo. A no sa kon ondro a krutu, ma a kmoto fu dede kon na libi.

²⁵Fu tru Mi e taigi un taki: A ten e kon èn a de kba, pe den dedewan o yere a sten fu a Manpikin fu Gado, èn den wan di yere en o libi.

²⁶Bika soleki fa a P'pa abi libi ini Ensrefi, na so A meki tak' a Manpikin abi libi ini Ensrefi tu.

²⁷A gi En makti tu fu krutu sma, bika En na a Manpikin fu Libisma.

²⁸Un no mus ferwondru fu a sani disi. Bika a ten e kon tak' ala den dedesma o yere En sten,

²⁹dan den o opo kmoto fu den grebi. Den sma di ben du bun, o opo baka fu kisi a libi fu têgo. Ma den sma di ben du ogri, o opo baka fu kisi strafu.

³⁰Mi no kan du noti fu Misrefi. Mi e krutu soleki fa Mi yere, èn Mi e krutu nanga leti, bika Mi no e suku fu du Mi eigi wani, ma fu du a wani fu a Wan di seni Mi kon.

³¹Efu Mi e taki fu Misrefi, a no abi warti.

³²Ma wan trawan de di e taki fu Mi, èn Mi sabi tak' san En e taki fu Mi tru.

³³Un ben seni aksi Yohanes èn a ben ferteri un san tru.

³⁴Mi no abi libisma fanowdu fu taki fu Mi, ma Mi e taki disi fu Gado kan ferlusu unu.

³⁵Yohanes ben de leki wan lampu di ben bron e gi faya, èn un ben prisiri fu wan pisten nanga a faya di a ben gi.

³⁶Ma sani de di prenspari moro leki den sani san Yohanes ben taki fu Mi. Dati na den wroko di a P'pa gi Mi fu du. Na den wroko dati Mi e du, èn den e sori tak' a P'pa seni Mi kon.

³⁷Èn a P'pa di seni Mi kon, na En ben taki fu Mi tu. Noiti un yere En sten èn noiti un si En.

³⁸A wortu fu En no e tan ini unu, fu di un no e bribi ini a Wan di A seni kon.

³⁹Un e ondrosuku Gadowortu, bika un e prakseri tak' na drape un o feni a libi fu têgo. A Wortu disi e taki fu Mi,

⁴⁰ma toku un no wani kon na Mi fu kisi a libi fu têgo.

⁴¹Mi no e suku grani fu libisma.

⁴²Ma Mi sabi fa un de. A lobi fu Gado no de ini unu.

⁴³Mi kon ini a nen fu Mi P'pa, ma un no wani Mi. Ma te wan tra sma kon ini en eigi nen, un o teki en.

⁴⁴Un e suku grani fu tra sma, ma un no e suku grani fu a wan enkri Gado. Fa un o man bribi dan?

⁴⁵Un no mus prakseri tak' Mi o tyari unu go krutu na a P'pa. Ma na Moses, a sma tapu san un poti un howpu, na en o krutu unu.

⁴⁶Efu un ben bribi Moses, un bo bribi Mi tu, bika a ben skrifi fu Mi.