Yohanes 20:2-18

²Mansanan makare, nde nande Simon Petrus muno Yesus apa arakovo anuga no ai rave yai, mare, “Injayo Yesus opamo vatane inta wo auguje aipapo rai to muno wamamo wamantatukambe irati augaveto raije rai.”

³Naije Petrusa pe, Yesus apa arakovo kai umawe pe ibesea yanya yurija yo Yesus apa aipapo raen.

⁴Yansanan kava, weramu Petrus maneai, yara arakovo kai umawe pavave rave, weti to nanto wusyimbe aipapo rai.

⁵Naije to benanto peravo aipapo ama uga raito vayave, peratoamo ansune vasye bo mi ntami.

⁶Umba Simon Petrus de nande dijabe, naije siso kobe no aipapo ama uga rai. Weti po ansune vasye veano Yesus akepan raen ntuna no min.

⁷Muno ansune vasye mamaun veano Yesus akari rakepan omamo raakuvi mumuimbe ti ntami nggwaravaimbe ansune vasye manakoe rai.

⁸Umba arakovo kai uma de wusyimbe to siso aipapo ama uga rai tavon, po raen ti panave.

⁹Arono naije Ayao Amisye ama urairi mo Yesus aura kovakato no wene rai ma nyanta rai rainya nene.

¹⁰Umba arakove umaso inyajiv no yavar.

¹¹Maria Magdalena ntet mararai no aipapo rai muno moyov. Umba mbenanto ti meravo aipapo ama uga raito.

¹²Mo naito Amisye jiruma yaen. Naite umaso aya ansune mpoper, onayamo itantuna no Yesus apa antuna rai we rai. Inta tuna no akari rai muno inta pamo tuna no ajo rai.

¹³Naite umaso yo Maria ranajo yare, “Akoe winy, mbeanimaibe nyoyov?” Naije mo raura akananto mare, “Risya Injayo Kurune pamo vatane wo augaveto ti aumandi muno syantatukambe wo augaveto raije rai.”

¹⁴Mayaowa jewen, naije nsakinav meravo rakiri akare rati, mo Yesus aeno te no naije. Weramu mantatukambe are pi so.

¹⁵Umba Yesus po raura nanto rai pare, “Akoe winy, mbeanimaibe nyoyov? Are pirati nyo akani?” Maria mo rakarae mare vemo vatano po nawaisye raeranande pa. Weti mo anajo mare, “Anui, winyirati nyo sya Injayo Kurun auguje, nyo augaveto nyo antuna no kaijinta rako? Syare nyo augaveto tuna no ruijamo ndaura indamu rito syo augav.”

¹⁶Yesus po apa ayao raura akananto rai pare, “Maria!” Maria nsakinav merav akananto no Yesusa nui, umba mo awain nanto ayao Yahudi rai mare, “Rabuni!” (ama ine mare Kurune).

¹⁷Yesus po raura nanto rai pare, “Vemo nyavakanande Rinai nora, weye syana to Injae ai rainya nene. Weramu syare nyoronto nyo Sya ayao so raura Risya arakove mansai, ndaura taiso nyare, ‘Syare iseo syakato no Sya Injae Amisye ai, wepirati weapa Injayo Amisye tavon.’ ”

¹⁸Weti Maria Magdalena moronto kobe, mo raura Apa arakove mansai mare, “Syo Injayo Yesus aeno inamije rai to!” Umba mo Apa ayao nami po raugaje raije raura kakavimbe mai tenambe.