Yohana 9:2-17

²Wanampina wamuza, “Mhinyi, ni yuhi adamanye masa, mntu yuno, hegu welesi wakwe vilekile elekwe tuntu?”

³Yesu ahitula, “Mbuli ino hailaile kwa chausa cha masa yakwe uyo, hegu masa ya welesi wakwe. Mna elekagwa tuntu chani ndima za Chohile ziwoneke zikadamanya ndima mndani mwakwe.

⁴Kuche nomsi chongigwa chijendeleze kudamanya ndima ya yudya anisigile. Kwaviya chilo cheza hadya mntu hadahe kudamanya ndima.

⁵Chipindi nichei mwe isi, miye ni ulangazi we isi.”

⁶Eze alonge ayo, niyo atwa mate hasi, adamanya ntagata, amhaka yudya tuntu mwa meso.

⁷Amgamba, “Hita ukahake mwe ndiwa ya Silowamu.” Silowamu kugamba ni asigilwe. Aho uyo tuntu niyo aita, akuhaka, akaheza auya akawona.

⁸Wantu we haguhi naye na wadya wammanyize kugamba aho nkongo nanimchiwa akulombeza, wagamba, “Togola, yuno suyo yudya mchiwa nakekala na kulombeza?”

⁹Wamwenga wawo wagamba, “Nuyo.” Mna wamwenga wagamba, “Suyo uyo, mna wata kufanana du.” Yudya endile tuntu agamba, “Ni miye!”

¹⁰Wamuza, “Haluse meso yako yafungulwa vivihi?”

¹¹Uyo naye awahitula, “Yudya mntu akwitangwa Yesu kadamanya ntagata, anihaka mwa meso, niyo anigamba nite nikahake mwe ndiwa ya Silowamu. Aho miye naita, nahaka, niyo nawona.”

¹²Wamuza, “Uyo ekuhi?” Awahitula, “Miye simanyize!”

¹³Akaheza wamwigala uyo mntu endaga tuntu kwa Mafalisayo.

¹⁴Zuwa idyo Yesu adamanye ntagata na kumfumbula ameso mntu uyo nendile ni zuwa dya Kuhumula.

¹⁵Mafalisayo niyo wamuza mntu uyo, “Kutenda vivihi niyo wawona?” Mntu uyo awagamba, “Kanihaka ntagata mwa meso, miye nami niyo nahaka haluse nawona.”

¹⁶Mafalisayo watuhu wagamba, “Mntu yuno adamanye ivyo halaile kwa Chohile, kwaviya hakutoza sigilizi ya zuwa dya Kuhumula.” Mna watuhu wagamba, “Mntu mta masa adaha vivihi kudamanya vilagiso savino?” Niyo kwatenda na mahigano mgati mwawo.

¹⁷Mafalisayo wamuza vituhu uyo mntu endaga tuntu, “Weye wamgaze mntu uyo akufumbule ameso yako?” Mntu uyo awagamba, “Mntu uyo ni muwoni!”