Yohana 9:1-15

¹Yesu apakiba akapeta ngammona mundu jumwe, jwangalola kuboka pabelekwa.

²Bai akinapunji ngabankonya, “Aboli, ngabeneke abatei mabaja jwombe mwene au amamundu na awamundu mpaka mundu ojo abelekwe jwangalola?”

³Yesu ngajanga, “Kile chene chapiti kwa magambu ga mabaja gakweje na wala mabaja ga akapotoi bakwe. Ila abelwike jwangalola ili makakala ga Nnoongo gabonekane gakakamu maengo nkati jakwe.

⁴Anda kubi tango nalumu tupaligwa kujendekea ukamwa maengo ga baba abandumite, maana kilo kitenda kuika peni mundu aotwaje ukamwa maengo.

⁵Mangobu mbi kudunia, ne nga lumuli lwa kudunia.”

⁶Kuboka pukulonge genia, Yesu ngauna mata pae, ngaunya mandope, ngampakaya jweno jwangalola mumio,

⁷ngannengela, “Nnyendi makakuye mulilaba lya Siloamu.” (Siloamu maana jakwe, “abatumigwe.”) Penia jweno jwangalola ngajenda, ngakuya, kubokapenia ngabuja abi akalola.

⁸Bai andamya ajabe na baba abakiba bumanyi jweno akiba nhwocho kijopajopa, ngabalenga, “Bo, ojo jwajoje nhwocho na kijopajopa?”

⁹Bange bandu ngabalenga, “Ujojo.” Bange ngabalenga, “Je, ila atekulandana.” Nambu jweno ojwaakabe jwangalola ngalenga, “Nga nenga!”

¹⁰Bai ngabankonya, “Lele, mio ginu gawekuka bo?”

¹¹Na jweno ngabajanga, “Jwajo mundu ojwakemigwa Yesu akatenda mandope, ngambakaya kumio na nganengela, ‘Nnyabu makakuye mulilaba lya Siloamu.’ Penia, ne nganyenda, nganguya, ngambata kulola.”

¹²Ngabankonya, “Jweno abikole?” Najweno ngabajanga, “Ne manyije!”

¹³Kubokapenia ngabampeleka mundu jweno ojwakiba jwangalola kwa Mafalisayo.

¹⁴Lichoba lyene Yesu apaunya mandope na kuweku mio mundu jweno, lyakiba Lichoba Lya Kupomolela.

¹⁵Bai Mafalisayo ngabankonya kabele mundu jweno, “Mpatitabo kulola?” Na jweno ngabalengela, “Ambakia mandope mumio, na ne nganguya na ngoe mbikulola.”