Yohana 8:29-43

²⁹Yudya anisigile ehamwenga na miye, uyo hanilekile ichedu kwaviya mazuwa yose nadamanya yadya yakumwelela.”

³⁰Eze alonge ayo wantu walozize niyo wamzumila.

³¹Yesu niyo awagamba wadya Wayahudi wamzumile, “Uneva mnayatoza mahinyo yangu, namtende wanampina wangu chindedindedi.

³²Ivyo nammanye chindedi, naho chindedi nachiwalekeileni.”

³³Wowo wamhitula, “Suwe ni welekwa wa Bulahimu, naho hachinati chitende watumwa wa mntu yoyose yudya. Ni mbwani ukugamba namlekeilwe?”

³⁴Yesu awahitula, “Nawagambilani chindedi, chila mntu yoyose akudamanya masa ni mtumwa ywa masa.

³⁵Mtumwa hana wikazi wa mnyumba mazuwa yose, mna Mwana ana wikazi wa mazuwa yoseni.

³⁶Uneva Mwana awalekeileni namtende mlekeilwa chindedi.

³⁷Simanya kugamba nyuwe mwi lukolo lwa Bulahimu. Mna mwaunga mnikome kwaviya hamnati kuzumila mahinyo yangu.

³⁸Miye nalonga yadya anisigile Tate, mna nyuwe mwadamanya yadya mgambilwe ni tati yenyu.”

³⁹Wowo wamhitula, “Suwe chi wana wa Bulahimu!” Yesu awagamba, “Uneva nyuwe mwendile wana wa Bulahimu namdamanya saviya adamanye Bulahimu.

⁴⁰Miye siwagambilani ichindedi nivile kwa Chohile, mna nyuwe mwaunga mnikome. Bulahimu hatendile ivyo!

⁴¹Nyuwe mwadamanya mbuli iziya adamanye tati yenyu.” Wowo niyo wamgamba, “Suwe hachi wana wa halamu! China Tati yetu yumwenga du nuyo Chohile.”

⁴²Yesu awagamba, “Uneva Chohile endile Tati yenyu chindedi, namkanunga miye, kwaviya miye nasilawa kwa Chohile haluse ni hano. Sizile kwa udahi wangu miye mwenye, mna kwa uyo anisigile.

⁴³Ni mbwani hammanyize ayo hulonga? Ni kwaviya hamkudaha kwetegeleza ulosi wangu.