YOHANA. 7:3-21

³avo wandugu zake Yesu wamulongela, “Segela hano uchole Yudea, giladi wanahina zako wazone sang'hano zuutenda.

⁴Haduhu munhu yofisa mbuli zoyotenda kamba yahalonda kutangigwa na wanhu. Kamba kotenda mbuli zino, uilaguse muulumwengu.”

⁵Kwavija hata wandugu zake hawamtogole.

⁶Yesu kawalongela, “Kipigiti changu kinogile hakinavika, ila vipigiti vose kumwenu mweye vinoga.

⁷Ulumwengu haudaha kuwehila mweye, ila wonihila nie, kwavija mazua gose noulongela kamba sang'hano zake ziha.

⁸Mweye gendeni kulusona. Nie sichola kuna ulusona, kwavija kipigiti changu kinogile hakinavikila.”

⁹Viyamambukize kugalonga gano, kagendelela kukala muiisi ya Galilaya.

¹⁰Wadodo zake viwacholile kulusona, Yesu na heyo kachola, ila hacholile mkuilagusa, ila mkuifisa.

¹¹Wakulu wa Wayahudi wakala womzahila kuja kulusona, wauza, “Ka kwahi?”

¹²Kukala na nyong'onyo bwando mwa wanhu womnyong'onya heyo. Wanhu wayagwe walonga, “Munhu ino kanoga,” wayagwe walonga, “Hanogile, kowagiza wanhu.”

¹³Ila haduhu yamulongile kinaganaga kwavija wakala wowadumba wakulu wa Wayahudi.

¹⁴Lusona vuluvikile mkindibwindibwi, Yesu kachola Kung'anda ya Mulungu na kusonga kufundiza.

¹⁵Wakulu wa Wayahudi wakanganya ng'hani walonga, “Munhu ino kozitangaze mbuli zino zose na kuno hafundizigwe na munhu yoyose?”

¹⁶Yesu kalonga, “Kinifundiza nie siyo mafundo gangu mwenyego, ila galawa ha Mulungu yanhumile.

¹⁷Munhu yoyose yosagula kugatenda gaja goyolonda Mulungu kovitanga kamba gano gonifundiza nie golawa ha Mulungu ama nolonga mbuli zangu mwenyego.

¹⁸Munhu yolonga mbuli zake mwenyego kozahila nhogolwa yake mwenyego. Ila munhu yosang'hanika sama ya nhogolwa ya ayo yamtumile iyo mwene ikweli, na mduhu dihile mgati yake.

¹⁹Musa hawagwelele Malagizo? Na haduhu hata munhu imwe mmwanza wenu yogazindilila Malagizo. Habali mulonda kunikoma?”

²⁰Waja wanhu walonga, “Gweye kuna Mwenembago! Yalihi yondakukukoma?”

²¹Yesu kawalongela, “Nitenda mzonza umwe, na mose msinhuka.