YOHANA. 6:43-54

⁴³Yesu kawedika, “Sambimtwanganike wenyego kwa wenyego.

⁴⁴Haduhu munhu yodaha kwiza kumwangu kamba hakwegigwe na Tataangu yanhumile nie, na nie nomzusa yawe mgima mdizua da ikimambukizo.

⁴⁵Wahokozi wandika, ‘Wanhu wose wofundizigwa na Mulungu.’ Munhu yoyose yomuhulika Tata na kuifundiza kumwake kokwiza kumwangu.

⁴⁶Haduhu munhu yamonile Tata, ila ayo yalawile ha Mulungu iyo yeiyeka yamonile Tata.

⁴⁷Nowalongela ikweli, ayo yondayatogole kana ugima wa digunge.

⁴⁸Nie iyo umkate wa ugima.

⁴⁹Wahenga zenu waja mana muluwala, ila wadanganhika.

⁵⁰Ila uno uwo mkate uhumuluka kulawa kuulanga, awo munhu youja hadanganhika.

⁵¹Nie iyo mkate uli na ugima uhumuluke kulawa kuulanga. Kamba munhu yoyose yahauja mkate uno, kowa na ugima wa digunge. Mkate wondanimgwelele uwo lukuli lwangu nilulava giladi ulumwengu uwe na ugima.”

⁵²Wayahudi wasonga kuibamilila ng'hani wenyego kwa wenyego wolonga, “Vodahikaze munhu ino yatugwelele lukuli lwake tuluje?”

⁵³Yesu kawalongela, “Nowalongela ikweli, kamba hamuludile lukuli lwa nie, Mwana wa Munhu, na kuung'wa mulopa wangu, mowa bule ugima mgati yenu.

⁵⁴Awo woja lukuli lwangu na kuung'wa mulopa wangu wana ugima wa digunge, na nowazusa wawe wagima mdizua da hakimambukizo.