YOHANA. 5:4-17

⁴Kwavija watogola kamba kuna kipigiti msenga wa Mndewa wa kuulanga kohumuluka mdibwawa na kugatibula gamazi. Na mtamu wa ichanduso kwingila mdibwawa kipigiti msenga wa Mulungu yehesha kugatibula, kohonyigwa utamu wose uyalinao.

⁵Haja kukala na munhu yakalile mtamu mmilao malongo madatu na minane.

⁶Yesu viyamonile munhu ija kawasa haja na viyavitangile kamba munhu ija kakala mtamu mkipigiti kitali, kamuuza, “Kolonda kuwa mgima?”

⁷Ija imtamu kamwidika, “Mndewa, nie nabule munhu hano wa kunigela mdibwawa kipigiti mazi gahatibuligwa. Nihalonda kwingila, munhu iyagwe konilongola.”

⁸Yesu kamulongela, “Ima wima, papa lusazi lwako utembele.”

⁹Bahaja ija imunhu kahona, kapapa lusazi lwake, kasonga kuchola. Mbuli ino ilawilila Mdizua da Mhumulo.

¹⁰Avo wakulu wa Wayahudi wamulongela ija imunhu yahonyigwe, “Lelo Zua da Mhumulo, malagizo getu gokugomesa gweye kupapa lusazi lwako.”

¹¹Na heyo kawalongela, “Ija munhu yanihonyile kanilongela, ‘Papa lusazi lwako uchole.’ ”

¹²Wamuuza, “Iyo munhu yalihi yakulongele upape lusazi lwako uchole?”

¹³Ila ija imunhu yahonyigwe kakala hamtangile kakala munhu yalihi, kwavija Yesu kakala yengile mdidale da wanhu dikalile haja.

¹⁴Mkipigiti kiguhi hamwande, Yesu kamvika ija imunhu Kuing'anda ya Mulungu, kamulongela, “Tegeleza, sambi kuhona, avo sambiutende vilozo kabili, ama vokulawilila vinhu viyagwe vihile ng'hani kubanza vino.”

¹⁵Abaho, ija imunhu kachola kuwalongela wakulu wa Wayahudi kamba Yesu iyo yamuhonyile.

¹⁶Avo wasonga kumgaza Yesu kwavija kahonya Mdizua da Mhumulo.

¹⁷Yesu kawalongela, “Tataangu kosang'hanika mazua gose, na nie vivija nosang'hanika.”