Yohana 5:30-47

³⁰“Heni siweza kudita cheng'ha chila, ndangutagusa kota vyonyuliche kwa Mhaza, na utaguso wa heni unoga, kwa vila silingudita vyondigana heni, ila vyoyogana heye Yanhumile.”

³¹“Wone ndichinojeza ndiliyeka, wanhu howokunda ago gondonjile kuta ndikomya.

³²Ila kabaho yumwe yolovya ulolezi wa heni, na heni ndivizela kuta geng'ha goyolonga kwa heni kakomya.

³³Hemwe na mlajiza usenga kwa Yohani na ulolezi wa heni yoyalonjile kakomya.

³⁴Heni silingitumbila ulolezi wa wanhu, ila ndagulonga mbuli zino leka mloholigwe.

³⁵Yohani nayali kota chenje chikwaka na kumulika na hemwe namwimilila kusechelela alo lumuli kwa mhela udo.

³⁶Ila heni ndangilavila ulolezi kwa mbuli ya heni loyali mkulu ng'hatu kusinda ula wa Yohani. Kwa vila mbuli zondilingukola, mbuli zoyamhele Mhaza ndite, azo zangulajila kota Mhaza ndo yanhumile.

³⁷Na heye Mhaza yanhumile kangulavya ulolezi. Hemwe hamnahulika lizi lya heye, ne kumona kumeho.

³⁸Usenga wa hemwe haulingikala mgati mwa hemwe mina mlema kumkunda yula yanhumile.

³⁹Hemwe mgalolaga goya Maandiko Matakatifu mchijesa kota mgati mwake mopata ukomu wa mazuwa gose ne kuduma, na aku Gandichigwe gago gangulavya ulolezi wa mbuli za heni.

⁴⁰Lelo hemwe mwangulema kuwa kwa heni leka muwe na ukomu.

⁴¹“Silingupala kutogoligwa na munhu.

⁴²Ila nandiwazela hemwe, ndivizela kota hemwe hamlingumgana Nguluwi.

⁴³Heni mbuya kwa ludali lwa Mhaza wa heni, ila hambochele. Ila munhu yunji loyokuya kwa ludali lwake, mombochela.

⁴⁴Mokunda ndaze hanga hemwe mwangugana kutogoligwa hemwe kwa hemwe baho, na hamlingupala kutogoligwa na heye yawele yeka Nguluwi?

⁴⁵Mleche kijesa kota heni ndoyowalonjeleza kwa Mhaza. Musa yomlingitumbila ndo yowalonjeleza.

⁴⁶Wone na muwe mumkundile ng'hatu Musa, mwahang'hundile heni kahi, kwa vila Musa nakandika mbuli za heni.

⁴⁷Wone hamlingukunda gala goyandiche Musa, hambi mokunda ndaze ulonzi wa heni?”