YOHANA. 5:29-41

²⁹na kulawa hanze ya igamapanga, awo watendile ganogile wozuka giladi wagweleligwe ugima wa digunge, na awo watendile gehile wozuka giladi wakehigwe.

³⁰“Nie sidaha kutenda kinhu chochose nene mwenyego, notagusa kamba vinihulika. Nhaguso yangu yabule uzenzeleganye, kwavija sizahila kuinogeza mwenyego ila kumnogeza ayo yanhumile.

³¹“Kamba nihaisindila mwenyego, usindila wangu hautogoligwa kamba kweli.

³²Ila hana munhu iyagwe yonisindila nie, na munhu hiyo iyo Yohana, na nie nivitanga kamba gaja goyolonga gotogoligwa kamba kweli.

³³Muwatuma wasenga zenu ha Yohana, na heyo kawalongela ikweli yose.

³⁴Nie silonda usindila kulawa mwa wanhu, ila nilonga gano giladi mkomboligwe.

³⁵Yohana kakala kamba kiwenge kilukula na kulava mulangaza, na mweye mulonda kudeng'helela mulangaza wake mkipigiti kiguhi.

³⁶Ila nie nna usindila mkulu ng'hani kubanza usindila yaawagwelele Yohana. Kwavija sang'hano ino initenda yaangwelele Tata niimambukize, ino inigendelela kuitenda, yolagusa kamba Tata iyo yanhumile.

³⁷Tataangu yanhumile vivija mwenyego kasindila sama yangu. Hamdihulike dizwi jake ama kuchona kiwiliwili chake,

³⁸na hamzikile mbuli zake mmioyo yenu, kwavija hamumtogole ayo iyamtumile.

³⁹Mozihimbula ng'hani Nyandiko Zing'alile, kwavija mokwagiza kamba mkutenda vino mokwing'higwa ugima wa digunge. Na Nyandiko Zing'alile zimuhimbula zizo zinilonga nie!

⁴⁰Hata avo hamulonda kwiza kumwangu giladi mpate ugima.

⁴¹“Nie sizizahila nhogolwa kulawa mwa wanhu.