YOHANA. 4:43-53

⁴³Vigabitile mazua mabili, Yesu kasegela haja kachola kuisi ya Galilaya.

⁴⁴Kwavija heyo mwenyego kalonga, “Muhokozi hahishimilwa muisi yake mwenyego.”

⁴⁵Viyavikile Galilaya wanhu wa haja wam'bokela, kwavija wavona vinhu vose viyatendile Yelusalemu, kipigiti cha Ulusona lwa Pasaka, kwavija na hewo wakala wacholile kuna ulusona.

⁴⁶Abaho, Yesu kabweleganya kuna ikiwambo cha Kana muisi ya Galilaya, ako kuyagalule mazi kuwa divai. Haja kukala na mkulu imwe wa silikali yakalile na mwanage mtamu ako Kapenaumu.

⁴⁷Viyahulike kamba Yesu keza kulawa Yudea kwiza Galilaya, kamgendela na kumuyalalila yachole Kapenaumu yakamuhonye mwanage yakalile behi na kudanganhika.

⁴⁸Yesu kamulongela, “Kamba hamonile vilaguso na mikanganyo hamtogola.”

⁴⁹Ija imkulu wa silikali kamulongela, “Mndewa, izo kipigiti mwanangu hanadanganhika.”

⁵⁰Yesu kamulongela, “Genda ukae yako, na mwanago kohona.” Ija imkulu wa silikali kazitogola mbuli za Yesu, avo kachola.

⁵¹Viyakalile yobwela ukae, mnzila kaiting'hana na nyakadala zake, wamulongela, “Mwanago kahona.”

⁵²Kawauza kipigiti kilihi mwanage chayahonile, wamulongela, “Ikala saa saba imisi mayo homa imsegela.”

⁵³Avo ija tata wa imwana kakumbukila kamba kikala kipigiti kikija Yesu chayamulongele, “Mwanago kohona.” Avo heyo na mulango wake wose wamtogola Yesu.