Yohana 4:31-41

³¹Mhela wuwo walanguswa wali womdedeza Yesu, “Mlangusa, ulye chilyo.”

³²Ila heye nakawedichila, “Ndina chilyo cha kulya cho hamchizelele hebu.”

³³Walanguswa nawaluka kiwuza hewo waliyeka, “Hambi kwali na munhu yamigalile chilyo?”

³⁴Yesu nakawalonjela, “Chilyo cha heni chowa kudita vyoyaganile heye yanhumile na kukola mbuli zoyalajize.

³⁵Vyomzowele kulonga, ‘Jinghali myezi jine hela mhela wa mbena.’ Ila ndangukulonjelani mlole goya kuli migunda, vilyo vikangala goya kubenigwa.

³⁶Ayula yokola mijito ya mbena, kowa yopegwa sendi, na kukungajiza chilyo kuli ukomu wa mazuwa gose ne kuduma, yumwe yonyala na yumwe yobena, weng'ha wowa wosechelela hamwe.

³⁷Kwa vila ulonzi awu ukomya, yumwe konyala na yumwe kobena.

³⁸Ndiwalajiza hemwe mkabene kuli migunda johamkolile mijito, wanji wochitunya hala na hemwe mohola hela.”

³⁹Wasamaliya kuli muji ula nawamkunda Yesu kota ayula mdala vyoyawalonjele, “Kandonjela geng'ha gonditile.”

⁴⁰Wasamaliya vyowoyile kwa Yesu, nawamdedeza yekale na hewo. Yesu kekala na hewo mazuwa meli.

⁴¹Wanhu wenji ng'hatu nawakunda kwa mbuli ya usenga wa Yesu.