Yohana 4:28-54

²⁸Uyo mvyele niyo asa idibiga dyakwe hadya, aita komzi na kuwagambila wantu,

²⁹“Soni mkamwone mntu anigambile mbuli zose nidamanye. Vyadahika kutenda nuyo Kulisito?”

³⁰Ivyo wantu walawa umzi na kwita kwa Yesu.

³¹Ichipindi icho wanampina wakwe nawakamhembeleza Yesu, “Mhinyi, udye chochose!”

³²Mna Yesu awahitula, “Nina nkande nyuwe hemwimanyize.”

³³Ivyo wanampina wakwe wauzana, “Vyadahika kuna mntu amwigaile nkande?”

³⁴Yesu awagamba, “Nkande yangu ni kudamanya yadya akunga yudya anisigile, na kubindiliza ndima yakwe anisigile.

³⁵Mna lusimo lukugamba, ‘Isigala myezi mine, chikutimila nu uvuni.’ Mna nawagambilani, kaulani izinkonde zaungwa zivunwe!

³⁶Mvuni alihwa naho achisanya nkande kwa ujima wa mazuwa yose, ivyo mtuhu akuhanda na yudya akuvuna nawelelwe hamwenga.

³⁷Lusimo ulo ni chindedi, ‘Yumwenga ahanda mtuhu avuna.’

³⁸Siwasigilani mkavune mwe nkonde hamwidamanyize ndima, watuhu na wadamanya ndima hano, nyuwe mwahokela mwe ndima yawo.”

³⁹Wasamaliya walozize we kaya idya wamzumila Yesu kwaviya yudya mvyele amukwilaga, “Kanigambila zose nidamanye.”

⁴⁰Ivyo umo Wasamaliya wambwile Yesu wamlombeza ekala nawo. Yesu niyo ekala aho mazuwa maidi.

⁴¹Wantu walozize niyo wazumila kwa ulosi wa Yesu,

⁴²wamgamba yudya mvyele, “Haluse hachizumile, siyo kwaviya walongaga, mna kwaviya chimwiva wenye, naho chivimanya kugamba nuyo chindedi Mwambula ywa wantu we isi.”

⁴³Yesu eze abinde mazuwa maidi, niyo aita Galilaya,

⁴⁴kwaviya Yesu mwenye aukulaga, “Muwoni hakutunywa kwe isi yakwe.”

⁴⁵Eze abule Galilaya, wantu walozize wa uko wamhokela kwaviya wawonaga yose adamanyaga umo waitile Yelusalemu kwe nkande ye Pasaka.

⁴⁶Yesu niyo auya mo mzi wa Kana uko Galilaya, uko ahitule mazi yakatenda divai. Kwendaga na mkulu yumwenga ywa selikali endaga na mwanawe mnyonje uko Kapelinaumu.

⁴⁷Eze eve kugamba Yesu kakulawa Yudeya kabula Galilaya, kamwitila na kumlombeza aite akamhonye mwanawe wa chilume endaga mnyonje wa kubanika.

⁴⁸Yesu amgamba, “Nyuwe hamnawone mpituko na vilagiso hamzumile.”

⁴⁹Mkulu uyo ahitula, “Zumbe, chitanye mwanangu hanati abanike.”

⁵⁰Yesu amgamba, “Jenda, mwanawo natende na ujima!” Uyo mntu niyo azumila ulosi wa Yesu, niyo ahalawa.

⁵¹Achei mwe sila wandima wakwe wadugana naye, wamgamba, “Mwanawo kahona!”

⁵²Awauza isa umwana ahonile, nawo wamhitula, “Gulo saa mfungate nomsi, unyonje umlekela.”

⁵³Niyo akumbuka nendile nidya isa Yesu amgambile, “Mwanawo nahone.” Ivyo yeye hamwenga na wantu mwe nyumba yakwe wose niyo wazumila.

⁵⁴Chino ni chilagiso cha kaidi adamanyaga Yesu eze auye kulaila Galilaya kubula Yudeya.