Yohana 4:27-51

²⁷Penia akinapunji bakwe ngababuja, ngabaomongwa kummona akalongela numunkege. Nambu akibaje mundu ojwankonyite munkege, kutenda, “Mpala nike pamba?” Wala Yesu bankonyiteje kulenga, “Mbone nnonge numunkege?”

²⁸Munkege jwenio ngakileka kiulo chakwe ngajenda kunyini kalenge bandu,

²⁹Ngajemba chamila kulenga “Nhwikange mmoa makammone mundu ojwanengi ile yango yoa eindendite! Bo, jwenio aotwi kube Kilisto?”

³⁰Bandu ngababoka kunyini, ngabannyendele Yesu.

³¹Kingobucho akinapunji bakwe ngabannenge Yesu kulenga, “Aboli, nnieoti chakulya!”

³²Nambu Yesu ngabalenge, “Ne ngweti chakulya changikimanya mangweto.”

³³Akinapunji bakwe ngabakonyana, “Bo, abimundu ojubaleti chakulya?”

³⁴Yesu ngabalenge, “Chakulya chango, kugakamwa gabapala abatuite nyomole maengo gabe.

³⁵Mangweto nnengalenga, ‘jiigi myei nchechetu mauno magaika!’ Nambu ne nannenge, nnolanga migonda jibi tayali kuunigwa!

³⁶Nhwuni mapata lipungu lyakwe, na akongo mauno ga bwomi gwa machoba goa pangapela, iba mpandi na nhwuni baalala mojo pamwe.

³⁷Kilonge chenje chakweli jonge kupanda na jonge kuuna.

³⁸Nenga nantumangite makaunange ilyo yangapiyanga liyuke. Bandu bange bakamwi liengo, nambu mangweto mukikonjanga kuboke muliuke lyaabe.”

³⁹Akasamalia ajingi bi kijiji chenie ngubunhwamini Yesu magambu ga malobe gachalakicha munkege jwenio, kukulenga, “Annengi itendwa yoa eindendite.”

⁴⁰Akasamalia ngabannyendele Yesu ngabanyopa atame nabo, na jwenio ngatama penia machoba mabele.

⁴¹Bandu ajingi muno ngabaamini magambu ga nhwalo gwakwe.

⁴²Ngabalenge amama benia, “Twenga tuamini magambo ga lilobe linutuje, twetubene tujoine, na tumanyi jwenio nga kweli Nkomboi jwa dunia.”

⁴³Kuboka pa machoba mabele Yesu ngaboka penia, ngajenda kukilambo cha Ku Galilaya.

⁴⁴Yesu mwene ngachalakicha kulenga, “Nnondoli kupataje ichima kukilambo chakwe mwene, nambu kuyenge ilaambo kupata ichima.”

⁴⁵Bai paika kukilambo cha Ku Galilaya, Akagalilaya ajingi ngabampokela. Magambu angweto uyo bakibanga kumpapala gwa Pasaka, ngibibona ikobo yowa yatenda Kuyelusalemu kingobu cha kusikukuu jenie.

⁴⁶Yesu ngaika kabele kukilambo cha Kana, kunkoa gwa Ku Galilaya, paali pa galambuya maache kube divai. Penia kilongoi jumwe jwa chilikali akiba na mwana ntamwe okwo ku Kafalanaumu.

⁴⁷Bai jweno ofisa apajoa Yesu akiba abokite Kuyudea nukujenda Ku Galilaya, ngannyendela nukunyopa ajende kunnamia mwana jwakwe ojwabi ntamwe lola.

⁴⁸Yesu ngannengela, “Pangibona iingi yi ikobo nu gukuomongwa miaminije!”

⁴⁹Kilongoi jweno ngabalengela, “Angwana, chonde tujende tango manango nukujomokaje.”

⁵⁰Yesu ngannengela, “Nyabulage, mwanajwinu malama!” Mundu jweno ngaamini malobe ga Yesu, ngajabula.

⁵¹Apakiba undela, ngakongana na akabanda bakwe, ngabannengela, “Mwana jwinu alamite!”