Yohana 4:12-54

¹²Wèe tolɛ Yakuba wʼa ke keeŋɛ ke kan wèe mu. Wuyɛ pyaa, ni wu nagoo, ni wu yapɔrɔyɔ yi bi kee lɔhɔ gbuu. Ayiwa, mu wa giin na mu ya ye wèe tolɛ Yakuba na gɛ?»

¹³A Yesu di wu ɲɔ shɔ na: «Wa bɛɛri wʼa ke keeŋɛ ke lɔhɔ gba ge, waga na ba weefɔɔ ta sanha.

¹⁴Ga lɔhɔ ke nɛ gaan ge, wa bɛɛri wʼa kee gba ge, waga da ba weefɔɔ ta nige bada wɛ. Bani lɔhɔ ke nʼa da gan weefɔɔ mu ge, kee na ba bye lobulowii na buloo na foro wu funŋɔ ni, na ɲìi sicuumɔ nixhɔbaama kan wu mu.»

¹⁵A cee wu Yesu pye: «Karamɔgɔna we, kee lɔhɔ ki kan na mu di gba, kɔnhɔ waga ganha bu na ta nige, di ba lɔhɔ shaa naha sanha wɛ.»

¹⁶A Yesu di wu pye: «Shɛ ma poo wu yiri pa naha.»

¹⁷A wu Yesu pye: «Ná wa na mu wɛ.» A Yesu di wu pye: «Can mʼa jo na ná ɲɛ ma mu wɛ.

¹⁸Bani mʼa jé xɔ namaa kaguro mu. Ná wemu bɛ wʼa jé ma mu nimɛ ge, wee bɛ wa ma poo wɛ. Can mʼa jo.»

¹⁹A cee wu wu pye: «Karamɔgɔna we, nɛ mu sɛɛri na mu ta Kilɛ tudunmɔ.

²⁰Wèe Samari shɛɛn, ke faaboboŋɔ ke na wèe sefɛlɛɛ ya Kilɛ pɛlɛ. Ga yee Yawutuu di yu na tapɛɛŋɛ katii wa Kilɛ na ni Zheruzalɛmu bɛ wɛ.»

²¹A Yesu di wu ɲɔ shɔ na: «Dà na na! Caŋa ka wa ma, yʼa da ba To Kilɛ pɛlɛ ke faaboboŋɔ ke na wɛ, kelee Zheruzalɛmu bɛ ni wɛ.

²²Wemu yee Samari shɛɛn ya bɛlɛ ge, yee ya wu cɛ wɛ, ga wemu wèe Yawutuu ya bɛlɛ ge, wèe ya wu cɛ, bani wèe Yawutuu ni Shɔvɔɔ wʼà foro.

²³Ga caŋa ka wa ma, kee ya nɔ xɔ. Piimu pʼa To Kilɛ pɛlɛ see na ge, pee na ba wu pɛlɛ munaa baraga ni, lee lemu lʼa can wu shɛɛ ge. Bani piimu pʼa kee pɛɛŋɛ ki tuugo pyi ge, pee To Kilɛ ya zhaa.

²⁴Kilɛ ɲɛ Munaa. Piimu pʼa wu pɛlɛ ge, li waha lʼi waha, pee ya yaa na wu pɛlɛ munaa baraga ni, lee lemu lʼa can wu shɛɛ ge.»

²⁵A cee wu wu pye: «Nɛ li cɛ jo Shɔvɔɔ wu na ba ba, (lee kɔ́ri ɲɛ ‹Kilɛ ya wemu shɔɔnri lɔ ge.›) Wee ba ba tuun wemu ni, wu na ba keree ki bɛɛri ɲaha jo wèe mu.»

²⁶A Yesu di cee wu pye: «Nɛ wemu wʼa yu ni mu ni ge, nɛ wu ɲɛ wii.»

²⁷Na Yesu ni cee wu yaha pee jomɔ pu na, a kalaapiire tʼi ba na yìri yalige ki tashɔgɔ ni. Ba pee ya pa Yesu ta wu na yu ni cee wu ni wɛ, a lʼi pu ɲaha wɔ. Ga wa shishiin ya sɔɔ na wu pye: «Ɲaha kaa mʼa yegee cee wu mu wɛ?» kelee «Ɲaha na mʼa yu ni wu ni wɛ?»

²⁸A cee wu kunni di wu lokoyaaga ki yaha keeŋɛ ki na, na guri kari kanha ki funŋɔ ni, na shɛ sipyii pu pye:

²⁹«Yi pa ná wa wii, wʼa nɛ kapyelɛgɛɛ bɛɛri jo nɛ mu. Kɔnhɔ wee di ɲɛ Shɔvɔɔ we-e dɛ?»

³⁰A sipyii pʼi yìri kanha ki funŋɔ ni na pa Yesu yíri.

³¹Lee bi kalaapiire ti ta tʼa Yesu ɲɛɛri na: «Wù Karamɔgɔ, ɲɔ mayɛ na, mʼa ganha li ba.»

³²Ga, a wu pu ɲɔ shɔ na: «Yalige ka wa nɛ mu na li, yee di wa kee cɛ wɛ.»

³³A kalaapiire tʼi ganha na tiyɛ yegee na: «Ba kɔnhɔ wa wʼa pa yalige ka kan wu mu wɛ?»

³⁴A Yesu di pu pye: «We wʼa nɛ tun ge, nɛ na wee ɲidaan pyi; kapyeŋɛɛ kii wʼa kan nɛ mu ge, na kee bɛ ɲɔ fa, lee ɲɛ ɲɔ yalige yaaga nɛ mu.»

³⁵Lee kadugo na a Yesu di pu pye: «Ta yee kunni ma yu we tuun we ni, na yeye shishɛɛrɛ wu ɲɛ wèe ni yalɔɔrɔ ti tɛ ni wɛ? Ga nʼa da yi jo yi mu, ‹Yi kɛrɛyɛ yi wii xuuni!› Shinma wʼa lɛ, wu kɔnduun wʼa nɔ xɔ.

³⁶Wemu wʼa shinma wu kɔɔn ge, wee ya wu saraa taa na xɔ; wʼa shinma pya wu pinnɛ yaha ɲìi sicuumɔ nixhɔbaama pu wuu na. Lee pyegana li na, shinma nuguvɔɔ we ni wu kɔnvɔɔ we, pu shuun wu bɛɛri na fundanga ta shiizhan.

³⁷Bani talenɛ lemu lʼa yu na: ‹Wa na ba yemɛ nugi, watii na ba wee shinma wu kɔn ge,› lee ɲɛ can.

³⁸Yee ya tɛgɛ kemu nugi wɛ, nɛ yee tun yee pu shɛ kee shinma kɔn. Piitiilee pʼa kee pye, a yee di kuduun ta pee wo kapyeŋɛɛ ki ni.»

³⁹A Samari shɛɛn niɲɛhɛmɛɛ di dà Yesu na le kulo le ni cee wu wo kafila wu wuu na. Bani cee wʼa pu pye: «Wʼa nɛ kapyelɛgɛɛ bɛɛri jo nɛ mu.»

⁴⁰Lee wuu na a Samari shɛɛn pʼi yìri kanha ki funŋɔ ni na shɛ Yesu yíri. Ba pʼa nɔ wà wɛ, na Yesu ɲɛɛri na wu tiin pu yíri. A wu sɔɔ na cabyaa shuun pye pu yíri.

⁴¹Yesu ya cabyaa shuun wemu pye lee kulo li ni ge, a sipyiɲɛhɛmɛɛ piitiilee di dà wu na sanha wu kafila wu wuu na.

⁴²A pee di cee wu pye: «Wèe ya ta dà wu na mu wo jomɔ pu yɛ wuu na-ɛ dɛ. Ga wèeyɛ pyaa ya wu jomɔ pu logo, a wèe di li cɛ can na na wee wu ɲɛ koŋɔ ki Shɔvɔɔ wuyɛ pyaa.»

⁴³Ba kee cabyaa shuun wʼa toro wɛ, a Yesu ni wu kalaapiire tʼi foro Sikari kolo li ni na kari Galile fiige ki ni.

⁴⁴Yesu yɛ pyaa bi jo na: «Kilɛ tudunmɔ wa shishiin ya pɛɛŋɛ taa wu to kulo ni wɛ.»

⁴⁵Ga, ba pʼa nɔ Galile fiige ki ni wɛ, a Galile shɛɛn di pu ɲuŋɔ círi ni fundanga ni. Bani Yesu bi keree kiimu bɛɛri pye Zheruzalɛmu ni Yawutuu Ɲuwuuro ti wo Kalenɛ li ni ge, Galile shɛɛn pu bi kee bɛɛri ɲa, bani puyɛ pyaa bɛ bi shɛ lee kalenɛ li ni.

⁴⁶Wee tuun wu ni a Yesu di guri pa sanha Kana kulo li ni, Galile fiige ki ni. Wee xuu wu ni wʼa bi lɔhɔ ki ɲɛri na pye duvɛn. Lee bi fiige ki sipyigbɔ wa ta Kapɛrinɔmɔ kulo li ni; wee ja bi cuuŋɔ wɛ.

⁴⁷Ba wee ná wʼa logo na Yesu ya yìri Zhude ni na pa Galile ni wɛ, a wu gari wu yíri, na shɛ wu ɲɛɛri na wu pa Kapɛrinɔmɔ ni, na wee ja wʼa taxuyo shaa, wu shɛ wu cuuŋɔ.

⁴⁸A Yesu di wee ná wu pye: «Ta le yahagana le na yee wa da yiyɛ yaha gɛ? Yee ya ɲaha shɛshɛɛrɛ kakanhaŋaa ni kagbɔhɔɔ ɲa wɛ, yee da ga dà bada wɛ.»

⁴⁹Ga, a wee ná wu Yesu pye: «Karamɔgɔna we, ɲɔ mayɛ na mʼa ba nimɛ, kɔnhɔ wù ja wu ganha bu xhu wɛ.»

⁵⁰Wee tuun wu ni a Yesu di wu pye: «Kuri mʼa gaaŋi ma ja wʼa cuuŋɔ.» A wee ná wu dà Yesu kafila wu na, na guri kari.

⁵¹Ba wʼa kuri na gaaŋi wɛ, a wu kapyebyii pʼi shɛ wu ɲuŋɔ círi koo li na, na wu pye: «Ma ja wʼa cuuŋɔ.»

⁵²A wu pu yege na tuun wekɛ ni wu dʼa cuuŋɔ wɛ? A pʼi jo na taɲaa ceefuuro tʼa wu yaha na caŋa ki yaha kʼa fiin (13h00).

⁵³Taapile ni a pya wu to wu li cɛ na wee tuun wu ninumɔ ni Yesu ya wee pye: «Ma ja wʼa cuuŋɔ.» A wee ná wu ni wu puga shɛɛn bɛɛri di dà Yesu na.

⁵⁴Ayiwa, ba Yesu ya foro Zhude fiige ki ni na kuri Galile fiige ki ni wɛ, le lʼa pye wu ɲaha shɛshɛɛrɛ kakanhana shuun wuu.