YOHANA. 21:4-19

⁴Imitondo ng'hani, Yesu kema mulugigo lwa igamazi, ila wanahina zake hawamtangile kamba kakala heyo.

⁵Kawauza, “wambwiga zangu, muna somba?” Walonga, “Twabule.”

⁶Kawalongela, “Tandeni nhando yenu ng'ambu ya ukulume ya ingalawa, na mokonza.” Avo waitanda inhando na hawadahile kuikwega waibweze mngalawa, kwavija wawonza somba bwando.

⁷Ija imwanahina Yesu iyamnogele kamulongela Petulo, “Kumbe Mndewa!” Petulo viyahulike kumbe Mndewa, kaizinga mkigudi kivalo chake cha kuigubika, na kuzumha mmazi, kwavija kakala yavulile vivalo vake.

⁸Wanahina wayagwe weza kuingalawa na kuikwekwesa inhando imemile somba, kwavija hawakalile kutali kulawa muisi inyalile, ikala kamba meta mia.

⁹Viwavikile muisi inyalile, wona moto wa misizi, uchana yake kukala somba na mkate.

¹⁰Abaho, Yesu kawalongela, “Ngalileni somba kidogo wumonzile sambisambi.”

¹¹Simoni Petulo kachola mngalawa na kuibululila kunyalile inhando imemile somba wakulu mia imwe na malongo matano na wadatu. Wakala somba bwando hata avo inhando haidegeke.

¹²Yesu kawalongela, “Izoni mje.” Haduhu hata mwanahina imwe yagezile kumuuza, “Gweye iyo yalihi?” kwavija wavitanga kamba kakala Mndewa.

¹³Avo Yesu kachola kasola umkate na kuwagwelela, abaho, katenda vivija na isomba.

¹⁴Uno ukala mwanza wa ikadatu Yesu kuwalawilila wanahina zake songela hayazukile.

¹⁵Viweshile kuja, Yesu kamulongela Simoni Petulo, “Simoni, mwana wa Yohana, koninogela nie kubanza wano wayagwe viwoninogela?” Kamwidika, “Ona, Mndewa, gweye kuvitanga kamba nokunogela.” Yesu kamulongela, “Wagwelele mandia ng'hondolo zangu.”

¹⁶Yesu kamulongela mwanza wa ikabili, “Simoni, mwana wa Yohana, koninogela nie?” Kamwidika, “Ona, Mndewa, gweye kuvitanga kamba nie nokunogela.” Yesu kamulongela, “Imiliza ng'hondolo zangu.”

¹⁷Yesu kalonga mwanza wa ikadatu, “Simoni, mwana wa Yohana, koninogela?” Petulo kona giogio avija Yesu viyamuuzile mwanza wa ikadatu, “Koninogela?” Avo kamulongela Yesu, “Mndewa, gweye kugamanya gose. Na kuvimanya kamba nokunogela!” Yesu kamulongela, “Wagwelele mandia ng'hondolo zangu.

¹⁸Nokulongela ikweli, vuukalile mmhale, kukala ukiifunga mkwiji na kuchola kokose kuulondile kuchola. Ila uhalala, koigolosa makono gako na munhu iyagwe kokufunga na kukusola yakugale hanhu hukulondile kuchola.”

¹⁹Mkulonga gano, Yesu kalagusa ifa ilihi Petulo yondayafe na yondaimgalile yenzi Mulungu. Abaho, kamulongela, “Nikweleleze.”