Yohana 21:3-25

³Simoni Petulo awagamba, “Nakulowa samaki.” Nawo wamgamba, “Suwe naswi chaitanya na weye.” Niyo waita, wakukwela ngalawa, mna nechilo icho hawapatile chochose.

⁴Kwize kukonge kucha, Yesu nakachimala mpezo mwe diziwa, mna wanampina hawamanyize kugamba ni Yesu.

⁵Yesu awauza, “Wabwanga, hamnati mpate samaki?” Wowo wamhitula, “Bule! Hachinati kupata chintu.”

⁶Yesu awagamba, “Dulani ulwavu ntendele ya kulume ye ngalawa, nanywi namlowe samaki.” Wadula ulwavu, mna hawadahile kuluvuta vituhu kwaviya samaki nazilozesa.

⁷Aho yudya mwanampina aungiswe ni Yesu amgamba Petulo, “Ni Zumbe!” Simoni Petulo eze eve kugamba mntu yudya ni Zumbe, ahadya evika suche yakwe, kwaviya nahavikile niyo apilikila mwa mazi.

⁸Wadya wanampina watuhu naweza na ngalawa kuno wakalukwesa ulwavu lumemile izisamaki. Naho nendile hawehale na kwe isi kunyaile, nazikabula nkacho gana kulaila kudya kunyaile.

⁹Weze wabule kunyaile, wawona nkala za moto ujimbigwe, mlanga mwakwe mwikwa samaki na mgate.

¹⁰Yesu awagamba, “Zileteni hano izisamaki izimwenga mlowile.”

¹¹Simoni Petulo akwela mwe ngalawa, akweseza kunyaile ludya ulwavu lumemile izisamaki nkulu gana na milongo mishano na ntatu. Samaki nazilozesa, mna ulwavu halukantike.

¹²Yesu awagamba, “Soni mdye.” Hahana hata mwanampina ajezize kumuza, “Weye wi yuhi?” Kwaviya nawavimanya ni Zumbe.

¹³Yesu eza, aguha mgate awenka akajika aguha samaki naho awenka.

¹⁴Iyo yendaga nkanana ya katatu Yesu kuwalaila wanampina wakwe eze auyuke.

¹⁵Weze wajike ukudya, Yesu amuza Simoni Petulo, “Simoni mwana ywa Yohana! Togola, wanunga miye kujinka wano?” Naye amhitula, “Heye Zumbe, weye kuvimanya kugamba miye nakunga.” Yesu amgamba, “Lisa ngoto zangu.”

¹⁶Akaheza amgamba nkanana ya kaidi, “Simoni mwana ywa Yohana! Togola, wanunga?” Petulo amhitula, “Heye Zumbe, kuvimanya nakunga.” Yesu amgamba, “Dima izingoto zangu.”

¹⁷Yesu amuza nkanana ya katatu, “Simoni mwana ywa Yohana! Togola, wanunga?” Aho Petulo kengilwa ni chinyulu kwaviya kamuza nkanana ntatu, “Wanunga?” Niyo amgamba, “Zumbe, weye kumanya yose. Weye kuvimanya kugamba miye nakunga.” Yesu amgamba, “Lisa izingoto zangu!

¹⁸Nakugambila chindedi, hadya wendaga wi mbwanga nakuzwela kwevisa mwenye na kwita kokose ukunga. Mna aho ukunga udalahaile, nochumize mikono yako na mntu mtuhu nakuvike na kukwigala hwikunga.”

¹⁹Kwa kulonga ivyo, Yesu nakalagisa viya Petulo akunga abanike nakwigala ntunyo kwa Chohile. Akaheza amgamba, “Nitimila.”

²⁰Aho Petulo eze ahituke, amwona yudya mwanampina nakaungiswa ni Yesu atimila. Yuno ni yudya mwanampina ekalaga hajihi na Yesu mwe nkande ye Pasaka na kumuza, “Zumbe ni yuhi nakuhituke?”

²¹Petulo eze amuwone uyo, amuza Yesu, “Zumbe, togola yuno naye?”

²²Yesu amhitula, “Uneva haunga asigale kubula aho hwizila, wavyungilani? Weye nitimila miye.”

²³Ivyo imbuli iyo niyo yazagala mgati mwa wadya walukolo kugamba mwanampina uyo haabanike. Mna Yesu hamgambile kugamba mwanampina uyo habanike, mna nakagamba, “Uneva haunga asigale kubula aho hwizila, wavyungilani?”

²⁴Uyo mwanampina nuyo aukule izimbuli zino na kuziwandika. Naswi chimanya kugamba alongile ni chindedi.

²⁵Kuna mbuli ntuhu zilozize adamanye Yesu, hegu uneva zawandikwe zose, chindedi isi yose hayachintile kwika ivitabu vyawandikwe.