YOHAAN 9:2-10

²Dhali imanciḵ a’di gwo doṯki a’di gwo mo ki: Rabbi, kaja miiki miinthus mo, wathi/ yansan ’taa? walla icom mo, ki a’di dho’thkunu ka ja’da/ kan mo?

³Yesus ki thoḵ gwo mo ki: A’di yisa ita miinthus gi wathi/ yan mo walla icom mo, hili ki mii ma Arumgimis minu ṯor eya tente/ e a’di mo be.

⁴Ana ṯucu ki mii mii gi a’di jin hashki aha/ mo, ki mo di’d ki montee naskina/ mo. Ki mo midi ta mon’thiny mo tani wathin ṯal ’deŋ kamu/ midi mola ṯu’c mii mo be.

⁵Me’d jin dika/ e mony’cesh yan mo tani aha/ tana moŋkush gi ’kwaniny’cesh mo be.

⁶Me’d jin okina a’di gwo wakansan mo tani a’di ki ’taḵ manya/ a’cesh mo dhali ’thoḵa je ki manya/ mo dhali gwa’c wathi/ e ka je mo be,

⁷mmo/o a’di gwo mo ki: Yaku/ mo ma mmolam eya Al Yi’de/ Siluwaam mo (a’di jin ta ’pemen gwo jin onu mo ki: a’di hashkunu mo). Wakan a’di yaki’d mo dhali lamki’d mo dhali doḵki’d ka nyaŋ’ko’d mo mmomish mo mo be.

⁸Dhali imanmiiya ṯu’c dhali uni gwansan kun mishki a’di nṯwa/a/ mo mmotana a’di aman’tho to mo tani uni o gwo mo ki: Dina a’di ki ta wathi/ yansan a’di jin c̱a’bki’d dhali ’tho to mo?

⁹Kun tiya o gwo mo ki: A’di ta a’di be. Kun tiya o gwo mo ki: Yisa, hili a’di wana e ki a’di mo. A’di ki o uni gwo mo ki: Aha/ tana wathi/ mo be.

¹⁰Uni ki o a’di gwo mo ki: Dhali em pini mishu ḵa’d kataye?