YOHAAN 9:14-23

¹⁴Dhali a’di ta’da cim ma pesu/ jin miikin ma Yesusa je mo dhali ḵa’d a’di em piti mo be.

¹⁵Dhali ’Kwani P̱arisiyiin doḵ/e ki doṯ a’di gwo mo ki a’di mishi bu’th momish mom piti kata mo. Dhali a’di ki o uni gwo mo ki: A’di karki’da je e em pem mo dhali aha/ lamkina mo tani aha/ mishkina mo mo be.

¹⁶Dhali ’Kwani P̱arisiyiina tiya ki o gwo mo ki: Wathi/ yansan diki di ’peni Arumgimis mo ba/ haali/ a’di diki kara cim ma pesu/ ki jiŋ ḵogu mo. Hili kun tiya o gwo mo ki: A/ki wathi/ jin ta’da manmii miinthus midi mish miimer gi wakansan mii mowa? Mondher bwa di’di bwaman uni mo be.

¹⁷Wakan uni doḵ/e ki o wathiny ja’da/ gwo mo ki: Gwo gi wakata i/ona /e gom a’di mo me’d jin ḵa’dkina a’di /e e mo? A’di thoḵ gwo mo ki: A’di ta’da manc̱i gwo ma Arumgimis mo be.

¹⁸Dhali ’Kwani Yahuuda/ ’koki gam gwo is ki a’di taki’da ja’da/ mo dhali ki a’di bu’thki momish mo mo ntagi uni ki yuḵ icom gi wathi/ jin bu’thki momish mom piti mo be.

¹⁹Dhali uni ki doṯ uni gwo mo ki: A/yan ta ya/m buma, a’di jin ona um ki a’di dho’thkunu ka ja’da/ mo? Ba a’di mishi mo mo kata shwane/?

²⁰Icom thoḵki gwo mo ki: Aman misha ki a’di yansan ta ya/m bam mo dhali a’di dho’thkunu ka ja’da/ mo be.

²¹Bahili a’di mishi mo kata shwane/ sa/? Aman mola mo walla aman ’konaki mish a’di jin ḵa’dki em piti mo. Doṯi a’di mo ma. A’di cana yil mo. A’di midi o gwo gom is piti mo be.

²²Icom oki gwo wakansan mo haali/ uni ḵo/ki ’Kwani Yahuuda/ mo haali/ ’Kwani Yahuuda/ thosonki gwo mo jin gamu me’d mo waḵki/ wathin ṯal ’deŋ kamu/ midi ’taki pi gwo gom a’di mo mmo/o ki a’di ta’da Ḵrisṯẖos mo tani a’di minu ur ka pije/ ’peni gu’b gi montul is buni mo be.

²³A’di ta gwo jin ona icom gwo mo wakan mo ki: A’di cana yil mo be. Doṯi a’di mo ma.