YOHAAN 8:9-39

⁹Hili ki uni ciḵki a’di mo tani uni iikin ka pije/ ka ’deṯe/ ’deṯe/ mo mmoṯel ’pen ’peni a’di jin ca’d mo, dhala Yesus dhalkunu a’di ’de/ mo nyaḵka ’bom jin doshki’di bwambori a’di mo be.

¹⁰Dhala Yesus ki hil mo mo dhali owa yim gwo mo ki: A’boma, mane uni mane? Dina wathin ṯal ’deŋ kamu/ ki waḵ /eya?

¹¹Ayim ki thoḵ gwo mo ki: Wathi/ yisa di’da Tap̱a. Dhala Yesus ki o a’di gwo mo ki: Wakan si’da/ aha/ dinaki waḵ /e mo be. Yaku/ mo ma dhali dhalku/ miinthus ki mii doḵ/e mo.

¹²Doḵ/e Yesus ki ṯor uni gwo mo mmo/o ki: Aha/ tana moŋkush gi ’kwaniny’cesh mo be. A’di jin midi baṯẖ aha/ nsho’k mo tani midi diki ya e mondhurumi’d mo. Hili a’di midi ta gi moŋkush gi mondiki/e mo be.

¹³Dhali yan’ko’d ’Kwani P̱arisiyiin ki o a’di gwo mo ki: /E ṯori gwo ki is pini ba/. Gwom pini jin ṯora /e mo tani diki ta gwoŋ gana/ mo be.

¹⁴Yesus ki thoḵ uni gwo mo ki: Ba isi waḵki/ gwo jin ṯorka/ gom is pem mo tani gwom pem jin ṯorka/ mo tani ta gwoŋ gana/ mo haali/ aha/ misha mo jin yayika/ ’peni cine/ mo dhali mo jin yaka/ iya mo si’da/ hili um ’koki mish mo jin yayika/ ’peni cine/ mo walla mo jin yaka/ iya mo be.

¹⁵Um dwalli gwo isi gom buŋgwar is mo. Aha/ dinaki dwall jan ṯal ’deŋ kamu/ gwo mo be.

¹⁶Ba isi waḵki/ gwo jin dwallka/ mo tani gwon dwall pem ta gwoŋ gana/ mo haali/ aha/ yisa dina aha/ ’de/ mo jin dwalli gwo mo, hili aha/ dhali Ababam pem jin hashki aha/ mo be.

¹⁷E gwoŋḵan bum jin c̱inu mo, a’di jin ’kwarkunu mo mmo/o gwo mo ki: Gwo jin c̱ina ’kwani su/ mo tani ta gwoŋ gana/ mo be.

¹⁸Aha/ ṯora gwo gom is pem mo dhali Ababam pem a’di jin hashki aha/ mo tani a’di ṯorki gwo gom aha/ mo be.

¹⁹Wakan uni ki thoḵ a’di gwo mo ki: Mane Cim mane? Yesus ki thoḵ uni gwo mo ki: Um ’koki mish aha/ mo walla Ababam pem mo. Waḵki/ um mishi aha/ mo tani um mini ’taki misha Babam pem si’da/ mo be.

²⁰Gwo gwansan okin ma Yesus e mo jin dhunuwa guurush mo me’d jin ṯorkina a’di ’kwani gwo e gu’b gi mondheleladhelel mo. Hili wathin ṯal ’deŋ kamu/ yisa di’da jin bu’thki a’di mo haali/ mom piti diki p̱u’d naskina/ mo be.

²¹Doḵ/e a’di ki o uni gwo mo ki: Aha/ yana ya mo dhali um mini ŋap̱ aha/ mo dhali um mini wu mo e miinthus bum mo. Dhali mo jin yaka/ iya icine/ mo tani um mini mol iiyu/ mo be.

²²Dhali yan’ko’d ’Kwani Yahuuda/ ki o gwo mo ki: Mina a’di ’kosh is piti jwa mo ’taa? me’d jin ona a’di gwo mo ki: Mo jin yaka/ iya mo tani mina um moli iiyu/ mo be.

²³Dhali a’di ki thoḵ uni gwo mo ki: Um ’pena ’cesh yan mo. Aha/ ’peni momis mo. Um ita ku gi mony’cesh yan mo. Aha/ dinaki ta ji gi mony’cesh yan mo be.

²⁴Aha/ ṯora um gwo mo ki um mini wu mo e miinthus bum mo, haali/ um mini wu mo e miinthus bum mo isi ciki/ um mini ’taki gam aha/ gwo is mo ki aha/ tana a’di mo be.

²⁵Dhali uni ki o a’di gwo mo ki: /E sa/ tana ja mo? Yesus ki thoḵ uni gwo mo ki: Ma isi gwo yin jin ṯorka/ um mo ’peni ka muŋ’kup̱ mo tani a’di iṯorkika/ umi ’baar mo be.

²⁶Aha/ tana gi gwon tiya ka ris mmo’taki o gom um mo dhali mmo’taki dwall si’da/ mo tani hili a’di jin hashki aha/ mo tani ta a’diŋ gana/ mo, dhali aha/ ṯorkina a’di i’kwaniny’cesh mo gwo jin ciḵka/ ’peni a’di mo be.

²⁷Dhali uni ’koki mish gwom piti ’ban mo jin okina a’di uni mo gom gwony Com mo be.

²⁸Dhali wakan aYesus ki o uni gwo mo ki: Ki um mini ’de’k Ya/ gi ’Kwani mo tani yan’ko’d um mini mish mo mo ki aha/ tana a’di be dhali ki aha/ dinaki mii ton ṯal ’deŋ kamu/ ki moshirr pem ki is pem mo, hili jasi uni kun okika/ kun ṯorkin ma Baba aha/ mo be.

²⁹Dhali a’di jin hashki aha/ mo tani a’di di’d e aha/ mo. A’di diki dhal aha/ ’pen mo haali/ aha/ miina to isa yempa/ kun ’borki a’di bwa mo be.

³⁰Me’d jin ṯorkina a’di gwo wakan mo tani ’kwani ka ris gamki a’di gwo is mo be.

³¹Dhali yan’ko’d Yesus ki o ’Kwani Yahuuda/ gwo mo, uni kun gamki a’di gwo is mo ki: Waḵki/ um mini ṯikir ’ko mo e gwom pem mo tani um ka jiŋ gana/ mini ta imanciḵ aha/ gwo mo be.

³²Dhali um mini mish gwoŋ gana/ mo. Dhali gwoŋ gana/ midi dhu um ki ’kus mo be.

³³Uni thoḵki a’di gwo mo ki: Aman tana emen ma Ibrahiim mo dhali aman ’konaki ta c̱iŋkina/ gi ’kwanin tiya mo. Ba ata i/ona /e gwo mo ki: Um minu dhu ki ’kus mo?

³⁴Yesus ki thoḵ uni gwo mo ki: Ka jiŋ gana/, ka jiŋ gana/ aha/ ona um gwo mo ki: Aris ’kwani ’baar mo ka ’deṯe/ ’deṯe/ kun miiki miinthus mo tani uni ta c̱iŋkina/ gi miinthus mo be.

³⁵Dhali c̱iŋkina/ yisa mishi ṯikir c̱a’b e gu’b ki sule/ ki sule/ mo, hili ya/ a’di ṯikirki c̱a’b ki sule/ sule/ mo be.

³⁶Wakan waḵki/ Ya/ dhu um ki ’kus mo tani um ka jiŋ gana/ mini ’ko ki ’kus mo be.

³⁷Aha/ misha ki um ta emen ma Ibrahiim mo. Bahili um ŋap̱ki aha/ mmo’kosh mo haali/ gwom pem diki gam monyc̱a’b e um mo be.

³⁸Aha/ ṯorkina gwo ki to jin mishkika/ ’pena Babam pem mo dhali um miiki to jin ciḵa um ’pena babam bum mo be.

³⁹Uni ki thoḵ a’di gwo mo ki: Ibrahiim ta’da babam bam mo. Dhala Yesus ki thoḵ uni gwo mo ki: Waḵki/ um mini ’taki ta uc̱i ma Ibrahiim mo tani um mini ’taki mii mii kun miin ma Ibrahiim mo be.