YOHAAN 8:41-57

⁴¹Um mii to kun ciḵa um ’pena babam bum mo. Uni ki thoḵ a’di gwo mo ki: Aman ’konuki dho’th ki dho’th c̱al mo be. Aman tana ga Baba jin di’d ṯal ’de/ mo a’di jin ta’da Arumgimisi.

⁴²Yesus ki thoḵ uni gwo mo ki: Waḵki/ Arumgimis midi ’taki ta Ababam bum mo tani um mini ’taki en aha/ mo haali/ aha/ pikina ’peni Arumgimis mo dhali aha/ yayina ’peni a’di mo. Aha/ dinaki yayu/ ki bwam pem mo, hili ki bwa gi a’di jin hashki aha/ mo be.

⁴³Atinta ’kona um ki mish gwo jin oka/ ’ban mo? Haali/ a’di wakan mmomola um gwom pem ciḵ mo be.

⁴⁴Um ’pena babam bum jin ta tap̱a ma ruma ’cesh mo dhali bwam bum o’d ki mii me’d bwa ma babam bum mo. A’di ta’da man’kosha mee mo ’peni ka muŋ’kup̱ mo dhali a’di dar gi toŋ kamu/ mmomii gom gwoŋ gana/ mo haali/ gwoŋ ganaŋ kamu/ yisa di’da e a’di mo. Ki a’di ki ṯor gwo ka ṯor mo tani a’di ki o gwo mo me’d isi jin di’di a’diyi haali/ a’di ta’da ṯor mo dhali com jin cil ma ṯor mo.

⁴⁵Hili haali/ gom gwoŋ gana/ jin ṯorka/ um mo tani um ’koki gam aha/ gwo is mo be.

⁴⁶Wathi/ jana ’peni bwam um gamki aha/ ki aha/ dina mii m’ba/ gom miinthus mo? Waḵki/ aha/ ṯora gwoŋ gana/ mo tani ata ’kona um ki gam aha/ gwo is mo si’da/?

⁴⁷A’diyin jin ta jim ma Arumgimis mo tani ciḵki’da Arumgimis gwo mo. Dhali gom gwo jin ’kona um ki ciḵ a’di mo tani um ’koki ta ku ma Arumgimis mo be.

⁴⁸Dhali ’Kwani Yahuuda/ ki thoḵ a’di gwo mo ki: Aman ona gwo ki oŋ gana/ ba/ ki /e ta Wathi/ gi Pan Saamira jin taki’d ga ruma ’cesh moyi?

⁴⁹Yesus ki thoḵ uni gwo mo ki: Aha/ dinaki ta aruma ’cesh mo, hili aha/ taḵa Ababam pem mo dhali um ’koki taḵ aha/ mo be.

⁵⁰Hili wakan si’da/ aha/ dinaki ŋap̱ monyca ki is pem mo. Jan ṯal ’deŋ kamu/ diki’d jin ŋap̱ki a’di mo dhali a’di midi ta mandwall gwo mo be.

⁵¹Ka jiŋ gana/, ka jiŋ gana/ aha/ ṯora um gwo mo ki: Waḵki/ wathin ṯal ’deŋ kamu/ midi dhu gwom pem mo tani a’di midi diki p̱ar wu e ki sule/ mo be.

⁵²Dhali ’Kwani Yahuuda/ ki o a’di gwo mo ki: Shwane/ aman misha ki /e tana ga ruma ’cesh mo. Ibrahiim wuki’d mo ba/, me’d jin wukina imanc̱i gwo ma Arumgimis kadhamo/ mo dhali i/e a’di i/on ki: Waḵki/ wathi/ midi dhu gwom pem mo tani a’di midi diki nyoḵ wu ki sule/ mo be.

⁵³/E can mo mmobola babam bam ka Ibrahiim e jin wuki’d mo ’taa? Aggi. Dhali imanc̱i gwo ma Arumgimis kadhamo/ mo kun wukin mo. Ki /e si’da/ ṯoshki /e tana ja mo?

⁵⁴Yesus ki thoḵ uni gwo mo ki: Waḵki/ aha/ kara monycam pem mo tani monycam pem di’d ki buthur mo. A’di ta’da Babam pem jin karki aha/ ca eya tente/ mo, a’di jin okina um ki a’di ta’da Arumgimis bum mo be.

⁵⁵Hili um ’koki mish a’di mo. Aha/ misha a’di mo be. Waḵki/ aha/ ona gwo ki aha/ mola a’di mo tani aha/ mina ’taki ta aṯor me’d um mo, hili aha/ misha a’di mo dhali aha/ dhuna gwom piti mo be.

⁵⁶Ababam bum ka Ibrahiim a’di ’kunykina bwa mo mmop̱ina a’di acim pem e mo. A’di mishki a’di mo dhali ’borkina bwa mo be.

⁵⁷Dhali yan’ko’d ’Kwani Yahuuda/ ki o a’di gwo mo ki: /E dina yil ki ’ko/ issu/ i’ce’dka ’kume’d naskina/ mo dhali /e p̱arkina Ibrahiim eya?