YOHAAN 6:51-68

⁵¹Aha/ tana maa jin di’d ki e jin thulki’da ’cesh ’peni momis mo. Waḵki/ wathin ṯal ’deŋ kamu/ jin midi shwa maa yansan mo tani a’di midi di ki e ki sule/ sule/ mo. Dhali maa jin miga/ c̱i gom moŋ’koki/e gi ’kwaniny’cesh mo tani a’di ta buŋgwar is pem mo be.

⁵²Dhali yan’ko’d ’Kwani Yahuuda/ uni su’kkin ki gwo e bwaman c̱em buni mo mmo/o gwo mo ki: Ki wathi/ yansan midi c̱i ana buŋgwar is piti mmo’ka manakan?

⁵³Dhali wakan aYesus ki o uni gwo mo ki: Ka jiŋ gana/, ka jiŋ gana/ aha/ ṯora um gwo mo ki: Isi ciki/ waḵki/ um ’koki ’ka shuman is gi Ya/ gi ’Kwani mo dhali p̱i abas piti mo tani um mini ’koki ta gi moŋ’koki/e e is bum mo be.

⁵⁴A’diyin jin ’ka buŋgwar is pem mo dhali p̱iya bas pem mo tani a’di ta’d gi mondiki/e ki sule/ sule/ ya ye ’ba/ mo dhali aha/ mina ’de’k a’di ka cim jiŋ ’ko’d mo be.

⁵⁵Haali/ buŋgwar is pem a’di ta tonṯeŋ gana/ mo be dhali abas pem a’di ta to jin minu p̱i jin ta jiŋ gana/ mo be.

⁵⁶A’diyin jin ’ka buŋgwar is pem mo dhali p̱iya bas pem mo tani a’di nyaḵki c̱a’b e aha/ mo dhali aha/ e a’di mo be.

⁵⁷Dhali me’da Babam pem jin di’d ki e mo dhali hash aha/ mo tani dhali aha/ dina ki e mo goma Baba mo, wakan a’diyin jin midi ’ka aha/ mo tani midi di ki e mo gom aha/ mo be.

⁵⁸Yansan ta maa jin thulki’da ’cesh ’peni momis mo, yisa waki jin shwakina icim dhali wu mowa. A’di jin midi shwa maa yansan mo tani midi di ki e ki sule/ sule/ ya ye ’ba/ mo be.

⁵⁹Gwo yansan okina a’di e gu’b gi montul is buni mo me’d jin ṯorkina a’di uni gwo mo e Paŋ Kap̱ranahuum mo be.

⁶⁰Imanciḵ a’di gwo ka ris ki uni ciḵki gwo yansan mo tani uni o gwo mo ki: Gwo yansan ’bitha’bi’th mo be. Aja a’di imidi mish a’di ciḵ mo?

⁶¹Hila Yesus a’di nyiṯẖki’d ki is piti mo ki imanciḵ a’di gwo miiki’da gumgum mo isi gom gwo yan mo tani dhali o uni gwo mo ki: Um si’da/ kolkunu mo gom gwo yansan mo de?

⁶²Waḵki/ wakan mo tani gwo midi wakataye waḵki/ um ki p̱ar Ya/ gi ’Kwani e mmoseku/ e mo jin dina a’di ’thissa/ mo?

⁶³A’di ta shi/in jin c̱i moŋ’koki/e mo. Buŋgwar is a’di aṯẖa/aṯẖ mo. Gwo jin ṯorka/ um mo tani uni ta shi/in dhali moŋ’koki/e mo be.

⁶⁴Hili unin tiya ’kokini bwam um mo kun ’koki gam gwo is mo. Haala Yesus mishki’d ’peni ka muŋ’kup̱ nṯwa/a/ mo uni gwansan kun mini ’koki gam gwo is mo dhali a’diyin jin midi ’taki ’ciṯẖ a’di is ki gwo mo be.

⁶⁵Dhali a’di ki o gwo mo ki: Gom gwo gi wakan mo tani a’di iṯorka/ um gwo mo ki jan ṯal ’deŋ kamu/ midi moli yayu/ i aha/ mo, hili isi ciki/ a’di imin ma Babam pemi c̱i a’di mo be.

⁶⁶’Ko’di mii yansan mo tani imanciḵ a’di gwo ka ris yeki gwo is mo dhali ’koki nyaḵ ii ki a’di mo be.

⁶⁷Yesus ki o uni gun ’koni ’kume’d i’ce’dka su/ gwo mo ki: I/um si’da/ mini ii mo ’taa?

⁶⁸Simaan Buṯerus ki thoḵ a’di gwo mo ki: Tap̱a, ki am mina ii aja mo? Ki /e a’di ita gi gwo gi mondiki/e ki sule/ sule/ ya ye ’ba/ mo.