YOHAAN 6:4-18

⁴Dhali Mompe’kup̱anyolos jin yuḵuwa yuḵ gi ’Kwani Yahuuda/ ’dishki’d mo be.

⁵Dhali yan’ko’d mmo’deka a’di em piti ki mis mo dhali mmomisha a’diya waambuhany ’kwani mmop̱u’du/ i a’di mo tani Yesus ki owa P̱ilibbus gwo mo ki: ’Peni mana imina ana iyol maa mo jin mina ’kwani gwansan wakan i’taki shwa mo?

⁶Gwo yansan okina a’di mo mmopal a’di mo haali/ a’di mishki’d ki is piti gom to jin mina a’di ’taki mii mo be.

⁷P̱ilibbus ki thoḵ a’di gwo mo ki: Ariyaal iss ’kwanimpa ipe’de/ midi ’taki diki yol maaŋḵuthu’d mmo’kosh jwa mo gom uni ’baar mo ka ’deṯe/ ’deṯe/ mmo’ceṯẖ bwa ime’d ki gwa’d gwa’d mo.

⁸Jan ṯal ’deŋ kamu/ ’peni imanciḵ a’di gwo jin yuḵkunu gway ka Andaraawus mo jin ta’da kam ma Simaan Buṯerus mo o a’di gwo mo ki:

⁹A’ciŋ kamu/ di’di mahan jin ta’d gi maaŋḵuthu’di mudhe’d ’peni emen posa kamu/ mo dhali to yi’de/ isu/ mo. Hili uni gwansan minu miiya tinta ibwaman ’kwani ka ris kun wakan mo?

¹⁰Yesus ki o gwo mo ki: Ṯuci ’kwani mmo’ko ’pena ’cesh mo. Dhali asho ’bina e ki ’bi mo. Wakan ’kwaniŋ gwas uni ’kokina ’cesh mo dhali mondeŋ jin deŋkunu uni e mo tani wana e ka alaap̱i mudhe’d mo be.

¹¹Yan’ko’d Yesus ki bu’th maaŋḵuthu’d mo dhali ki a’di ’borki’da ’bor bwa i is mo tani a’di ki c̱iki uni gwansan kun ’kokina ’cesh mo. Dhali to yi’de/ si’da/ miikunu wakansan mo me’d jin ŋap̱kina uni a’di mo be.

¹²Dhali ki shwam buni jin shwakina uni a’di ikap̱ mo tani a’di ki ṯor imanciḵ a’di gwo gwo mo ki: Tuli kuluny maa kun uru ’kup̱ is mo ki jan ṯal ’deŋ kamu/ minu ’taki diki this e mo be.

¹³Wakan uni tulki uni is mo dhali ’tu’dkina nura/ ka ’kume’d i’ce’dka su/ ki kuluny maa ’peni maaŋḵuthu’di mudhe’d ’peni emen posa kamu/ mo, kun dhalkina uni gwansan kun shwakin mo be.

¹⁴Dhali ki ’kwani p̱arki miimer e mo jin miikina a’di mo tani uni o gwo mo ki: Wathi/ yansan ka jiŋ gana/ ta’da manc̱i gwo mo a’di jin midi yayu/ i mony’cesh mo be.

¹⁵Dhali yan’ko’d mmonyiṯẖkina a’di uni mo ki uni muruni iiyu/ mo dhali bu’th a’di ki ’bi’th mo mmokar a’di ka maliḵ mo tani Yesus yaki’d mo doḵ/e e ’kuwosh mo a’di ’de/ mo be.

¹⁶Ki mom’pimpili/ p̱u’dki’d mo tani imanciḵ a’di gwo uni iikin ka luŋgu’b eya al mo,

¹⁷mmosekina uni e bwam ma ḵur mo dhali mmoṯel ii ’pen mo mmo’ciṯẖa/ gap̱ ma al e Paŋ Kap̱ranahuum mo. Dhali mo dhuruma/ dhurum mo be dhala Yesus diki yayu/ i uni naskina/ mo be.

¹⁸Dhali yi’de/ birki bakal mo haali/ ’tham poshki’d kagahara mo be.