YOHAAN 6:31-48

³¹Ibabam bam shwakina manna mo e mombwaasho mo me’d Gwo ma Arumgimis jin ’kwarkunu mo jin o ki: A’di c̱iki uni maaŋ gana/ ’peni momis mmoshwa mo be.

³²Dhali yan’ko’d Yesus ki o uni gwo mo ki: Ka jiŋ gana/, ka jiŋ gana/ aha/ ṯora um gwo mo ki: AMusa, yisa a’di ic̱iki um maa yan ’peni momis yisa. Ababam pem a’di c̱iki um maaŋ gana/ yan ’peni momis mo be.

³³Haali/ maa ma Arumgimis a’di ta a’di jin p̱u’dki’da ’cesh ’peni momis mo dhali c̱i mondiki/e e ’kwaniny’cesh mo.

³⁴Uni ki o a’di gwo mo ki: Tap̱a, c̱i am maa yansan isa yempa/ mo ma.

³⁵Yesus ki o uni gwo mo ki: Aha/ tana maa gi mondiki/e mo be. A’diyin jin yayi’di aha/ mo tani mina ṯe/ diki bu’th mo, dhali a’di jin gam aha/ gwo is mo tani mina yi’de/ diki bu’th ki sule/ mo be.

³⁶Hili aha/ ṯora um gwo mo ki: Um p̱arki aha/ e mo tani dhali um ’koki gam aha/ gwo is naskina/ mo be.

³⁷Aris uni ’baar mo kun c̱ikin ma Baba aha/ mo tani uni mini iiyu/ i aha/ mo, dhali a’di jin midi yayu/ i aha/ mo tani aha/ mina diki ur a’di ka pije/ mo be.

³⁸Haali/ aha/ p̱u’dkina i mony’cesh yansan ’peni momis mo, yisa mmomii ki bwam pem yisa, hili ki bwa gi a’di jin hashki aha/ mo be.

³⁹Dhali a’di yansan ita bwam piti jin hashki aha/ mo, ki aha/ mina diki this jan ṯal ’deŋ kamu/ e mo ’pena ris uni gwansan kun c̱ikina a’di aha/ mo, hili aha/ mina ’de’k uni ka cim jiŋ ’ko’d mo be.

⁴⁰Haali/ a’di yansan ita bwa ma Babam pem mo, ki aris ’kwani ’baar mo ka ’deṯe/ ’deṯe/ kun p̱arki Ya/ e mo dhali gam gwo is e a’di mo tani mini ’taki ta gi moŋ’koki/e ki sule/ sule/ ya ye ’ba/ mo. Dhali aha/ mina ’de’k uni ka cim jiŋ ’ko’d mo be.

⁴¹Dhali yan’ko’d ’Kwani Yahuuda/ uni miikina gumgum ap̱o/ a’di mo haali/ a’di oki gwo mo ki: Aha/ tana maa jin thulki’d ’peni momis mo be.

⁴²Uni o gwo mo ki: Wathi/ yan diki ta aYesus mo? a’di jin ta Ya/ ma Yuusup̱ mo. ’Kona ana ki mish com dhali kum mowa? Ba ata ona a’di gwo mo shwane/ ki: Aha/ thulkina ’peni momis mo?

⁴³Yesus ki thoḵ uni gwo mo ki: Dhalka gumgum ki mii e bwam um um ’cena kan mo.

⁴⁴Wathin ṯal ’deŋ kamu/ yisa di’da jin midi yayu/ i aha/ isi ciki/ Ababa jin hashki aha/, a’di dirki a’di mo. Dhali aha/ mina ’de’k a’di ka cim jiŋ ’ko’d mo be.

⁴⁵A’di ta gwo jin ’kwarkina imanc̱i gwo ma Arumgimis kadhamo/ mo ki: Dhali uni ’baar mo min ma Arumgimisi ṯor mo. Ki aris uni ’baar mo ka ’deṯe/ ’deṯe/ kun mini ciḵ gwo mo dhali da/ar ’pena Baba mo tani uni mini i/iiyu/ i aha/ mo be.

⁴⁶Wathin ṯal ’deŋ kamu/ yisa di’da jin p̱arki’da Baba e mo, hili isi ciki/ jasi a’di jin ta ji ’peni Arumgimis mo, a’di mishki’da Baba mo be.

⁴⁷Ka jiŋ gana/, ka jiŋ gana/ aha/ ṯora um gwo mo ki: A’diyin jin gamki gwo is mo tani ta’d gi mondiki/e ki sule/ sule/ ya ye ’ba mo be.

⁴⁸Aha/ tana maa gi mondiki/e mo be.