YOHAAN 6:16-27

¹⁶Ki mom’pimpili/ p̱u’dki’d mo tani imanciḵ a’di gwo uni iikin ka luŋgu’b eya al mo,

¹⁷mmosekina uni e bwam ma ḵur mo dhali mmoṯel ii ’pen mo mmo’ciṯẖa/ gap̱ ma al e Paŋ Kap̱ranahuum mo. Dhali mo dhuruma/ dhurum mo be dhala Yesus diki yayu/ i uni naskina/ mo be.

¹⁸Dhali yi’de/ birki bakal mo haali/ ’tham poshki’d kagahara mo be.

¹⁹Dhali ki uni ’koshki cwa is me’d ŋaṯgini kwara mo walla idoŋon mo tani uni p̱arkina Yesus e mo mmoya ki sho’k e ’kup̱a al mo dhali a’di ’dishki’da ḵur is mo be. Dhali uni ḵo/kina ḵo/ is kagahara mo.

²⁰Hili a’di ki o uni gwo mo ki: Aha/ a’dan be. Dhalku/ is ki ḵo/ mo ma.

²¹Dhali yan’ko’d uni ’kunykina bwa mo dhali bu’th a’di e bwam ma ḵur mo, dhali ki jahanne/ aḵur a’di p̱u’dki’d e mo jin ’kokina uni mmo/ii mo be.

²²Dhali ka cim jiŋ ’ko’d mo tani ’kwani kun ’kokina ’bana gap̱a kamu/ mo tani mishki mo mo ka ḵur diki’d jasi ṯal ’de/ imun mo, dhala Yesus diki se aḵur mo nyaḵki imanciḵ a’di gwo mo, hili imanciḵ a’di gwo uni iikin uni ’cena mo be.

²³Bahili jasa ḵur ’peni Pan Thabariyya mo tani p̱u’dkin mo mmo’dish mo is mo e mo jin shwakina uni maaŋḵuthu’d mo ’ko’di Tap̱a ’borki’da Arumgimis bwa i is mo be.

²⁴Wakan ki ’kwani mishkin ka Yesus diki di imun mo tani walla imanciḵ a’di gwo mo tani uni ki is buni seki bwam ma ḵur mo dhali ii e Paŋ Kap̱ranahuum mo mmoŋap̱a Yesus mo be.

²⁵Dhali ki uni gamki a’di e ’bana gap̱a ala kamu/ mo tani uni ki o a’di gwo mo ki: Rabbi, /e yayini mahan kakasja mo?

²⁶Dhala Yesus ki thoḵ uni gwo mo ki: Ka jiŋ gana/, ka jiŋ gana/ aha/ ṯora um gwo mo ki: Um ŋap̱i aha/, yisa mmop̱arkina um miimer e mo yisa, hili mmoshwakina um maaŋḵuthu’d ikap̱ mo be.

²⁷Dhalku/ ki miiya ṯu’c gom tonṯe/ mo jin midi ’ce’d sho’k mo hili gom tonṯe/ jin midi ’dim ’kup̱ ntagi moŋ’koki/e ki sule/ sule/ ya ye ’ba/ mo, a’di jin mina Ya/ gi ’Kwani ic̱i um mo. Haali/ e a’di mo tani Arumgimis jin ta Com mo a’di ’dap̱ki gwom piti ’twa/ ki a’di mo be.