YOHAAN 4:38-54

³⁸Aha/ hashkina um mo mmo’ciṯẖ a’di, a’di jin ’kokina um ki miiya ṯu’c mo. Kun tiya uni miikina ṯu’c mo dhali um cic̱kin e mo ma ṯu’c buni mo be.

³⁹’Kwani Samiriyiin ’peni ’peŋkuman bampa/ c̱aan mo tani gamki a’di gwo is mo haali/ gom gwo jin ṯor ma ’bom mo mmo/o gwo mo ki: A’di ṯorki aha/ gwo mo goma ris to ’baar mo kun miikika/ mo be.

⁴⁰Wakan ki ’Kwani Samiriyiin p̱u’dkin e a’di mo tani uni doṯki a’di mo mmonyaḵ c̱a’b e uni mo, dhali a’di c̱a’bki’di mun ka cim su/ mo be.

⁴¹Dhali uni ka ris ris gamki gwo is mo gom gwom piti mo be.

⁴²Dhali uni ki owa ’bom gwo mo ki: A’di yisa di’d mmota gwom pini jin gama aman gwo is mo yisa haali/ aman ciḵkina gwo ki is bam mo, dhali aman misha a’di yansan ka jiŋ gana/ a’di ita’da Manwoṯẖ gi ’kwaniny’cesh mo be.

⁴³Dhali ’ko’da cim su/ mo tani a’di yaki’d e Pany Jaliil mo be.

⁴⁴Haala Yesus ki is piti ṯorki gwo ka manc̱i gwoŋ kamu/ yisa taḵu e bampam pitiŋ ganaa.

⁴⁵Wakan ki a’di p̱u’dki’d e Pany Jaliil mo tani ’Kwani gi Pany Jaliil hanki a’di mo mmomishkina uniya ris to gun miikina a’di mo e Pa Urushaliim e mo ma yuḵ jin yuḵu mo haali/ uni si’da/ iikin e mo jin yuḵuwa yuḵ mo be.

⁴⁶Wakan a’di p̱u’dki’d ka nyaŋ’ko’d e Paŋ Kaana gi Pany Jaliil e mo jin warkina a’di yi’de/ ki yimana mura’th mo. Dhali e Paŋ Kap̱ranahuum mo tani wathi/ ma maliḵa kamu/ diki’d jin ’ba’thkina ya/m piti mo be.

⁴⁷Ki a’di ciḵki gwo ka Yesus p̱u’dki’d ’peni Pa Yahuudiyya e Pany Jaliil mo tani a’di yaki’d mo dhali yuḵ a’di mo mmoyayu/ ka luŋgu’b mo dhali wac̱ ya/m piti mo haali/ a’di ’disha ’twa/ mmowu mo be.

⁴⁸Dhali wakan aYesus ki o a’di gwo mo ki: Isi ciki/ ki um ’koki p̱ar jamas mii e mo dhali momer mo tani um mini ’koki gam gwo is mo be.

⁴⁹Dhali wathi/ ma maliḵ ki o a’di gwo mo ki: Tap̱a, yayu/ ka luŋgu’b mo ma nṯwa/a/ ka ’cim pem diki wu mo.

⁵⁰Yesus ki o a’di gwo mo ki: Yaku/ mo ma. Ya/m pini midi di ki e mo. Dhali wathi/ gamki gwo is jin ṯorkin ma Yesus a’di mo dhali a’di yaki bway pa mo be.

⁵¹Dhali ki a’di diki’d mmoyaku/ ka luŋgu’b mo tani imanmiiya ṯu’c piti gamki a’di ’kup̱ mo dhali ṯor a’di gwo mo ki: Ya/m pini a’di di’d ki e mo be.

⁵²Wakan a’di ki doṯ uni atente/ mo jin ṯelkina a’di mii ’pen mo mmowac̱ mo. Dhali uni ki thoḵ a’di gwo mo ki: Katili/ ka tente/ joc̱ is ’peni bwaŋ ’kup̱ mo mmota atenten ’de/ mo tani athunya/ ki dhal a’di ’pen mo be.

⁵³Dhali com ki misha tente/ jin okin ma Yesus a’di gwo mo ki: Ya/m pini midi di ki e mo. Dhali a’di ki is piti gamki gwo is mo dhali ’kwani gi gu’b piti ’baar mo be.

⁵⁴Dhali mii yansan a’di ta miimer kun ’kon ma p̱o/i su/ mo jin miikin ma Yesus mo me’d jin p̱u’dkina a’di ’peni Pa Yahuudiyya e Pany Jaliil mo be.