YOHAAN 21:6-25

⁶A’di ki o uni gwo mo ki: Biṯa ’thi/ ki ’bana bim poros ma ḵur mo dhali um mini gam kun tiya mo be. Wakan uni biṯki a’di mo dhali shwane/ uni molona ’thi/ dir bway bwaaḵur mo haali/ to yi’de/ ’ka’da ’kup̱a!

⁷Dhali amanciḵ a’di gwo jin en ma Yesus mo o’da Buṯerus gwo mo ki: A’di ta Tap̱a be. Ka Simaan Buṯerus ciḵki gwo ki a’di ta Tap̱a mo tani a’di hi’thki burrinyem bwaman piti i is mo haali/ a’di di’d ki burrinye/ i empa’d ’te/ goma ṯu’c mo dhali a’di poshki’da al mo be.

⁸Hili imanciḵ a’di gwon tiya uni p̱u’dkin mo e bwaaḵur mo mmodira ’thi/ jin ’tu’da to yi’de/ mo haali/ uni yisa si’dkin ’pena gap̱a, hili uni aṯẖkina ŋaṯgini ’de/ mo be.

⁹Ki uni pikin ka pije/ eya ’cesh mo tani uni p̱arki o’d e jin ’thanu ka ’cila’th imun mo dhali to yi’de/ mmo’ko i o’d mo dhali maaŋḵuthu’d mo be.

¹⁰Yesus ki o uni gwo mo ki: Ḵali to yi’den tiya mo ma kun daḵa bu’thkina um mo.

¹¹Wakan Simaan Buṯerus a’di yaki’da ḵur mo dhali dira ’thiya gap̱ mo a’di jin ’tu’dkina to yi’deny caaga/ mo kun ’koni iss ’kwanimpa ipesu/ i’ce’dka ’kume’d i’ce’dka kwara ap̱o/ mo be. Dhali baga ris jin takina uni wakan mo tani a’thi/ yisa ’ciṯẖki bwa mowa.

¹²Yesus ki o uni gwo mo ki: Iiyu/ mo ma dhali shwa tonṯe/ gi mon’thamo/ mo. Hila manciḵ a’di gwoŋ kamu/ yisa di’d ’de/ jin ro’dki mii mo mmodoṯ a’di gwo mo ki: Ki /e tana ja sa/? Uni nyiṯẖkin ki a’di ta Tap̱a mo be.

¹³Yesus p̱u’dki’d mo dhali bu’th maaŋḵuthu’d mo dhali c̱iki uni mo dhali to yi’de/ miikina a’di kan si’da/ mo be.

¹⁴Mii yansan a’di ta mii jin ’kon ma p̱o/i kwara mo jin ṯorkin ma Yesus imanciḵ a’di gwo is piti e eya tente/ mo ’ko’di a’di cukunu mis mo ’peni mowu mo be.

¹⁵Ki uni ’baarki tonṯe/ gi mon’thamo/ mmoshwa mo tani Yesus ki owa Simaan Buṯerus gwo mo ki: Simaan, ya/ ma Yohaan, a/e eni aha/ mmobol gwansan e mo ’taa? A’di ki thoḵ a’di gwo mo ki: Nye, Tap̱a. /E mishkin ki aha/ enkina /e mo.

¹⁶A’di ki o a’di gwo mo ki: C̱iyi ushi ḵa’bal pem to mmoshwa mo. Doḵ/e me’d jin ’kon ma ap̱o/i su/ mo tani a’di ki o a’di gwo mo ki: Simaan, ya/ ma Yohaan, a/e eni aha/ mo ’taa? A’di ki o a’di gwo mo ki: Nye, Tap̱a. /E mishkin ki aha/ enkina /e mo. A’di ki o a’di gwo mo ki: Hili ḵa’bal pem mo ma.

¹⁷A’di ki o a’di gwo mo me’di kwara ki: Simaan, ya/ ma Yohaan, a/e eni aha/ mo? ABuṯerus suguwa du tash mo haali/ a’di ki o a’di gwo me’di kwara mo ki: A/e eni aha/ mowa? Dhali a’di ki o a’di gwo mo ki: Tap̱a, /e mishkina ris to ’baar mo dhali /e mishkin ki aha/ enkina /e mo. Dhala Yesus ki o a’di gwo mo ki: C̱iyi ḵa’bal pem to mmoshwa mo.

¹⁸Ka jiŋ gana/, ka jiŋ gana/ aha/ ona /e gwo mo, me’dyin jin dina /e ki gwa’d mo tani /e ki deḵ to i empa’d ki me’d pini mo dhali ya me’d jin ona bwa /e mo. Hili ki /e mini ta adhan mo tani /e mini he’th me’d pini mo dhali wathiŋ kamu/ midi deḵ ki /e to mo dhali ḵal /e i mo jin mina bwa ’te /e ki ya mo be.

¹⁹(Gwo yansan ona a’di mmoṯor a’di wu jin mina a’di wu mo mmokar monyca ma Arumgimis mo.) Dhali ’ko’di gwo yansan mo tani a’di ki o a’di gwo mo ki: Baṯẖi aha/ nsho’k mo ma.

²⁰Simaan Buṯerus ṯu’kki’d mo dhali p̱ar a’di jin baṯẖki uni e mo a’di jin ta’da manciḵ gwo jin en ma Yesus mo, a’di jin ishki’d eya bor piti mo e tonṯe/ jin shwakina uni mom’pimpili/ yin mo dhali o a’di gwo mo ki: Tap̱a, kaja a’di jin midi ’ciṯẖ /e is ki gwo mo?

²¹Ka Buṯerus p̱arki a’di e mo tani a’di ki owa Yesus gwo mo ki: Tap̱a, gwo gom wathi/ yan wakata mo?

²²Yesus ki o a’di gwo mo ki: Waḵki/ a’di ta bwam pem gom a’di jin mina a’di c̱a’b kan ntagi aha/ mina p̱u’du/ mo tani yan midi ta ata gom /e mo? Baṯẖi /e aha/ nsho’k mo ma.

²³Gwo yansan a’di yaki’d ki lala’th mo e bwam uni kun tana a’di awaḵ mo, ka manciḵ a’di gwo yansan midi diki wu mo. Hila Yesus diki o gwo e a’di ki a’di midi diki wu mo, hili a’di o gwo mo ki: Waḵki/ a’di ta bwam pem jin mina a’di c̱a’b kan ntagi aha/ mina p̱u’du/ mo tani yan midi ta ata gom /e mo?

²⁴A’di yansan ta’da manciḵ gwo jin ta’da man/o gwo gom to gwansan mo dhali a’di i’kwarki gwo gwansan mo. Dhali a’di mishki’d ki gwonṯor piti jin ṯora a’di mo tani ta gwoŋ gana/ mo be.

²⁵Hili ton tiya ’kokin ka ris si’da/ jin miikin ma Yesus mo. Waḵki/ aris uni ’baar mo ka ’deṯe/ ’deṯe/ minu ’taki ’kwar mo tani aha/ ṯosha ki isi mony’cesh ki is piti mo midi dar gi mo mo mmodhuwa warka/ kun ’kwarkunu gwo mo kun minu ’taki ’kwar mo be.