YOHAAN 20:6-30

⁶Dhali yan’ko’d Simaan Buṯerus p̱u’dki’d mo mmobaṯẖ a’di nsho’k mo dhali a’di yaki bwany jis jwa mo dhali a’di ki p̱ar burrinyen dhiny e e mo mmo/ish mo be,

⁷dhali burrinye/ jin deḵkunu a’di i’kup̱ piti mo tani yisa nyaḵki ish ki burrinyen dhiny e mo, hili a’di ’kuc̱ki is mo e mom piti mo be.

⁸Dhali yan’ko’d amanciḵ gwoŋ kamu/ a’di jin jidhirki’di jis jwa nṯwa/a/ mo tani a’di si’da/ seki bwaman mo dhali a’di mishki mo mo dhali gam gwo is mo be.

⁹Haali/ uni ’koki mish Gwo ma Arumgimis jin ’kwarkunu mo naskina/ ki a’di midi mii pi ’peni mowu mo be.

¹⁰Dhali yan’ko’d imanciḵ a’di gwo uni doḵki bway pam buni mo be.

¹¹Hila Mariyam doshki’d mo mmoko mo apije/ ’peni jis jwa mo dhali me’d jin gwokin ma yim mo tani ayim ki tu mo mo dhali p̱ar jis jwa e mo be.

¹²Dhali ayim p̱arki iman’doyu gwo su/ e ki bany bany mo mmo’ko e mo yin jin ’thikunu buŋgwar is ma Yesus mo, jan ’de/ diki’di buŋ’kup̱ piti mo dhali jaŋ kamu/ e busho’k piti mo be.

¹³Uni ki owa yim gwo mo ki: A’boma, atinta gwokina /e kan mo? Ayim ki thoḵ uni gwo mo ki: Haali/ uni ḵalki Tap̱am pem mo dhali aha/ mola mo jin karkina uni a’di nycine/ mo be.

¹⁴Mmo/ona a’di gwo kan mo tani ayim ki ṯuga bor mo dhali p̱ara Yesus e mo mmodosh mo, hili ayim diki mish a’di ki a’di ta’da Yesus mo be.

¹⁵Yesus ki owa yim gwo mo ki: A’boma, atinta gwokina /e kan mo? Dhali aja iŋap̱kina /e mo? Dhali a’di ṯoshki’d ki a’di ta’da manhil bwaman monsinu mo. Ayim ki o a’di gwo mo ki: Tap̱a, waḵki/ /e ḵalki a’di mo tani ṯori aha/ mo jin ’thikina /e a’di nycine/ mo dhali aha/ mina ḵal a’di mo be.

¹⁶Yesus ki owa yim gwo mo ki: Mariyam. Ayim ki ṯu’k ’ban mo dhali o a’di gwo ki ’twaŋ ’Kwani Ibraniyiin ki: Rabbooni (a’di jin ta ’pemen gwo jin onu mo ka: Manṯor Gwo mo be).

¹⁷Yesus ki owa yim gwo mo ki: Dhalku/ ki p̱eyaa/ i is mo haali/ aha/ dinaki seya Baba naskina/ mo. Hili yaku/ e iwaḵ pem mo dhali o uni gwo mo ki: Aha/ sena se Ababam pem mo dhali Ababam bum mo, dhali eya Arumgimis pem mo dhali eya Arumgimis bum mo be.

¹⁸Mariyam Magdaliyya yaki’d mo dhali o imanciḵ a’di gwo gwo mo ki: Aha/ p̱arkina Tap̱a e ka pinya/ em pem mo be. Dhali ayim ṯorki uni gwo mo ki a’di ṯorki’da ris to gwansan eya yim mo be.

¹⁹Dhali ki mo ta mom’pimpili/ mo ka tee c̱aan mo jin ta’da cim jin ṯwa/a/ ka dhas mo tani acampur gu’bi ’baar mo ’kokin ki mu’th mo e mo jin ’kokina imanciḵ a’di gwo nycine/ mo haali/ uni ḵo/ki ’Kwani Yahuuda/ mo. Dhala Yesus p̱u’dki’d mo dhali doshi bwam uni mo dhali o uni gwo mo ki: Moŋḵu’th is midi di e um mo.

²⁰Ki a’di oki gwo yansan mo tani a’di ki ṯor uni me’d piti i e mo dhali gwar piti mo be. Dhali yan’ko’d imanciḵ a’di gwo ’kunykina bwa mo mmop̱arkina uni Tap̱a e mo be.

²¹Yesus ki o uni gwo doḵ/e mo ki: Moŋḵu’th is midi di e um mo. Me’d jin hashkin ma Baba aha/ mo tani isi kan si’da/ aha/ hashkina um mo be.

²²Dhali ki a’di oki gwo yansan mo tani a’di shi/inki’da p̱o/ uni mo dhali o uni gwo mo ki: Budhi Shi/in Dheleladhelel mo ma.

²³Waḵki/ um gwamki miinthus gi cin tiya mo tani uni gwamkunu mo, dhali waḵki/ um ’koki gwam miinthus gi cin tiya mo tani uni ’konuki gwam mo be.

²⁴Dhala Ṯuuma a’di jin ta jan ṯal ’de/ ’peni uniŋ ’kume’d i’ce’dka su/ mo, a’di jin yuḵkunu gway ka ’ci jin dhodhu isu/ mo tani a’di diki di i uni me’d jin p̱u’dkin ma Yesus mo be.

²⁵Wakan imanciḵ a’di gwon tiya ṯorki a’di gwo mo ki: Aman p̱arkina Tap̱a e mo. Hili a’di ki o uni gwo mo ki: Isi ciki/ aha/ mina ’taki p̱ara du’d ma musmaar e mo e me’d piti mo dhali dwar me’d pem e jisan ma musmaar mo dhali dwar me’d pem e gwar piti mo tani aha/ mina diki gam gwo is mo be.

²⁶Acim pekwara ŋ’ko’d mo tani imanciḵ a’di gwo ’kokini bwaŋ gu’b doḵ/e mo, dhala Ṯuuma nyaḵki di ki uni mo. Dhali acampur gu’bi ’baar mo ’ko ki mu’th mo. Hila Yesus p̱u’dki’d mo dhali doshi bwam uni mo dhali o gwo mo ki: Moŋḵu’th is midi di e um mo be.

²⁷Dhali yan’ko’d a’di ki owa Ṯuuma gwo mo ki: Kari me’d pini imahan mo dhali p̱ari me’d pem e mo, dhali hethi me’d pini mo dhali dwari a’di e gwar pem mo. Dhalku/ ki di ki dar gi gwo jin gamu is kan mo, hili gami gwo is mo ma.

²⁸Ṯuuma thoḵ a’di gwo mo ki: Tap̱am pem dhali Arumgimis pem.

²⁹Yesus ki o a’di gwo mo ki: A/gwo gama /e is mo haali/ /e p̱arki aha/ e mo? Mom’bor mii ’te/ be gom uni gwansan kun mini gam aha/ gwo is mo ki uni ’koki p̱ar aha/ e naskina/ mo be.

³⁰Dhala Yesus mii’da ris miimera tiya ka ris mo ibuŋ’kusi imanciḵ a’di gwo mo, uni kun ’konuki ’kwar eya warka/ yansan mo be.