YOHAAN 19:5-41

⁵Wakan aYesus a’di yaki’d ka pije/ mo mmohi’th toŋ’kup̱ ma ’de/ mo dhali burrinyen duḵ is mo, dhala Bilaaṯus ki o uni gwo mo ki: Wathi/ a’dahan mo be.

⁶Ki igasiis kun can mo dhali imanji mo mo p̱arki a’di e mo tani uni ḵumki cuuwa/ kagahara mo mmo/o gwo mo ki: ’Koshi a’di ki cwany’ciṯẖan dhul mo. ’Koshi a’di ki cwany’ciṯẖan dhul mo. Dhala Bilaaṯus ki o uni gwo mo ki: Guyi um a’di ki is bum mo dhali ’koshi a’di ki cwany’ciṯẖan dhul mo haali/ aha/ dinaki gam toŋ kamu/ e a’di jin miga/ yer a’di is ki gway mo be.

⁷’Kwani Yahuuda/ ki thoḵ a’di gwo mo ki: Aman tana gi gwoŋḵan jin c̱ikunu mo dhali ki gwoŋḵan jin c̱ikunu mo tani a’di ḵa ba/ imidi wu moyi, haali/ a’di kar is piti mmota Ya/ ma Arumgimis mo be.

⁸Ka Bilaaṯus ciḵki gwo gwansan mo tani a’di ḵo/ki is kagahara mo be.

⁹A’di cic̱ki mo ma mudhiir doḵ/e mo dhali owa Yesus gwo mo ki: Ki /e ’peni mana sa/? Hila Yesus c̱i a’di gwon thoḵa kamuwa?

¹⁰Wakan Bilaaṯus ki o a’di gwo mo ki: /E mini diki thoḵ aha/ ’twaa? Dina /e ki mish ki aha/ tana gi mom’bi’th mo mmo’cuḵ /e mo dhali tana gi mom’bi’th mo mmo’kosh /e ki cwany’ciṯẖan dhul mo?

¹¹Yesus thoḵ a’di gwo mo ki: /E mini ’taki dar gi mom’bi’th ap̱o/ aha/ mo, hili isi ciki/ a’di jin c̱iyunu /e ’peni momis mo. Wakan si’da/ a’di jin c̱iki /e aha/ mo tani a’di cana miinthus mo be.

¹²’Peni mo yan mo tani Bilaaṯus ŋap̱ki bway mo mmo’cuḵ a’di mo, hili ’Kwani Yahuuda/ ḵumki cuuwa/ mo mmo/o gwo mo ki: Waḵki/ /e mini dhal wathi/ yan me’d mo tani /e yisa tana mugu ma Kaysara. Haali/ aris ’kwani ’baar mo ka ’deṯe/ ’deṯe/ kun dhu is buni ka maliḵ mo tani uni dhu is buni ap̱owa Kaysar mo be.

¹³Ka Bilaaṯus ciḵki gwo yansan mo tani a’di suski’da Yesus ka pije/ mo dhali a’di ki c̱a’ba ’cesh ap̱owa ḵursi jin dwallu gwo mo e mo ma ’cesh jin yuḵkunu gway ka A’cesh jin Rusu Mmoc̱i Jamas mo dhali jin ta ’twaŋ ’Kwani Ibraniyiin ka Jabbaaṯẖa mo be.

¹⁴Dhali a’di ta’da tee jin Thosonkunu to mo gom Mompe’kup̱anyolos mo, dhali a’di ta’da tente/ ibwaŋ’kup̱ mo be. A’di ki o ’Kwani Yahuuda/ gwo mo ki: Amaliḵ bum a’dan mo be.

¹⁵Dhali uni ḵumki cuuwa/ mo mmo/o gwo mo ki: A’di ka bor ’de/ mo. A’di ka bor ’de/ mo. ’Koshi a’di ki cwany’ciṯẖan dhul mo. Bilaaṯus ki o uni gwo mo ki: Miga/ ’kosha Maliḵ bum ki cwany’ciṯẖan dhula? Dhali igasiis kun can mo thoḵ a’di gwo mo ki: Aman ’konaki ta ga maliḵa kamu/ mo ba/, hila Kaysar a’di ’de/ mo be.

¹⁶Dhali yan’ko’d a’di ki c̱iki a’di ki uni mo mmo’kosh ki cwany’ciṯẖan dhul mo be.

¹⁷Wakan uni bu’thkina Yesus mo dhali a’di yaki’d ka pije/ mo mmoḵal cwany’ciṯẖan dhul pitiŋ gana/ mo e mo jin yuḵkunu gway ki mo ma simaŋ ’kup̱ mo, a’di jin yuḵkunu gway ki ’twaŋ ’Kwani Ibraniyiin mo ka: Gulguṯẖa mo be.

¹⁸Uni ki ’kosh a’di ki cwany’ciṯẖan dhul imun mo dhali ’kwanin sun tiya si’da/ nyaḵkunu ’kosh ki a’di mo, jan ṯal ’deŋ kamu/ ki ’bana kamu/ mo, dhali jamu/ ki ’bana kamu/ mo dhala Yesus ibwamani uni mo be.

¹⁹Bilaaṯus si’da/ a’di ’kwarki gwo mo dhali kari ’kup̱ cwany’ciṯẖan dhul mo, a’di jin deŋkunu e mo ka: Yesus gi Pa Naasira, jin ta’da Maliḵ gi ’Kwani Yahuuda/ mo.

²⁰’Kwani Yahuuda/ ka ris deŋki gwo yansan e mo jin ’kwarkunu mo haali/ mo jin ’koshkunuwa Yesus ki cwany’ciṯẖan dhul mo tani a’di ’dishki ’peŋkuman bampa/ is mo dhali a’di ’kwarkunu ki ’twaŋ ’Kwani Ibraniyiin mo dhali ki ’twaŋ ’Kwani Ithaliyaan mo dhali ki ’twaŋ ’Kwaniŋ Griḵi mo be.

²¹Dhali yan’ko’d igasiis kun can gi ’Kwani Yahuuda/ mo okina Bilaaṯus gwo mo ki: Dhalku/ gwo ki ’kwar mo mmo/o ka: Maliḵ gi ’Kwani Yahuuda/ mo, hili, ’kwari gwo mo mmo/o ki: Wathi/ yansan o’d ki: Aha/ tana aMaliḵ gi ’Kwani Yahuuda/ mo be.

²²Bilaaṯus thoḵki gwo mo ki: A’di jin ’kwarka/ mo tani ’kwarkika/ mo be.

²³Dhali ki i/askar mmo’koshkina uniya Yesus ki cwany’ciṯẖan dhul mo tani uni ki bu’th burrinyem piti mo dhali pwaḵ a’di bwa mo she doŋon mo, jan ṯal ’de/ goma askar ki she/ she/ mo. Hili burrinyem bwaman piti jin uḵu ki dar gi mosho mo, miikunu mo ’peni ’ba/ tagi bum’pen mo be.

²⁴Wakan uni oki gwo ka rem ’kup̱ mo ki: Dhalkina ki dher a’di bwa mo, hili ana ki biṯ to mo gom a’di mo ki ana mina p̱ar e mo ki a’di midi ta jim maja mo. A’di ta gwo jin thimkunu moyi me’d gwo jin ’kwarkunu mo e Gwo ma Arumgimis mo ki: Uni ḵwa/ki burrinyem pem bwa mo e bwam uni mo, dhali gom burrinyem pem mo tani to ṯagkina uni mo be.

²⁵Wakan i/askar uni miiki to yansan mo. Hili uni kun doshkin ki ’dishe/ e cwany’ciṯẖan dhul ma Yesus mo tani ta a’di jin ta kum mo dhali ’bwaham gi kum mo be, dhala Mariyam jin ta ash ma Kiluuba mo dhala Mariyam Magdaliyya mo.

²⁶Ka Yesus p̱arki kum e mo dhali amanciḵ a’di gwo jin ena a’di kagahara jin doshki’d ki ’dishe/ mo tani a’di ki o kum gwo mo ki: A’boma, hili ya/m pini mo ma.

²⁷Dhali yan’ko’d a’di ki owa manciḵ a’di gwo gwo mo ki: Hili kwan mo ma. Dhali ’peni mo c̱aan mo tani amanciḵ a’di gwo suski’da yim bway gu’b pitiŋ gana/ mo be.

²⁸’Ko’di mo yansan mo tani Yesus mmomishkina a’di ka ris to ’baar mo ki uni ’baarkunu mo tani oki gwo mo (mmothim Gwo moyi jin ’kwarkunu mo) ki: Aha/ butha yi’de/ mo be.

²⁹Dhali toŋ’kul bwaŋ kamu/ diki’d mo jin ’tu’dkunu mo ki yiman tom’pac̱a’d mo. Wakan uni ki p̱aca lip̱a/ mo mmo’tu’d a’di ki yiman tom’pac̱a’d mo dhali kar a’di e cwa jin wana e ki cwa ma ’tasha jal bip̱ mo dhali kar a’di e ’twam piti mo be.

³⁰Ka Yesus bu’thki yiman tom’pac̱a’d mo tani a’di ki o gwo mo ki: A’di ’baarki’d mo, dhali a’di ki luŋ ’kup̱ piti mo dhali c̱i shi/in piti mo be.

³¹Me’d jin tana a’di atee jin Thosonkunu to mo, ki buŋgwar is mini ’taki ’koki ’ko ap̱o/ cwany’ciṯẖan dhul ka cim ma pesu/ mo (haali/ acim ma pesu/ c̱aan ta’da cim jin eḵa/ eḵ mo) tani ’Kwani Yahuuda/ doṯkina Bilaaṯus ’twa/ mo ka yorom buni minu ’taki ’ce’d mo dhali ki uni minu ’taki ḵal mo be.

³²Wakan i/askar uni p̱u’dkin mo dhali ’ce’da yoro gi a’di jin ṯwa/a/ mo dhali ji gi a’diŋ kamu/ jin nyaḵkunu ’kosh ki cwany’ciṯẖan dhul ki a’di mo.

³³Hili ki uni p̱u’dkina Yesus mo dhali p̱ar a’di e mo ki a’di wuki’d hila/ mo tani uni ’koki ’ce’da yorom piti mo be.

³⁴Hila askara ’deŋ kamu/ su’kki a’di gwar ka mee mo dhali ki jahanne/ abas guski’d mo dhali yi’de/ mo be.

³⁵A’di p̱arki a’di e mo tani a’di oki gwo mo be – gwom piti jin ṯorkina a’di mo tani ta gwoŋ gana/ mo dhali a’di mishki’d ki a’di ṯorki gwoŋ gana/ – ki um si’da/ mini gam gwo is mo be.

³⁶Haali/ to gwansan uni bu’thki mo mo mmothim Gwo ma Arumgimis jin ’kwarkunu moyi ki: Asiman ṯal ’deŋ kamum piti minu ’koki ’ce’d mo be.

³⁷Dhali doḵ/e Gwo ma Arumgimisa kamu/ jin ’kwarkunu mo o gwo mo ki: Uni mini hil a’di mo a’di jin su’kkina uni mo be.

³⁸’Ko’di mii yansan mo tani Yuusup̱ gi Pa Arraama, a’di jin ta’da manciḵa Yesus gwo mo, hili ki kup̱ mo, haali/ a’di ḵo/ki ’Kwani Yahuuda/ mo, dhali a’di doṯki’da Bilaaṯus ’twa/ mo ki a’di midi ’taki ḵal buŋgwar is ma Yesus mo dhala Bilaaṯus dhalki a’di bway mo be. Wakan a’di p̱u’dki’d mo dhali ḵal buŋgwar is piti mo be.

³⁹Nikudimus si’da/ a’di jin yayi’di a’di nṯwa/a/ mon’thiny mo, a’di p̱u’dki’d mo mmoḵal yiman cwa jin yuḵu ka murr jin ’koshi e ki yiman cwaŋ kamu/ jin wana e ka ’kwaṯan mo, a’di jin ḵuyi mo ki ḵuy mo, dhali jin baru ka raṯul iss ’kwanimpa imudhe’d mo be.

⁴⁰Uni ki ḵal buŋgwar is ma Yesus mo dhali ’tam a’di is ki burrinyen dhiny e mo dhali to kun ḵuyi mo ki ḵuy mo me’d mii jin miina ’Kwani Yahuuda/ mo mmokana kan mo be.

⁴¹Dhali e mo jin ’koshkunu a’di ki cwany’ciṯẖan dhul nycine/ mo tani bwam monsinu di’d mo dhali e monsinu mo tani jis jwa jin ta jin this diki’d mo jin dinuki kar wathiŋ kamu/ nycine/ naskina/ mo be.