Yohɑɑnɩ 8:40-51

⁴⁰Anɩ tɑmpɑnɑ nnɑ mɑ nɩɩ Ɩsɔ kiŋ tɔ, ɑ tike kɛ mɑ heelɑ-mɛ, pǝ́cɔ́ pɑɑ nɑ mpʋ ɩ́ cɑɑ ɩ́ kʋ-m tǝkpem. Ɩlɛ Apǝlɑhɑm nɑ́ tɑɑ lɑ mpʋ.

⁴¹Mǝ cɑɑ kʋlɑpʋtʋ kɛ ɩ́ lɑkɩ. Tǝnɑɣɑ Fɑlisɑnɑɑ cɔ Yesu sɩ: Tǝ tɑ kɛ ɑpɑlɑɑ nɑɑlɛ piyɑ se. Amɑ tɑ Cɑɑ kɛ kʋlʋm kɛ́, ɩnǝɣǝlɛ Ɩsɔ.

⁴²Ɩlɛnɑ Yesu tɔ Fɑlisɑnɑɑ sɩ: Ye tɑmpɑnɑ, Ɩsɔ kɑ kɛ́ mǝ Cɑɑ, ɩ́ kɑ sɔɔlɑ-m. Mpi tɔ, ɩ kiŋ kɛ mɑ lɩɩnɑɑ, nɑ ɩ kɔntɛ kɛ mɑ kɔmɑ. Mɑ tɑ kɔɔ mɑ mɑɣɑmɑɣɑ mɑ kɔntɛ. Amɑ ɩnɩ ɩ tilinɑ-m.

⁴³Pǝ tɑɣɑ pʋlʋ tɔɔ kɛ́ ɩɩ cɛkǝɣǝnɑ mɑ kʋyɔɣɔtʋtʋ, ɩɩ cɑɑ tǝ nɩɩʋ kɛ pɑɑ pǝcɔ tɔɣɔ.

⁴⁴Mǝ Cɑɑ kɛlɛ Ɩlɔɣɔʋ, nɑ ɩ luɣu nyǝntʋ kɛ mǝ sɔɔlɑ lɑpʋ. Hɑtoo kɑncɑɑlɑɣɑ ɩ́lɛ́ ɩ kɛ́ yʋlʋkʋlʋ kɛ́, ɩɩ cɑɑ tɑmpɑnɑ tǝŋʋɣʋ kɛ pɑɑ pǝcɔ. Pǝ tɑɣɑ pʋlʋ, ɩ mɑɣɑmɑɣɑ ɩ tɑ kɛ tɑmpɑnɑ tʋ tɔ pǝ tɔɔ. Wɑɑtʋ wei ɩ yɔɣɔtǝɣɩ pɔpɔtʋ tɔ, ɩ tǝnɑɣɑlɛ tǝnɑ. Mpi tɔ, ɩ mɑɣɑmɑɣɑ ɩ kɛ́ pɔpɔtʋ, nɑ pɔpɔtʋ tǝnɑ cɑɑ kɛ́.

⁴⁵Ye mɑ, tɑmpɑnɑ kɛ mɑ yɔɣɔtǝɣɩ. Pǝ mɑɣɑmɑɣɑ pǝ tɔɔ kɛ́ ɩɩ mʋɣɩ mɑ tɔm.

⁴⁶Mǝ tɑɑ ɑwe pǝsǝɣɩ nɑ ɩ́ hʋ́lɩ́ mɑ tǝpǝntǝlɛ? Tɔʋ, nɑ mɑ tɩɩ yɔɣɔtǝɣɩ tɑmpɑnɑ tɔ, pepe tɔɔ kɛ́ ɩɩ sɑŋ mʋɣʋ?

⁴⁷Wei ɩ kɛ́ Ɩsɔ nyǝŋ tɔ, pʋntʋ nɩɩkɩ Ɩsɔ Tɔm kɛ́. Amɑ mǝ tɑ́ kɛ́ Ɩsɔ yǝlɑɑ nɑpǝlɩ, nɑ pǝ tɔɔ ɩnǝɣɩ ɩɩ tɩɩ nɩɩkɩ.

⁴⁸Tǝnɑɣɑ Yutɑ nyǝ́mɑ cɔ-ɩ sɩ: Pǝ tɑɣɑ ɩsǝntɔ tɔɔ kɛ́ tɩɩ tɔmɑ sɩ n kɛ́ Sɑmɑlii tʋ, pǝ́cɔ́ n hii ɑlɔɣɑɑ?

⁴⁹Ḿpʋ́ɣʋ́ Yesu cɔ-wɛ sɩ: Mɑ tɑ hii ɑlɔɣɑɑ kɛ pɑɑ pǝcɔ. Amɑ mɑ Cɑɑ kɛ mɑ seeki. Nɑ mɛ, mɩɩ nyǝnǝɣɩ-m yem tǝkpɑtɑɑ.

⁵⁰Pǝ tɑɣɑ ɩsɩɩ mɑ́ pɛɛkǝɣǝnɑ mɑ mɑɣɑmɑɣɑ mɑ teeli kɛ mɑ tɩ. Nɔɣɔlʋ tʋɣʋnɑ-m teeli nɑ ɩ́ hɑɑkɩ-m tɑmpɑnɑ.

⁵¹Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ, ye wei ɩ tɔkǝɣɩ mɑ tɔm, pʋntʋ kɑɑ sɩ.