Yohɑɑnɩ 7:13-33

¹³Pɑɑ nɑ mpʋ Yutɑ nyǝ́mɑ sɔɣɔntʋ tɔɔ nɔɣɔlʋ tɑɑ yɔɣɔtǝɣɩ tǝfoo.

¹⁴Pǝ kɔmɑ nɑ ɑcimɑ hɑɣɑ hɛkʋ, ɩlɛnɑ Yesu polo nɑ ɩ́ sʋʋ Ɩsɔ tǝsɛɛlɛ tɑɑ nɑ ɩ́ sɛɣɛsǝɣɩ.

¹⁵Ḿpʋ́ɣʋ́ pǝ lɑpɑ Yutɑ nyǝ́mɑ kɛ piti, nɑ pɑ́ tɔŋ sɩ: Ɩsǝnɑɣɑ pǝ lɑpɑ nɑ ɩ́ nyɩ pǝ tǝnɑɣɑ mpʋ pǝ́cɔ́ ɩ tɑ lɑ ceu?

¹⁶Tǝnɑɣɑ Yesu cɔ-wɛ sɩ: Nti mɑ sɛɣɛsǝɣɩ ɩsǝntɔ tɔ, mɑ tɑ lu-tǝɣɩ kʋlupu. Amɑ wei ɩ tilɑ-m tɔ ɩnɩ ɩ hʋlǝnɑ-m-tɩ.

¹⁷Ye wei ɩ sɔɔlɑ Ɩsɔ luɣu nyǝntʋ tǝŋʋɣʋ, pʋntʋ tike kɑ nyǝnɑ sɩ mɑ kʋsɛɣɛsǝtʋ lɩɩnɑ Ɩsɔ kiŋ yɑɑ mɑ mɑɣɑmɑɣɑ mɑ kɑŋkɑntɛ kɛ mɑ lɑkǝnɑ.

¹⁸Wei ɩ lɑkǝnɑ ɩ kɑŋkɑntɛ tɔ, ɩ mɑɣɑmɑɣɑ ɩ sɑm kɛ ɩ pɛɛkǝɣɩ. Amɑ wei ɩ pɛɛkǝɣɩ ɩ tillu sɑm, pʋntʋ ntɛ́ tɑmpɑnɑ tʋ, pɔpɔtʋ fɛɩ ɩ kiŋ.

¹⁹Ntɔŋ Moisi hʋlɑ-mɛɣɛ Ɩsɔ sɛɛʋ kʋsǝsɩɩtʋ tǝnɑ nɑ? Pǝ́cɔ́ pɑɑ mǝ tɑɑ kʋlʋm ɩɩ tǝŋǝɣɩ-tɩ. Aŋhɑ, nɑ ɩ́ cɑɑ ɩ́ kʋ-m suwe?

²⁰Ḿpʋ́ɣʋ́ sɑmɑɑ cɔwɑ Yesu sɩ: N nyǝnɑ ɑlɔɣɑɑ kɛ? Awe cɑɑ ɩ kʋ-ŋ?

²¹Tǝnɑɣɑ Yesu cɔwɑ sɩ: Pǝ tɑɣɑ pʋlʋ, wule tǝlɩ mɑ lɑpɑ tǝmlɛ sɔsɔɔlɛ nɑtǝlɩ nɑ piti kpɑ mǝ tǝnɑ.

²²Moisi nɑ́ tʋ-mɛɣɛ pɛlʋɣʋ, (pǝyele pǝ tɑ tɩɩ kɛʋ Moisi kiŋ kɛ pǝ lɩɩnɑɑ. Amɑ hɑtoo mǝ cɑɑnɑɑ cɑɑnɑɑ kiŋ kɛ́,) nɑ pɑɑ kʋyɑkʋ kʋhɛɛsʋɣʋ wule ɩ́ pɛlǝɣɩ pǝyɑɣɑ kɛ́.

²³Ye ɩ́ pɛlǝɣɩ pǝyɑɣɑ kɛ kʋhɛɛsʋɣʋ wule sɩ pǝ tɑɑ kɔɔ nɑ ɩ́ yɔkɩ Moisi kʋsǝsɩɩtʋ. Pepe tɔɔ kɛ́ mɑ́ wɑɑ yʋlʋ pilimile tǝcu kɛ kʋhɛɛsʋɣʋ wule nɑ mɩɩ mʋ-m nɑ pɑ́ɑ́nɑ́?

²⁴Ɩ́ tɑɑ nyǝnǝɣɩ tɔɔ tike. Amɑ ɩ́ tǝŋǝɣɩ tɑmpɑnɑ nɑ pǝ́cɔ́ ɩ́ yɔɣɔtǝɣɩ.

²⁵Yosɑlɛm nyǝ́mɑ nɑpǝlɩ pɑ yɔɣɔtɑɣɑ sɩ: Pǝ tɑɣɑ wei pɑ pɛɛkɑɣɑ sɩ pɑ kʋɣɩ tɔɣɔlɛ?

²⁶Ɩ́ nyǝnɩ ɩ́lɛ́ ɩ mǝlɑɑ nɑ ɩ́ yɔɣɔtǝɣǝnɑ-wɛ nɑ ɩɩ nyɑŋnɑ pʋlʋ, nɑ pɑ́ sumɑ. Ɩsɩɩ tɑ́ sɔsɑɑ mpɛ pɑ tɛŋ pɑ tɑɑ sɩ ɩ kɛ́ Mesii kɛlɛ yɑɑ?

²⁷Tǝ nyǝmɑ́ sɩ wɑɑtʋ wei Mesii kɑ́ kɔɔ tɔ, nɔɣɔlʋ ɩɩ nyǝŋ ɩ tɛ. Tɔfɔ ye pǝ kɑɑsɑ ɩnɛ ɩlɛ, tǝ nyǝmɑ́ ɩ́lɛ́ ɩ tǝlɩɩlɛ mɛɛ.

²⁸Yesu tɔŋnɑ sɛɣɛsʋɣʋ kɛ ḿpʋ́ɣʋ́ Ɩsɔ tǝsɛɛlɛ tɑɑ, ɩlɛnɑ ɩ́ pɔɔsɩ-wɛ nɑ nɔɣɔ sɔsɑɣɑ sɩ: Mɛ sɩ ɩ́ nyǝmɑ-m, nɑ ɩ́ nyǝmɑ́ mɑ tǝlɩɩlɛ yɑɑ? Aɑɩ, mɑ tɑ kɔɔ mɑ mɑɣɑmɑɣɑ mɑ kɔntɛ se. Amɑ wei ɩ tilɑ-m tɔ ɩ wɛɛ nɑ ɩ kɛ́ tɑmpɑnɑ tʋ. Ɩlɛ mǝ tɑ nyǝmɩ-ɩ.

²⁹Amɑ mɑ, mɑ nyǝmɑ-ɩ, pǝ tɑɣɑ pʋlʋ tɔɔ, ɩ kiŋ kɛ mɑ lɩɩnɑɑ, nɑ ɩnɩ ɩ tilinɑ-m.

³⁰Yǝlɑɑ luɣu lɑpɑ sɩ pɑ́ kpɑ-ɩ, ɩlɛ nɔɣɔlʋ tɑ tʋ niŋ kɛ ɩ tɔɔ, ɩ wʋlɛ tɑ tɑtɑ tɔ pǝ tɔɔ.

³¹Pɑɑ nɑ mpʋ sɑmɑɑ ɩnɩ ɩ tɑɑ pɑɣɑlɛ mʋ Yesu tɔm nɑ pɑ́ tɛ pɑ tɑɑ. Hɑlǝnɑ pɑ́ tɔŋ sɩ: Mesii ɩ kɔmɑ ɩ kɑ́ lɑ piti tǝmɑ nɑ ɑ kǝlɩ ɩnɛ ɩ nyǝnɑ nɑ?

³²Pǝ kɔmɑ nɑ Fɑlisɑnɑɑ nɩɩ nti sɑmɑɑ miitiɣi Yesu tɔɔ tɔ, ɩlɛnɑ pɑ́ nɑ kɔtǝlɑɑ sɔsɑɑ pɑ́ tili filisinɑɑ sɩ pɑ́ polo pɑ́ kpɑ-ɩ.

³³Tǝnɑɣɑ Yesu tɔmɑ sɩ: Pǝ kɑɑsɑ-m wɛɛ nɑɑlɛɣɛ mǝ hɛkʋ kɛ́, ɩlɛnɑ mɑ́ mǝlɩ wei ɩ kɑ tilɑ-m tɔ ɩ kiŋ.