Yohɑɑnɩ 5:18-43

¹⁸Tɔm tǝnɛ tǝ mɑɣɑmɑɣɑ tǝ tɔɔ Yutɑ nyǝ́mɑ mʋ sɔɣɔnɑ kɛ teu sɩ pɑ lǝsǝɣɩ Yesu weesuɣu. Sɩ pǝ tɑɣɑ kʋyɑkʋ kʋhɛɛsʋɣʋ tike kɛ ɩ wɑkǝlɑɑ, pǝ kpɛnnɑ ɩsǝnɑ ɩ kɛɛsɑ ɩ tɩ nɑ Ɩsɔ nɑ ɩ́ yɑɑ-ɩ ɩ mɑɣɑmɑɣɑ ɩ Cɑɑ tɔ pǝ tɔɔ tɔtɔ.

¹⁹Ḿpʋ́ɣʋ́ Yesu tɔmɑ-wɛ sɩ: Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ. Pǝyɑɣɑ mɑ mɑ kɑɑ lu nɑtǝlɩ nɑ mɑ́ lɑ. Amɑ nti mɑ Cɑɑ tɔŋɑ lɑpʋ nɑ mɑ́ nɑɑkɩ tɔ ntǝɣɩ mɑ tǝŋǝɣɩ. Mɑ Cɑɑ lɑkɩ pǝ tǝnɑ mpi tɔ, Pǝyɑɣɑ mɑ mɑ lɑkɩ-wɩ tɔtɔɣɔ.

²⁰Pǝ tɑɣɑ pʋlʋ, mɑ Cɑɑ sɔɔlɑ-m kɛ́, nɑ ɩ́ hʋ́lɩ́-m pǝ tǝnɑ mpi ɩ lɑkɩ tɔ. Ɩ kɑ́ hʋ́lɩ́-m tǝmɑ sɔsɔɔnɑ nnɑ ɑ kǝlɑ ɑnɛ tɔ sɩ mɑ́ lɑ, nɑ pɩɩ lɑ-mɛɣɛ hɑ.

²¹Ɩsɩɩ mɑ Cɑɑ feesiɣi sǝtɑɑ nɑ ɩ́ mǝnnɑ-wɛɣɛ weesuɣu nyǝ́mɑ hɛkʋ tɔ, mpʋ ɩnɩ tɔtɔɣɔ Pǝyɑɣɑ mɑ́ mɑ tʋɣɩ weesuɣu kɛ mpɑ mɑ nɔkɑɑ tɔ.

²²Tǝlɛ tǝ pɑɑsi mɑ Cɑɑ ɩɩ hʋʋkǝnɑ nɔɣɔlʋ. Amɑ ɩ tʋ hʋʋlɛ tǝnɑɣɑ Pǝyɑɣɑ mɑ mɑ niŋ tɑɑ.

²³Ɩlɛnɑ pɑ tǝnɑ pɑ se-m ɩsɩɩ pɑ seekuɣu mɑ Cɑɑ tɔ. Yʋlʋ ɩ́ tɑ se Pǝyɑɣɑ mɑ, ɩ kɑɑ pǝsɩ nɑ ɩ́ se mɑ Cɑɑ wei ɩ tilɑ-m tɔ.

²⁴Tɑmpɑnɑ kɛ mɑ heeliɣi-mɛ yoo, mɑɑ cɛsǝɣɩ, ye wei ɩ nɩɩ mɑ tɔm nɑ ɩ́ tɛ ɩ tɑɑ nɑ wei ɩ tilɑ-m tɔ, ɩ tɛmɑ weesuɣu ŋku kɩɩ tɛŋ tɔɣɔ hikuɣu, pɑ kɑɑ hʋʋnɑ-ɩ. Amɑ ɩ tɛmɑ weesuɣu tʋ kɛ pǝsʋɣʋ kɛ́.

²⁵Tɑmpɑnɑ kɛ mɑ heeliɣi-mɛ yoo mɑɑ cɛsǝɣɩ, pǝ wɛɛ pɩɩ kɔɔ, hɑlɩ pǝ tɩɩ tɛmɑ kɔntɛ te. Sǝtɑɑ kɑ́ nɩɩ Ɩsɔ Pǝyɑɣɑ mɑ́ mɑ nɔɣɔ, mpɑ pɑɑ nɩɩ-kɛ tɔ, pɑɑ fe nɑ pɑ́ kʋlǝnɑ pɑ ɩsɛ.

²⁶Ɩsɩɩ Tɑcɑɑ Ɩsɔ wɛnɑ weesuɣu kɛ ɩ tɑɑ tɔ, mpʋ tɔtɔɣɔ ɩ yelɑɑ sɩ Pǝyɑɣɑ mɑ mɑ́ wɛɛnɑ weesuɣu kɛ mɑ tɑɑ.

²⁷Mɑ kɛ́ Yʋlʋ Pǝyɑɣɑ tɔɣɔ ɩ hɑ-m mpɑɑʋ sɩ mɑ́ hʋʋnɑ yǝlɑɑ kɛ tɔm.

²⁸Ɩlɛ pǝ́ tɑɑ lɑ-mɛɣɛ hɑ. Mpi tɔ pɩɩ kɔɔ nɑ pɑ tǝnɑ mpɑ pɑ wɛ pǝlɑɑŋ tɑɑ tɔ pɑ́ nɩɩ mɑ nɔɣɔ,

²⁹nɑ pɑ́ lɩɩ ɩ tɑɑ. Mpɑ pɑ lɑpɑ kʋpɑntʋ tɔ pɑɑ fe sɩ pɑ́ wɛɛ tɑm tɔɔ. Mpɑ pɛlɛ pɑ lɑpɑ ɩsɑɣɑtʋ tɔ, pɑɑ fe sɩ pɑ́ hʋʋnɑ-wɛ nɑ pɑ́ tʋ-wɛɣɛ sɑlǝkɑ.

³⁰Mɑɑ pǝsǝɣɩ nɑ mɑ́ lu tǝlǝɣɩ mɑ mɑɣɑmɑɣɑ. Amɑ ɩsɩɩ Ɩsɔ kɛɛsǝɣɩ-m tɔ, ḿpʋ́ɣʋ́ mɑ hʋʋkǝnɑ, nɑ mɑ hʋʋlɛ tewɑ. Mpi tɔ, pǝ tɑɣɑ mɑ mɑɣɑmɑɣɑ mɑ luɣu nyǝntʋ kɛ mɑ pɛɛkǝɣɩ lɑpʋ. Amɑ wei ɩ tilɑ-m tɔ ɩ luɣu nyǝntʋ kɛ́.

³¹Ye mɑ yɔɣɔtǝɣɩ mɑ tɩ tɔm, nɔɣɔlʋ kɑɑ sɑ tɑmpɑnɑ wenɑ mɑɑ hʋ́lɩ́ tɔ.

³²Amɑ nɔɣɔlʋ wɛnnɑ nɑ ɩ́lɛ́ ɩ hʋ́lǝ́ɣɩ́ sɩ mɑ kɛ́ tɑmpɑnɑ tʋ. Nɑ mɑ nyǝmɑ́ sɩ nti ɩ yɔɣɔtǝɣɩ mɑ tɔɔ tɔ tǝ wɛ tɑmpɑnɑ.

³³Hɑlɩ mǝ mɑɣɑmɑɣɑ ɩ́ tilɑ mǝ tillɑɑ kɛ Yohɑɑnɩ kiŋ nɑ ɩ́lɛ́ ɩ hʋlɑ-mɛɣɛ tɑmpɑnɑ.

³⁴Ye mɑ, pǝ tɑɣɑ ɩsɩɩ mɑ nyɩɩlɑɑ sɩ yʋlʋ nɔɣɔlʋ ɩ́ hʋ́lɩ́ mɑ tɑmpɑnɑ. Amɑ sɩ pǝ sǝnɑ-mɛ nɑ pǝ yɑ mǝ nyʋɣʋ tɔɔ kɛ́ mɑ yɔɣɔtǝɣɩ mpʋ.

³⁵Yohɑɑnɩ nɑɑ wɛ kɛ́ ɩsɩɩ fǝtǝlɑ wei ɩ mʋɣɩ nɑ pǝ nɑɑkɩ tɔ. Ɩ́ tisɑɑ nɑ ɩ́ yɔɔlǝnɑ fǝtǝlɑ ɩnɩ ɩ nɑʋ kɛ pǝcɔ.

³⁶Amɑ mɑ wɛnɑ mpi pǝ hʋ́lǝ́ɣɩ́ mɑ tɑmpɑnɑ nɑ pǝ kǝlɩ tǝ tǝnɑ nti Yohɑɑnɩ yɔɣɔtɑ mɑ tɔɔ tɔ. Tǝmɑ nnɑ ɩnɩ mɑ Cɑɑ hʋlɑ-m sɩ mɑ́ lɑ nɑ mɑ tɔŋnɑ ɑ lɑpʋ kɛ ɩsǝntɔ tɔ, ɑnɩ ɑ hʋlǝɣǝnɑ mɑ tɑmpɑnɑ sɩ mɑ Cɑɑ tilinɑ-m.

³⁷Mɑ Cɑɑ wei ɩ tilɑ-m tɔ ɩ hʋ́lǝ́ɣɩ́ mɑ tɑmpɑnɑ tɔtɔ. Mɛ ɩ́ tɑ nɩɩ ɩ nɔɣɔ kɛ pɑɑ tɔm kʋlʋm. Pǝ́cɔ́ ɩ́ tɑ loosi ɩ ɩsɛntɑɑ kɛ́ pɑɑ tɔm kʋlʋm tɔtɔ.

³⁸Pǝyele ɩɩ sɑŋ ɩ tɔm mʋɣʋ sɩ tǝ́ cɑɣɑ mǝ tɑɑ kɛ́ pɑɑ pǝcɔ. Ɩlɛ ɩɩ tɛŋ mǝ tɑɑ nɑ wei Ɩsɔ tilɑɑ tɔ, pǝ tɔɔ kɛ́ pǝ wɛ mpʋ.

³⁹Ɩ́ pɛɛkǝɣɩ Ɩsɔ Tɔm tɑkǝlɑsɩ tɑɑ tǝcututu, nɑ ɩ́ tɛɛlǝɣɩ sɩ pǝ tɑɑ kɛ́ ɩ́ kɑ́ hikinɑ weesuɣu ŋku kɩɩ tɛŋ tɔ. Anɩ tɑ́ tɑkǝlɑsɩ kʋlʋmɑsɩ nsɩ sɩ yɔɣɔtǝɣǝnɑ mɑ tɔm.

⁴⁰Pǝ nɑ pǝ mpʋ tɔ, ɩɩ sɑŋ sɩ ɩ́ kɔɔ mɑ kiŋ nɑ ɩ́ hiki weesuɣu kʋpɑŋkʋ.

⁴¹Pǝ tɑɣɑ yǝlɑɑ ɩsɑntɛ kɛ mɑ pɛɛkǝɣɩ.

⁴²Amɑ mɑ nyǝmɑ-mɛ, mɑ nyǝmɑ́ sɩ ɩɩ cɑɑ Ɩsɔ.

⁴³Mɑ Cɑɑ kɔntɛ kɛ mɑ kɔmɑ nɑ mɩɩ sɑŋ mɑ mʋɣʋ. Amɑ ye nɔɣɔlʋ nɑ́ lɩɩ yem nɑ ɩ́ kɔɔ, ɩ́ mʋ ɩ́lɛ́ tǝkpɑ.