Yoane 7:4-23

⁴Ko na sinom̃an osape yeririna la akilia ruru ko, ana omiyum̃ae tapolou ke ga. Visae lelaga nap̃a omiyum̃aen ke pupia kile lala, popon ovanon okate yo punu ga e yomerava.”

⁵Ana visena la ne sanene, sa nap̃a apisa kare ke ga Yesu, vanon lala na ape wenla ruru naapo, ana pe amlelaga re e naga poli.

⁶Ana Yesu pisatam̃e la, pisape “Amiu akilia akila ga kiamiu sur ya e ga e pog nap̃a amiu sinemiun asape ayum̃aenia, ana kiau pupia pogos naga pe pimi re poli wa.

⁷Amiu akilia akila ga kiamiu yum̃aena la woga ga, yeririna la tap̃atete avisa kare amiu vanonia, ana pogos nap̃a in na nekila kiau yum̃aena, nepisawal sane p̃elaga viowa kiena la na yomarava pe mesmes re poli, ana la sinela kar inu pap̃isi.

⁸Ve sanene na amiu ga ava ma Yerusalem, in na nesum̃a e nini wa. In na tap̃atete neva nakaten maran yar lala e p̃ap̃agena nene, vanon kiau pog pimi ke rui, ana pe pimi punu re poli wa.”

⁹Naga pisa visena nene pan la, siraunia apavin, naga sum̃a ga.

¹⁰Yesu sum̃a sane na, pe piavi re poli, naga m̃ena pa ma Yerusalem, ana pe pa re sa nap̃a yeririna la akilia poli, naga tapoloun la ga.

¹¹Ana yerkawa kiena le Yu lala, asitom ke pa rui sape pona naga m̃ena ga vam e p̃ap̃agena, ana la akalewele, apiun asape naga m̃eke pe.

¹²Ana yeririna m̃ena lala, asun apisayu lue ga naga, lap̃asia asape naga pe yar wo tai, lap̃asia asape naga pe yaru viowa ga, nap̃a kila kare ke ga sitomen kien yeririna lala.

¹³Asun apisayu ke Yesu sanene na, pe apisawal manene re pa e yo metava poli, vanon asitom ke asape visae kiela yar keviu la aloge, yoko akila viowa van la.

¹⁴Ana akila m̃a p̃ap̃agena pano-o, legiena p̃as p̃aro rui, ana Yesu pisu sane monar va ma Yum̃a Wa M̃ana ne Ntewa vena vian si yeririna lala.

¹⁵Ana pogos nap̃a yerkawa kiena le Yu la amloge kiena navianena nowo lala, amilan pap̃isi, apisape “!Sanape na yar nene kilia ruru visena kiena ne Ntewa sanene? !Naga pe apian re nena ga, ana kiena navianena po na po!”

¹⁶Ana sanene na Yesu pisawal pan la, pisape “Sur nap̃a nepian lan ke ne, pe kiau re poli, pe kiena ne Ata ga nap̃a mligan inu nepitom tano e yomarava nini.

¹⁷Visae yar tai kekaran ga kila nasinenanena kiena ne Ata, yoko naga kila yar nene loge kilia sitom ruru kiau navianena. Yoko yaru nene kilia visu kilale sane in na pe nepian re yeririna la e ga e kiau kia poli, ana kilia visu kilale sane navianena la nene, pe lelaga nap̃a amolue kemua e Ntewa.

¹⁸Visae tevisu yar tai vis ke ga e kiena kia, tekilia ga sane naga miyeluar ga kiena kia. Ana visae yar nap̃a pis, miyeluar ke ga kia kiena ne kiena yerkawa nap̃a mligan naga pimi, tekilia ga sane pe lelaga ga, naga pe pisokan re poli.

¹⁹“Yar tai ne kila sanene nane Mosis. Ntewa mla kiena navisaluaena pania, a naga pisaliluen pimi pan amiu, ana asum̃a akilaro ke pa narui. Ana sanape na asape awem̃ar inu vanon asape nekilaro navisaluaena. ?Pogaga na sanene?”

²⁰Ana yeririna la apisatam̃ea, apisape “!Kue-e, nagane na opis wowe ke ga, sa ga yermare tai teke e ko! ?Ane sape wem̃ar ko? Ovisawal lia.”

²¹Ana Yesu pisatam̃ea, pisape “Nanua e pogos nap̃a nepim e yo nini, in na nekila pupia kile tai e maramiu, netamalia laulu nene. Ana pogos nap̃a apisuia, pe akekaran re poli, apisape in na nemiyum̃ae piowa ga nap̃a nekila sanene e Legiena Wa.

²²Ana popon asitom̃ali kieta p̃elaga na kilaen p̃aviu, sa nap̃a yermarua Mosis amio yermarua na sumo tap̃ena lala, sane Epraam lala, la amla pan ita. Naga m̃ena pe yum̃aena tanea, ana visae kana legiena nena sulologia Legiena Wa, pe asitom̃al re poli, amiyum̃aen ga.

²³Amiu asum̃a apisa ke asape amon kilaroen navisaluaena kiena ne Mosis, ana atam̃an luen ga asape nakilaen yum̃aena na p̃aviu e Legiena Wa pogaga. Ana visae atam̃an nene, vanon ya ne sinemiu karnu keviu vanon ga kiau narin yum̃aena wo taaga ga nene nap̃a nekila ruru si yepen yaru nene e Legiena Wa?