Yoane 7:38-51

³⁸Yar nap̃a mlelaga e inu, yoko wo van vap̃isi, sa nap̃a Nasiriena Wa pisa, pisape !Yar na sanene, yoko losinena ule mamagan wii na malena, vano vano-o tataroi vetania sa nap̃a wii mlau!”

³⁹Ana visena kiena Yesu nene, kana kinasia na Ninuna Wa, vanon naga kilia sape siraunia, lala nap̃a alelaga e naga, yoko atol Ninuna Wa. A e pogos nene, Ninuna Wa pe pimi re poli wa, vanon Yesu sike yomarava wa, pe pa totano re e kiena lele wa poli wa.

⁴⁰Ana pogos nap̃a yeririna la amloge Yesu pion sane na, kiela sitomena la pa pe tap̃ena lala. La p̃asia, apisa asape “Yar nene, naga navisawaliena sane Mosis, nap̃a temlelaga tesape yoko imi.”

⁴¹La p̃asia apisa asape “Ana, pona visae peraga, naga pe kieta Navisaarena kemua.” Ana la p̃as apisatam̃ea, apisape “Peraga, pe visena re tai nap̃a pisa sanene sape Navisaarena yoko ve yeririna nae Kalele sane yar nene poli.

⁴²Nanene komin nap̃a kieta Nasiriena Wa la apisa ke ga asape Navisaarena naga molue ga e lus kiena ne P̃arin Sup̃e Tepet, yoko ve yeririna nae Petleem.”

⁴³Ana p̃arin sitomena moki la ne sanene kila narui yeririna la asu tetai vanon Yesu.

⁴⁴La p̃as pe akekaran re poli, apisu sane popon akuan va e yum̃a nakoaena, ana siraunia peraga, pe yar tai pa re lavis puna poli, vena tararia.

⁴⁵Ana siraun sur la nene, lala na visuaren Yum̃a Wa apa sina ga puna ne p̃arin yar wa amio Varasi lala, vena kilaen navisawalena lala van la. Ana pogos nap̃a am̃alivi e marala, yar keviu la nene pe apisu re Yesu poli, ana apis pan la, apisape “?Awa yar nap̃a memligan amiu apanonia? ?Vanon ya ne amiu pe ap̃ure re naga pimi poli?”

⁴⁶Ana navisuarena la apisatam̃eia, apisape “Imimi memiagogon kiena visena lala po na po, pe yar re si tai poli nap̃a kilia vian ruru ita wo sane naga.”

⁴⁷Ana navisatam̃eena nene kila Varasi la amilania, apisape “!Aulai, nagane na amiu m̃ena, yar nene p̃ere kiamiu sitomena la pa pe wowe!

⁴⁸Amiu atam̃an naga pisa kotalia amiu, ana sanape, apisu sane e imimi yar kerkeviu lala pona imimi Varasi lala, la p̃as amlelaga ea? Peraga yo.

⁴⁹Lala ga nap̃a amlelaga ea, nane p̃ina viowa ga la nap̃a asike ko laa ne, a la pe akilia re sur poli. Pe akilia re kieta navisaluaena poli, Ntewa piain pa nakoaena pan la rui.”

⁵⁰Asum̃a apis m̃arera ke sane na, lala yar tai kilayon ke sape kila kiela visena vito si tano. Nane Nikotimas, nap̃a nanua sumo e yemalo tai pa sun amio Yesu.

⁵¹Naga pisa pan la, pisape, “Ita tepisayu ke yar na sanene na, sa ga nap̃a ita temla ke pa nalip̃ereena pania. Ana kieta navisaluaena pisa lepas nene, pisa sape visae tesape tevis van yar tai, monar tetotano ruru temio e kumali, tela pog vania vena naga kilia visawal kiena sitomena van ita, ana monar teviun naviunena vania vena tekilia tekirawal tesape lelaga kemua naga kila sanene sanene po sanape. Naga nene pe mrapa mesmes nakilaen yum̃aena nene.”