Yoane 7:27-43

²⁷Ana peraga, tap̃atete naga, vanon kieta nalelagaena tai p̃a rui, sape Navisaarena, pogos nap̃a naga kate, yoko tap̃atete yar kilia sape naga su pe na pimi ne. Ana yaru nap̃a Yesu, ita punu ga tekilia ruru pa m̃ana um̃a rui.” Apisa sanene komin am̃ape Yesu na paeme Nasaret, ana peraga, naga paeme Petleem.

²⁸Ana vanon nap̃a apisa ke sanene, Yesu p̃aryon ga navian laena loyum̃a e Yum̃a Wa, pisawal visena nene pan la, pisape “Asitom asape akilia inu, akilia ke lele nap̃a nepim ea, ana in na nepisu sane pe akilia ruru re poli. Nepimi e nini, pe e re ga e kiau sitomena poli, ana yar tap̃ena ga mligan inu nepimi, nap̃a naga pe purp̃es nen lelagaena. A sa nap̃a amninue inu ga, ana amninue m̃ena naga.

²⁹A naga, in ke narui nap̃a nekilia ruru nena naga, vanon naga ke narui nap̃a mligan lua inu nepitom tano e yomarava nini.”

³⁰Ana visena kiena ne Yesu la ne sanene kila am̃areran asape monar atarar naga, ana pe yaru re nena tai nap̃a kilia tol naga, vanon kana pog ne pe pimi re poli wa.

³¹Asape awe mom̃ar naga, ana yaru la moki amlelaga e naga rui, vanon kile la nap̃a miyum̃aenia. Apisa sanini, asape “!Yoko Navisaarena nape nap̃a kilia imi kila si kile ya la nap̃a yuve naga? Peraga, yar nene kieta Navisaarena ke lelaga narui.”

³²Ana Varasi la p̃asia asum̃a amiyagogon ke yeririna la amiilaar ke Yesu e kiela visena lala, ana apa iroro ga, apis pa pupia yar wa lala, na apiranar asape monar akila ga sur tai va Yesu nagane ga ne. Ana amligan kiela lokul navisuaren Yum̃a Wa lala, asape ava akale pulmas tai na tararen Yesu, vena aure si naga vim pula.

³³Ana Yesu pisawalia, pisape “Yoko in na nekilia nesu si nemio amiu yam ve plas ga, p̃isi na nowasup̃e sina puna ne naga nap̃a mligan inu nepimi.

³⁴Pogos nap̃a sa nowasup̃e pae na, amiu akilali nap̃a akale inu vano-o yoko tap̃atete alual inu. Lele nap̃a neva nese ea, tap̃atete aim ea.”

³⁵Ana pogos nap̃a yerkawa kiena ne le Yu la amloge visena nene, asitom p̃ele narui, apisa ke pan la, apisape “?Yar nene pisa ke yo nape ne, nap̃a yoko va ea a p̃isi na tap̃atete ita telual si naga ea? Pona sitom ke pisape va e yo tap̃ena lala e yomarava nap̃a wenla ita le Yu lala ap̃ure apa ea e pog na pupia yaltetaena, ana pisape va vian la m̃ena ga?

³⁶Ana naga pisa ke ya nene, sape takale naga vano-o tap̃atete telual naga. Ana sanapen kiena visena nap̃a pisape naga pa ke lepas tai nap̃a tap̃atete tesiraun naga, tap̃atete teva ea.” Ana e pogos nene, lokul na visuaren Yum̃a Wa la pe atarar re Yesu poli wa.

³⁷Ana akila m̃a p̃ap̃agena nene pano-o, apa atol kana legiena maro, nap̃a sane pe kana pupia legiena nena. Ana pogos nap̃a asike veraga, Yesu sum̃al pion manene sanini, pisawal pisape “Amiu a nap̃a moto karia, popon imi pun inu, mun wii na malena.

³⁸Yar nap̃a mlelaga e inu, yoko wo van vap̃isi, sa nap̃a Nasiriena Wa pisa, pisape !Yar na sanene, yoko losinena ule mamagan wii na malena, vano vano-o tataroi vetania sa nap̃a wii mlau!”

³⁹Ana visena kiena Yesu nene, kana kinasia na Ninuna Wa, vanon naga kilia sape siraunia, lala nap̃a alelaga e naga, yoko atol Ninuna Wa. A e pogos nene, Ninuna Wa pe pimi re poli wa, vanon Yesu sike yomarava wa, pe pa totano re e kiena lele wa poli wa.

⁴⁰Ana pogos nap̃a yeririna la amloge Yesu pion sane na, kiela sitomena la pa pe tap̃ena lala. La p̃asia, apisa asape “Yar nene, naga navisawaliena sane Mosis, nap̃a temlelaga tesape yoko imi.”

⁴¹La p̃asia apisa asape “Ana, pona visae peraga, naga pe kieta Navisaarena kemua.” Ana la p̃as apisatam̃ea, apisape “Peraga, pe visena re tai nap̃a pisa sanene sape Navisaarena yoko ve yeririna nae Kalele sane yar nene poli.

⁴²Nanene komin nap̃a kieta Nasiriena Wa la apisa ke ga asape Navisaarena naga molue ga e lus kiena ne P̃arin Sup̃e Tepet, yoko ve yeririna nae Petleem.”

⁴³Ana p̃arin sitomena moki la ne sanene kila narui yeririna la asu tetai vanon Yesu.