Yoane 3:3-18

³Andeta Yesu itu lâ i kawa ku isia ŋgua papa mine tu, “Naŋa aporo mao nâ pano; ambo tamâta toŋge ipâŋga wasaseki ndo, itogo lâlu puro-puro mine, ande tamâta ŋinde ma ikura tu imo Maro Kindeni ne ŋgumbi ilo. Ambo ipâŋga wasaseki mine tia, ande i ma ikura tu imo ŋgumbi ŋinde ilo, ande tia.”

⁴Nikoteme iporo taulo ikasoŋa tu, “Opopo, tamâta koŋa toŋge ikura tu ipâŋga lâlu puro-puro kilo mâsi mana, a? Tiambo ikura tu itaulo ilâ tina kapwa ilo ŋana tina ma ipagugua kilo kâ, tiya?”

⁵Andeta Yesu iporo lâ kawa tu, “Naŋa aporo mao nâ pano; ambo lââ tava Koroani Sapâŋa ŋandai sipagugua tamâta toŋge ipâŋga wasaseki, ande tamâta ŋinde ma ikura tu imo Maro Kindeni ne ŋgumbi ilo, ande tia.

⁶Ŋana tu karaenda uru ipagugua karaenda nâ, aŋga Koroani Sapâŋa ipagugua via wasaseki lâ ilonda.

⁷Ŋana sâ kâ ŋga noko wisi motu ŋana ŋgua ŋine naŋa muŋga aporo pano tu, ‘Miki ma kapâŋga wasaseki ndo, itogo lâlu puro-puro mine’, a?

⁸Kalo ŋgere sondo ŋana ŋine kâ; lawea uru iyoka ilâ ikura i tamwata nâ ne pateâŋa. Noko kuloŋo ne nduŋeŋani nâ; andeta lawea iyoka pa sinia imâ, aŋga ilâ pa sinia, a? Ŋinde noko kuzizâla ŋana. Aku Koroani Sapâŋa ne mâsi ŋana ipaguguanzi tamâta sipâŋga wasaseki kâ, ande ikeno mine nâ.”

⁹Ŋineŋga Nikoteme ikasoŋa Yesu tu, “Ŋgua ŋine nde duvi mana.”

¹⁰Ande Yesu itu lâ kawa tu, “Opopo, noko nde Isrel nenzi pananâŋa tamâta ŋalae ma! Mine kala mana mana ŋga noko kuzizâla ŋana ŋgua ŋine ne duvi kâ, a?

¹¹Naŋa aporo mao nâ pano; maka kasama ŋinde marumbu lâ, ande kala uru kaporo katula ŋgua ŋana. Aku maka uru katula ŋgua ŋana vetâŋa rârâni maka muŋga kamora ŋinde. Aŋga miki nde tinimi pwâka tu kalomi tawana nema ŋgua ŋine.

¹²Naŋa uru aporo atula ŋgua pami ŋana tâno ne vetâŋa kâ, andeta miki kalomi tawana naneŋgu ŋgua, ande tia. Mine kala, ambo naŋa ma aporo atula ŋgua pami ŋana samba ne vetâŋa kâ, ande miki ma kalomi tawana ŋgua ŋinde mâsi mana, a?

¹³Tamâta toŋge muŋga ikâki ilâ samba ilo ŋineŋga itaulo imâ kilo, ande tia. Naŋa Tamâta Natu simboŋgu nâ ayoka pa samba kala andue amâ.

¹⁴Nia ndoyo, Mose ipa mwâta ‘aini’ toŋge lâ kâi toŋge tini, ŋineŋga isuka kâki lâ nia bilimu. Aku mine nâ, kinzi tamâta pinde ma muli sisuka naŋa Tamâta Natu kâki.

¹⁵Mine nde tamâta ea kalo tawana naŋa ma ikai via mao, ma imo via mine ku imo nâ.

¹⁶Maro Kindeni ilo ndo keno panzi tamâta rârâni simo tâno kulu. Mine kala isupwa i natu taituni indue imâ. Mine nde tamâta ea kalo tawana Maro Kindeni Natu, ande Maro Kindeni ma muli izavaru tamâta ŋinde, ande ma tia. Tamâta ŋinde ma imo via ku imo nâ.

¹⁷Ŋana tu Maro Kindeni ŋandai isupwa i Natu naŋa andue amâ tâno kulu ŋana apare nia panzi tamâta ŋana nenzi kiesaka kâ. Isupwana amâ tu ma akainzi piti lâ kondoma ilo ku via mao alanzi.

¹⁸Ambo tamâta toŋge kalo tawana Maro Kindeni Natu, ande Maro Kindeni ma ipare nia papa tamâta ŋinde ŋana i ne kiesaka kâ, ande tia. Taitu noko kuloŋo ŋga; ambo tamâta toŋge kalo tawana tia, ande Maro Kindeni ipa ŋgua marumbu lâ tu ma ipare nia papa ŋana i ne kiesaka kâ, ŋana tu tamâta ŋinde ŋandai kalo tawana Maro Kindeni Natu taituni ŋga.