Yoane 2:7-25

⁷Ŋineŋga Yesu ipainzi wurâta tamâta tu, “Miki kaliŋi lââ lâ kulo ilonzi lee sipipi lâ”. Aku siveta ikura Yesu ne ŋgua mine.

⁸Ŋineŋga ipainzi tu, “Ara, katai lââ pinde kakai kalâ pa katonâŋa ŋana kâŋa-nuŋa kâ.” Aku sikai silâ.

⁹Kinzi silâ sipâŋga pa katonâŋa ŋana kâŋa-nuŋa kâ, ŋineŋga i inu lââ ŋinde katiŋe. Andeta lââ kaŋa nde ipalele lâ, kala ipâŋga waini mao. Andeta katonâŋa ŋinde nde izizâla tu kinzi muŋga sikai waini ŋinde lâ nia ndia. Aŋga kinzi wurâta tamâta muŋga sitai lââ ŋinde, ande kinzi simbonzi nâ sisama. Ŋineŋga katonâŋa ŋana kâŋa-nuŋa kâ nde isarâwa pa pakâeŋa tamwata ŋinde tu imâ,

¹⁰aku ipai tu, “Kinzi tamâta uru waini kaŋa ara silanzi tamâta lombo muŋga lâ ŋga, aku muli, mambo kinzi lombo sidauda lâ, ŋineŋga kinzi uru sikai waini kaŋa ara koŋa tia silanzi tu sinu kâ. Aŋga noko nde kuveta kie toŋge, ŋana tu waini kaŋa ara pâta nde noko kulanzi tamâta lombo muli ndo.”

¹¹Yesu muŋga iveta mâsi kaika toŋge, ande tia. Iveta ne mâsi kaika muŋgâŋa ŋine lâ Kana lawea ikeno Galilaya tâno. Aku ŋana mâsi ŋine kâ, ande ipatula i tamwata kilala pwataki. Mine kala i ne pâri-tamâta nde kalonzi tawana i.

¹²Ŋinde ilâ lâ, ŋineŋga Yesu indue ilâ Kaperneam lawea kunzi i tina wa tai wa, sitavanzi ne pâri-tamâta. Aku kinzi simo ndaina ikura zo pinde.

¹³Juda nenzi kumbwa ŋalae Pasova nde imâ ipâŋga laiti lâ. Mine kala Yesu ikâki ilâ Jerusalem lawea.

¹⁴I ilâ pa Maro Kindeni ne luma sapâŋa, andeta mata ilâ imoranzi tamâta pinde simo ndaina siveta wurâta ŋana sipako bulmakao wa lama wa sii wa. Aku imoranzi tamâta pinde tona, sisaŋona kâro-kâro tini sikai wurâta ŋana sipalulua mbumbu kâ.

¹⁵Mine kala Yesu ipalaki raveŋa toŋge ku iŋaranzi tamâta rârâni lâ nia ŋinde, sitavanzi lama wa bulmakao wa. Aku ipaliŋi tamâta ŋana sipalulua mbumbu kâ ŋinde nenzi mbumbu wa ipulia nenzi kâro-kâro wa.

¹⁶Aku iporo ŋgua kaika panzi tamâta uru sikai wurâta ŋana sipako sii kâ ŋinde mine tu, “Kakainzi kelekele ŋine kakâwa kalâ! Miki ma kaveta naŋa Mama ne luma ipâŋga togo nââ nia mine ndimo!”

¹⁷Yesu ne pâri-tamâta simora ŋinde ku kalonzi ŋgere ŋana ŋgua pinde ikeno lâ Juda nenzi wâŋgiŋa paneâŋa kâ pepa tini mine tu, “O, Maro Kindeni, naŋa iloŋgu ndo keno pa noko ne luma sapâŋa, aku iloŋgu ŋalae tina tu luma ŋinde ma ikeno ara nâ.”

¹⁸Andeta kinzi Juda tamâta ŋalaŋala nde simâ ku sikasoŋa Yesu tu, “Wa, tiambo noko kupamorai tu noko pwai Maro Kindeni ndamwa kala kuveta vetâŋa ŋine lâ luma sapâŋa nia, a? Noko ma kutula mâsi kaika ndia pa maka ambo itula pwataki tu noko ne vetâŋa ŋine nde sondo, a?”

¹⁹Ande Yesu itu lâ kawanzi tu, “Ambo miki ma kasapira luma sapâŋa ŋine, ande kari ŋato nâ naŋa ma apa kâki kilo”.

²⁰Kinzi siporo taulo tu, “Opopo, kinzi muŋga sikai wurâta ŋalae tina ikura mbwera tamâta rua kanaŋo lima kanaŋo taitu (46), ŋana siŋgunu luma sapâŋa ŋine kâki kâ. Aŋga noko pwura tu kupa kâki kilo lâ kari ŋato nâ, a?”

²¹Andeta Yesu ŋandai iporo ŋgua ŋinde ŋana Maro Kindeni ne luma sapâŋa ŋga. Isia ŋgua panzi ŋana i tamwata karae kâ.

²²Aku muli, lâ zo ŋinde Maro Kindeni ipaŋo Yesu imandi lâ mateŋa nianzi imo via kilo, ŋineŋga kinzi pâri-tamâta kalonzi ŋgere ŋana ŋgua ndaina muŋga iporo ŋinde. Ŋineŋga kalonzi tawana Maro Kindeni kawa ŋgua ikeno lâ pepa tini ŋinde, aku kalonzi tawana Yesu ne ŋgua tona.

²³Yesu imo Jerusalem lawea lee, ikura lâ Juda nenzi kumbwa Pasova. Aku lâ zo ŋinde, kinzi tamâta rârâ simora mâsi kaika pinde iveta lâ ŋinde, kala kalonzi tawana i.

²⁴Andeta Yesu ipatula ndo panzi tamâta ŋinde, ande tia, ŋana tu isama kinzi tamâta rârâni ilonzi kalonzi marumbuni.

²⁵I tamwata nde isama lâ ŋana ilo-kalo rârâni ikeno ilonzi. Mine kala iroto ŋana tamâta toŋge tu itula ŋine pwataki papa i kâ, ande tia.